Amdanom ni

Dim ond dod yn fwyfwy perthnasol wnaiff Cyfrifiadureg, wrth i’r byd ddibynnu’n gynyddol ar ddatblygiadau technolegol. Mae Cyfrifiadureg erbyn hyn yn ffactor bwysig mewn peirianneg, gwyddoniaeth, teithio, masnach a hyd yn oed y cyfryngau, sy’n golygu bod modd cymhwyso’r wybodaeth a’r sgiliau ymarferol a gewch trwy astudio gyda ni i ystod eang o wahanol ddiwydiannau.

Yn Aberystwyth, yr ydym yn ymfalchïo mai ni yw un o’r adrannau Cyfrifiadureg hynaf ym Mhrydain, wedi ein rhoi ar y brig yng Nghymru am bwnc Cyfrifiadureg (Canllaw Prifysgolion Da y Times a’r Sunday Times 2020). Yr ydym yn parhau i fod ar y blaen mewn ymchwil technolegol a chreu graddedigion o’r ansawdd flaenaf.

O ddatblygu camerâu i’w defnyddio mewn teithiau i’r gofod i wella ffyrdd o sgrinio am ganser, mae ein darlithwyr yn gwneud cyfraniadau pwysig yn y byd go-iawn. Ymysg ein meysydd ymchwil a datblygu y mae roboteg, deallusrwydd artiffisial, biowybodeg, prosesu delweddau, cyfathrebu dros y rhyngrwyd a pheirianneg meddalwedd, ac y mae gennym gysylltiadau â chwmnïau rhyngwladol o bwys.

Mae’r rhan fwyaf o’n graddau wedi eu hachredu gan y BCS, Sefydliad Siartredig Technoleg Gwybodaeth ar ran y Cyngor Peirianneg, sy’n eich rhoi ar y blaen pan fyddwch yn dod i mewn i’r farchnad swyddi gystadleuol pan fyddwch yn graddio.

Mae Aberystwyth yn lle gwych i fod yn fyfyriwr. Mae’r dref yng nghanol peth o’r wlad hyfrytaf yn y DU, ac y mae’r Brifysgol yn cynnig cyfleusterau chwaraeon, cymdeithasol a chefnogol rhagorol. Dewch i weld drosoch eich hun beth sy’n gwneud Aberystwyth yn lle mor anhygoel i astudio.

Dr Thomas Jansen

Pennaeth yr Adran