Pam dewis Aberystwyth?
Ers 1872, mae Prifysgol Aberystwyth wedi magu enw da ledled y byd am ragoriaeth ein dysgu a'n hymchwil arloesol. Ar arfordir gorllewinol Cymru, rydym yn cynnig profiad myfyrwyr eithriadol mewn un o leoliadau mwyaf godidog y wlad.
Gall myfyrwyr sy’n ymuno â ni trwy’r broses Glirio o fis Medi 2026 elwa o'r canlynol:
. Sicrwydd llety gydag aelodaeth am ddim i'r Ganolfan Chwaraeon
. Cerdyn rheilffordd 16-25 am ddim am docynnau trên rhatach ar draws y DU
. Gall fyfyrwyr cymwys gael £2,000 yn eu blwyddyn gyntaf gyda'r Wobr Rhagoriaeth Academaidd.
Mae Aberystwyth ymhlith pum dinas rataf y DU am lety myfyrwyr (Student Crowd 2025), gan gynnig costau byw mwy fforddiadwy na llawer o drefi a dinasoedd eraill.
Darganfyddwch fwy o resymau dros astudio yn Aberystwyth isod.
Addysgu Dylanwadol
Mae ein haddysgu dylanwadol wedi’i lywio gan ymchwil arloesol ac mae ein myfyrwyr yn cael eu haddysgu mewn adrannau sy’n flaengar o ran ymchwil. Mae ein myfyrwyr israddedig yn cael eu cynorthwyo gan academyddion o'r radd flaenaf i ddatblygu'r sgiliau a'r wybodaeth sydd eu hangen i fynd i'r afael â phroblemau'r byd heddiw. Adlewyrchir ein hymrwymiad i ragoriaeth mewn addysgu yn y ffaith bod Aberystwyth wedi’i gosod yn y 10 uchaf yn y Deyrnas Unedig am Ansawdd y Dysgu (Canllaw Prifysgolion Da 2026, The Times a'r Sunday Times).
Ymchwil sy'n arwain y byd
O fynd i'r afael â newid hinsawdd, gwella ansawdd a dulliau cynhyrchu bwyd, hybu iechyd pobl ac anifeiliaid, i ddatblygu deallusrwydd artiffisial a helpu i ddatblygu'r gwaith o archwilio'r gofod, mae ein hymchwilwyr yn flaenllaw ac arloesol, ac mae buddiannau rhyngwladol eang wedi deillio o ddylanwad ac effaith ein hymchwil.
Sicrwydd Llety
Rydym yn cynnig sawl math o lety gwerth am arian ardderchog, a hynny ar draws tri safle preswyl. Fe rydym hefyd yn sicrhau llety i holl ymgeiswyr Clirio sy’n gwneud cais erbyn y 1af o Fedi 2026. Gallwch ddewis o blith ein llety arlwyo neu hunanarlwyo, pob un o fewn pellter cerdded i'r prif adeiladau adrannol, Undeb y Myfyrwyr, y Ganolfan Chwaraeon a mwy. Mae myfyrwyr sy'n byw yn llety’r Brifysgol hefyd yn cael aelodaeth Blatinwm am ddim yn y Ganolfan Chwaraeon.
Profiad unigryw i fyfyrwyr
Yn Aberystwyth, rydym yn ymdrechu i gynnig profiad heb ei ail i fyfyrwyr; mae’r Brifysgol wedi’i gosod ar y brig yng Nghymru am Foddhad Myfyrwyr (Arolwg Cenedlaethol o Fyfyrwyr 2025). Mae Undeb y Myfyrwyr yn gartref i dros 100 o glybiau a chymdeithasau, sy'n golygu mai dyma’ch lle i ddilyn diddordebau oes neu ddarganfod diddordebau newydd. Mae ein campws bywiog yn gartref i Ganolfan y Celfyddydau Aberystwyth, caffis, bwytai, Canolfan Chwaraeon a meysydd chwarae, yn ogystal â Thai Gwydr y Gerddi Botaneg (sy’n cynnwys planhigion trofannol).
Lleoliad trawiadol
Rhwng mynyddoedd y Canolbarth a glannau Bae Ceredigion, mae lleoliad arfordirol y Brifysgol yn ddelfrydol os oes gennych ddiddordeb mewn gweithgareddau awyr agored. Mae ein tref groesawgar, gynhwysol a bywiog yn cynnig digon o gyfleoedd i gymdeithasu ac i wneud ffrindiau oes. Bydd modd i bob myfyriwr israddedig blwyddyn gyntaf sy’n ymuno â Phrifysgol Aberystwyth ym mis Medi 2026 hawlio Cerdyn Rheilffordd 16-25 am ddim.
Cymorth ariannol wrth i chi astudio
Yn Aberystwyth, rydym yn cynnig pecyn hael o ysgoloriaethau a bwrsariaethau, a gall myfyrwyr sy'n gwneud cais i astudio yn Aberystwyth trwy’r broses Glirio fod yn gymwys i dderbyn ein Hysgoloriaeth Rhagoriaeth Academaidd, sy’n werth £2,000 yn y flwyddyn gyntaf.
Eich cynorthwyo yn ystod eich astudiaethau
Cefnogi ein myfyrwyr yw un o’n prif flaenoriaethau, ac mae tîm ymroddedig y Gwasanaeth Cymorth i Fyfyrwyr yn cynnig y cyngor ymarferol, emosiynol ac ariannol angenrheidiol i'ch helpu i lwyddo yn eich astudiaethau.