Am Brifysgol Aberystwyth

Ein cenhadaeth 

Cyflwyno addysg ac ymchwil ysbrydoledig mewn amgylchedd cefnogol, creadigol ac unigryw yng Nghymru. Gan adeiladu ar ein cryfderau hanesyddol a’n henw da am ragoriaeth, byddwn yn gwneud cyfraniad i gymdeithas yng Nghymru ac yn y byd ehangach drwy gymhwyso ein gwybodaeth i heriau lleol a byd-eang. Gan weithio mewn cymuned groesawgar a dwyieithog, byddwn yn defnyddio ein harbenigedd i feithrin meddwl beirniadol, cwestiynu annibynnol a sgiliau sy’n paratoi ein dysgwyr ar gyfer eu bywydau yn y dyfodol.  

Enw da am ansawdd addysgu eithriadol 

Dros y 150 mlynedd ddiwethaf, mae Prifysgol Aberystwyth wedi datblygu’n gymuned academaidd gref gyda thros 2,000 o staff a 6,000 o fyfyrwyr o bedwar ban byd. Mae gennym 19 o adrannau academaidd, wedi’u trefnu’n dair cyfadran ar draws y gwyddorau, y gwyddorau cymdeithasol, a’r celfyddydau a’r dyniaethau. 

Mae gennym enw penigamp am ragoriaeth addysgu. Wrth galon ein cenhadaeth mae addysgu sy’n cael effaith; dyna pam ein bod yn cael ein gosod yn gyson ymhlith prifysgolion gorau’r DU am ansawdd addysgu a boddhad myfyrwyr. 

Ymchwil sy’n ysbrydoli ac yn cael effaith 

Rydym yn brifysgol sy’n cael ein harwain gan ymchwil ac sy’n dathlu creu a chyfnewid gwybodaeth, effaith ac arloesi. Mae ein hymchwil yn sylfaen i’n haddysgu ac yn ei lywio i gyfoethogi profiad dysgu ein myfyrwyr. Mae ein hymchwil yn cyflwyno manteision i gymdeithas yn ehangach ac yn effeithio ar yr economi, yr amgylchedd, ar bolisi cyhoeddus a bywyd diwylliannol yng Nghymru a thu hwnt. Gan amrywio o frwydro newid yn yr hinsawdd, gwella ansawdd bwyd a chynhyrchu bwyd, hyrwyddo iechyd dynol ac anifeiliaid, i ddatblygu deallusrwydd artiffisial a helpu i ddatblygu fforio yn y gofod, mae ein hymchwilwyr ar flaen y gad o ran arloesi ac cheir buddion rhyngwladol pellgyrhaeddol yn sgil effaith ein hymchwil. Yn asesiad diweddar y Fframwaith Rhagoriaeth Ymchwil, mae 98% o ymchwil y Brifysgol o safon a gydnabyddir yn rhyngwladol neu’n uwch (REF 2021).  

Profiad Eithriadol i Fyfyrwyr  

Mae bywyd myfyrwyr yma’n troi o gwmpas ein campws arfordirol a thref ddiogel, glos ac eto gosmopolitan Aberystwyth. Yn Arolwg Cenedlaethol y Myfyrwyr 2022 gosodwyd Aberystwyth ar y brig yng Nghymru a Lloegr am foddhad myfyrwyr, sy’n tystio i’r profiad academaidd a chymdeithasol eithriadol y mae myfyrwyr yn ei dderbyn yn ystod eu cyfnod gyda ni. 

Buddsoddi yn ein hadnoddau 

Mae ein cyfraddau uchel o foddhad myfyrwyr yn adlewyrchu ansawdd yr addysg a ddarperir gennym yn ogystal â buddsoddiadau diweddar o dros £100m i wella ac ehangu ein hadnoddau preswyl ac addysgu oedd eisoes yn rhagorol. 

Ailwampiwyd ac uwchraddiwyd darlithfeydd a mannau addysgu ledled y Brifysgol, gyda chyfleusterau i recordio’r holl ddarlithoedd ar gyfer adolygu a chyfnerthu dysgu. Drwy dargedu buddsoddiad, rydym ni’n ymrwymo i sicrhau y gall ein myfyrwyr fanteisio ar gyfleusterau addysgu a dysgu o safon fyd-eang, a sicrhau’r sgiliau y bydd eu hangen arnynt i lwyddo yn eu bywydau. 

Rydym ni’n cynnig amrywiaeth o opsiynau a lleoliadau i ddod hyd i’r lle sy’n gweithio i chi, gyda’r rhan fwyaf o’n preswylfeydd o fewn pellter cerdded rhwydd i’r campws. Rydym ni wedi buddsoddi dros 50 miliwn i wella ein llety myfyrwyr i’r holl fyfyrwyr israddedig ac uwchraddedig. Mae Fferm Penglais wedi’i gosod mewn amgylchedd sydd wedi’i dirlunio’n hyfryd, ac yn cynnig llety i fyfyrwyr sydd gyda’r gorau yn y DU gyda golygfeydd ysblennydd o arfordir Bae Ceredigion. Ym mis Medi 2020, croesawyd myfyrwyr newydd a rhai oedd yn dychwelyd i Neuadd Breswyl hanesyddol Pantycelyn sydd newydd ei hailwampio, adeilad eiconig sy’n dyddio o’r 1950au. Dynodwyd Pantycelyn yn llety i siaradwyr a dysgwyr Cymraeg yn 1973 ac fe’i cydnabyddir yn genedlaethol am ei chyfraniad i ddiwylliant a chymdeithas Cymru. 

Cyfoethogir bywyd y myfyrwyr ymhellach gan Undeb Myfyrwyr bywiog, sy’n rhedeg dros 100 o glybiau a chymdeithasau gwahanol. Mae gennym ein Canolfan Chwaraeon ein hunain ar y campws gyda thrac rhedeg, llain 3G, pwll nofio, campfa, wal ddringo, stiwdio sbin, a dosbarthiadau llesiant a ffitrwydd. Ein Canolfan Celfyddydau ar y campws yw un o’r mwyaf yn y DU gyda theatr, mannau arddangos a pherfformio yn ogystal â sinema boutique, bar a chaffis. 

Darpariaeth cyfrwng Cymraeg 

Rydym ni’n ymfalchïo yn ein hanes hir o addysgu ac ymchwilio drwy gyfrwng y Gymraeg. Yn wir, mae ein lefel o ddarpariaeth i fyfyrwyr sy’n dymuno astudio drwy gyfrwng y Gymraeg gydag un o’r uchaf yng Nghymru. Rydym yn cynnig cyfleoedd i fyfyrwyr rhugl eu Cymraeg yn ogystal a’r rheini sy’n llai hyderus neu sy’n ddysgwyr ar draws amrywiaeth eang o bynciau o amaethyddiaeth i astudiaethau plentyndod, a gwleidyddiaeth i wyddor anifeiliaid.