Beth ddylwn i ei ystyried wrth gynllunio?

• Gwahaniaethau Diwylliannol

Gan gynnwys gwahaniaethau crefyddol, hawliau LHDTC+, yr hinsawdd, bwyd ac anghenion dietegol.

• Rhwystrau Iaith

Ydych chi eisiau ymarfer neu ddysgu iaith newydd?

• Y Gost

Beth yw'r costau byw yno? Pa mor ddrud yw hi i deithio i'ch cyrchfan? Beth yw'r gyfradd trosi arian?

Unwaith y bydd gennych chi syniad o ble yr hoffech chi fynd, gwiriwch pa brifysgolion partner sy'n cynnig modiwlau yn eich pwnc. Gallwch ddod o hyd i ragor o wybodaeth am bob prifysgol drwy glicio ar y ddolen i'w tudalen we ar wefan Cyfleoedd Byd-eang.

Dewis Cyrchfan

Rhaid i chi gyflwyno eich dewis o dair prifysgol i'ch cydlynydd adrannol. Dylech gynnwys o leiaf un brifysgol Ewropeaidd.

Trefniadau Academaidd

Ydyn nhw'n cynnig modiwlau yn eich pwnc sy'n cael eu haddysgu yn Saesneg? Faint o oriau astudio/yn yr ystafell ddosbarth a ddisgwylir? Beth yw'r disgwyliadau academaidd?

Gweithgareddau allgyrsiol

Ydyn nhw'n cynnig gweithgareddau allgyrsiol y byddwch chi'n eu mwynhau?

Llety

Sut le yw'r llety? Beth yw’r gost? A yw wedi'i warantu ar gyfer myfyrwyr ar gynllun cyfnewid?

Mae Cyfleoedd Byd-eang yn argymell eich bod yn dechrau cyllidebu ar gyfer eich cyfnod dramor cyn gynted â phosibl, a dim hwyrach na 10-12 mis cyn gadael.

Gall fod yn ddefnyddiol gwneud rhestr o'r costau disgwyliedig, dyma rai pethau i'w hystyried:

• Teithio, gan gynnwys unrhyw deithiau unwaith y byddwch dramor
• Ffioedd Llety
• Ffioedd Fisa, gan gynnwys talu am unrhyw wiriadau meddygol/gan yr heddlu neu wasanaethau cyfieithu sydd eu hangen
• Yswiriant iechyd
• Costau byw - Bwyd, Hamdden, Cludiant
• Gwerslyfrau

Mae byw dramor naill ai ar gyfer astudio, gweithio neu gyfnod byrdymor wir yn eich profi, a dylech gymryd amser i ystyried eich penderfyniad yn ofalus.

Er y gall fod yn brofiad cyffrous, nid yw mynd dramor yn ystod eich amser yn y brifysgol at ddant pawb. Efallai y byddwch yn wynebu heriau a straen.
Byddwch yn gadael ffrindiau a theulu ar ôl wrth ymdopi â gwahaniaethau diwylliannol. Gall dod i arfer â byw mewn gwlad arall greu lefel uchel o straen a all arwain at ymatebion emosiynol cryf a pheri trallod.
Mae ymatebion o'r fath yn gwbl normal ac i'w disgwyl. Treuliwch amser yn ystyried sut y byddwch yn ymdopi ac a ydych yn barod i ymgymryd â'r her hon.

• Cynlluniwch ymlaen llaw – pa heriau ydych chi’n disgwyl eu hwynebu tra byddwch chi dramor?
• Pa rwydweithiau cymorth sydd gennych chi? Sut y gallant eich cefnogi tra byddwch chi dramor?

Ymchwiliwch yn drylwyr i’ch cyrchfan a’r brifysgol a fydd yn eich croesawu. Po fwyaf yr ydych chi'n ei wybod ymlaen llaw am yr hyn sydd i ddod ac yn gallu paratoi a chynllunio ar gyfer sut y byddwch chi'n ymdopi, y lleiaf llethol fydd y profiad. Byddwch yn realistig am yr heriau y gallech eu hwynebu. Byddwch yn barod gyda rhwydwaith cymorth a meddyliwch am strategaethau ymdopi iach a fydd yn helpu os bydd pethau'n anodd.