Digwyddiadau

Daeth dathliadau pen-blwydd y 150 i fwcl yn ystod wythnos graddio gyda chyfle i ddathlu yng nghwmni Cymrodyr a Ffrindiau.

Lluniau Dathliad Cymrodyr a Ffrindiau

Penwythnos i ddathlu 130 mlwyddiant Cymdeithas y Cyn Fyfyrwyr ynghyd â 150 mlwyddiant y Brifysgol. Roedd yn gyfle gwych i ailgysylltu a hel atgofion gyda hen ffrindiau ac aelodau o staff, cwrdd â chyfoedion, a gweld y dref a'r Brifysgol fel maen nhw heddiw, yn agored i holl raddedigion a chyn aelodau staff Aber a’u teuluoedd.

Lluniau a fideo i weld yma.

Perfformiodd myfyrwyr o Brifysgol Alabama yn Birmingham (UAB) cyngerdd yn Bandstand Aberystwyth ddydd Sul 4 Mehefin fel gwesteion Prifysgol Aberystwyth.

Roedd y gyngerdd yn y bandstand am ddim ac yn agored i bawb, ac yn cynnwys casgliad tuag at Elusen y Flwyddyn y Brifysgol ar gyfer 2022/23, sef Uned Ddydd Cemotherapi Ysbyty Cyffredinol Bronglais. Codwyd dros £280.

Lluniau o'r cyngerdd

Cynhaliwyd noson elusennol arbennig ar nos Iau, 27ain Ebrill, i ddathlu penblwydd y Brifysgol a'r Scarlets yn 150 oed.

Codwyd dros saith mil o bunnau gyda'r holl elw wedi cael ei rannu rhwng Sefydliad Phil Bennett ac elusen y flwyddyn Prifysgol Aberystwyth sef Uned Ddydd Cemotherapi Bronglais.

Lluniau o Swper Elusennol y Scarlets a Phrifysgol Aberystwyth

Cynhaliwyd digwyddiadau arbennig ym Mhreswylfa Llysgennad Prydain, Washington a'r Culture Centre yn Efrog Newydd.

Roedd yn gyfle i ddathlu’r bartneriaeth hir rhwng Aberystwyth a’r Unol Daleithiau o’n myfyriwr rhyngwladol cyntaf un, yn ôl yn 1875, i daith y Prifathro cyntaf, Thomas Charles Edwards i Ogledd America yn 1890 i godi arian i adnewyddu’r Hen Goleg yn dilyn tân dinistriol.

Roedd cyn-fyfyrwyr, ffrindiau a chefnogwyr yr Unol Daleithiau yn hollbwysig i oroesiad y Brifysgol yn ystod y blynyddoedd cynnar hynny ac mae’r cynhesrwydd a ddangoswyd tuag at Aber yn ystod yr ymweliad yn adlewyrchu bod hynny mor gryf heddiw ag erioed.

Lluniau o ddigwyddiad Washington DC

Lluniau o ddigwyddiad Efrog Newydd

Daeth 200 o gyn-fyfyrwyr a gwesteion ynghyd i ddathlu’r garreg filltir arbennig hon yn ein hanes yng nghwmni’r Canghellor, yr Arglwydd Thomas o Gwmgïedd. Y siaradwr gwadd oedd y gyn-fyfyrwraig a chymrawd, y Farwnes Kay Andrews OBE a sgwrsiodd yn hoffus am ei chyfnod yn Aberystwyth.

Cafodd pawb noson wrth eu bodd yn dathlu a hel atgofion o fewn muriau godidog Tŷ’r Arglwyddi.

Lluniau derbyniad dathlu 150 yn Nhŷ’r Arglwyddi 

I nodi a dathlu ein pen-blwydd yn 150, cynhaliwyd weminar arbennig i bori drwy rhai o'r straeon y tu ôl i'n cyhoeddiad diweddar Ceiniogau'r Werin / Pennies of the People.

Cyfle i ganfod mwy am hanes y Brifysgol a chlywed ystod o straeon rhyfeddol o’n gorffennol a’n presennol yng nghwmni’r Athro Anwen Jones, Cadeirydd y Bwrdd Golygyddol; Yr Athro Robert Meyrick, Pennaeth yr Ysgol Gelf, a’n archifydd Julie Archer.

'Y Bydoedd a Garem'

Roedd yr ŵyl flynyddol yn tynnu sylw at yr ymchwil o safon fyd-eang ym Mhrifysgol Aberystwyth, ac wedi ei chynnal fel rhan o’i dathliadau 150 mlwyddiant.

Rhaglen llawn a manylion pellach i weld yma

Braf oedd gallu dychwelyd i Dde-ddwyrain Asia i ddathlu ein pen-blwydd yn 150 gyda digwyddiadau ym Malaysia, Singapore a Gwlad Thai yng nghwmni’r Canghellor, yr Arglwydd Thomas o Gwmgïedd, ynghyd â’r Is-Ganghellor yr Athro Elizabeth Treasure.

Daeth dros 180 o gyn-fyfyrwyr a chymrodyr ynghyd i ddathlu ac i wybod mwy am ddatblygiadau ‘r Brifysgol gyda derbyniadau yn Bangkok, Singapore a Kuala Lumpur. Cynhaliwyd cinio arbennig i Gymrodyr a ffrindiau ym Malaysia yng nghwmni gwestai anrhydeddus Ei Uchelder Brenhinol Tuanku Muhriz.

Lluniau derbyniad cyn-fyfyrwyr Malaysia

Lluniau cinio Cymrodorion Er Anrhydedd a Chyfeillion

Yn rhan o'n dathliadau Mis Hanes Pobl Dduon, cawsom gyflwyniad gan y siaradwr gwadd Michael Jonas o Represent Us Rural, ac fe wnaeth y cyflwyniad hwnnw yn sicr ein hysgogi i feddwl. Roedd y cyflwyniad yn archwilio 'Natur Anwyddonol ffyrdd o feddwl ar sail hil’, a sbardunodd hynny lawer o drafodaethau ymhlith ein myfyrwyr uwchraddedig ac aelodau o staff.  Roedd hwn yn ddigwyddiad gwych a oedd yn gyfle i rannu gwybodaeth, profiad, a dysg.

Ar ddydd Mercher 19 Hydref daeth cyn-fyfyrwyr, ffrindiau, cefnogwyr, staff a myfyrwyr ynghyd yn Y Senedd, Bae Caerdydd i ddathlu yng nghwmni gwesteion anrhydeddus Prif Weinidog Cymru, y Gwir Anrh. Mark Drakeford AS a’r Llywydd, y Gwir Anrh Elin Jones MS.

Roedd yn gyfle nid yn unig i edrych yn ôl ar ein hanes, ond i edrych ymlaen at y dyfodol, wrth inni greu rhaglenni sy’n addas ar gyfer bywydau pobl Cymru a thu hwnt gan barhau i fynd i’r afael â rhai o’r materion mawr sy’n wynebu ein cymdeithas gan weithio mewn partneriaeth er budd ein cymunedau.

Lluniau dathlu'r Sylfaenwyr Caerdydd

Ar ddydd Mawrth y 18fed o Hydref cynhaliwyd digwyddiad arbennig i ddathlu ein Sylfaenwyr yng Nghanolfan Cymry Llundain, Ffordd Gray’s Inn.  Bu’n lleoliad priodol iawn i nodi’r achlysur a’n pen-blwydd yn 150 gan mai yma, yng nghalon y ddinas, y rhoddwyd cyfeiriad pendant i’r freuddwyd i sefydlu Prifysgol i Gymru.

Roedd yn anrhydedd i groesawu’r siaradwr gwadd, Huw Edwards, y newyddiadurwr a’r darlledwr uchel ei barch gyda’r BBC, a siaradodd am y cysylltiadau dwfn rhwng Llundain a Chymru a dylanwad y Cymry yn Llundain ar Addysg Uwch yng Nghymru a thu hwnt.

Lluniau dathlu'r Sylfaenwyr Llundain

Ar ddydd Gwener 14 Hydref, nododd Prifysgol Aberystwyth 150 mlynedd ers iddi agor ei drysau am y tro cyntaf, gyda gorymdaith Diwrnod y Sylfaenwyr i gicio’r bar ar y Promenâd ac a ddilynwyd gan frecwast mawreddog yn Y Neuadd Fawr.

Mae'r digwyddiad blynyddol yn cofio’r diwrnod pan groesawyd 25 o fyfyrwyr i'r Coleg Prifysgol newydd gan y Prifathro Thomas Charles Edwards ym mis Hydref 1872.

Yn unol â'r traddodiad, arweiniwyd yr orymdaith gan yr Is-Ganghellor, yr Athro Elizabeth Treasure, ac roedd yn cynnwys cynrychiolwyr o blith aelodau staff, myfyrwyr, cefnogwyr a chynrychiolwyr o'r gymuned leol. Roedd sawl aelod o Gymdeithas y Cyn Fyfyrwyr yno hefyd i ddathlu 130 mlwyddiant y Gymdeithas ynghyd â 150 mlwyddiant y Brifysgol.

Fel rhan o’r dathliadau 150 mae cyfrol ddathlu arbennig wedi ei chyhoeddi sydd yn dwyn y teitl Ceiniogau'r Werin | The Pennies of the People.  Mae’n cynnwys cyfoeth o straeon a chymeriadau yn seiliedig ar 150 gwrthrych o’n gorffennol hyd at y presennol.

Lluniau dathlu'r Sylfaenwyr Aberystwyth  

Cynhaliwyd gig mawreddog yn y Neuadd Fawr, Canolfan y Celfyddydau Aberystwyth ar nos Sadwrn 15 Hydref i ddathlu treftadaeth gerddorol y Brifysgol dros y blynyddoedd, gyda’r lein-yp yn cynnwys llu o’r artistiaid a bandiau sydd wedi bod yn fyfyrwyr yn y Brifysgol.

Roedd y perfformwyr yn cynnwys Mynediad am Ddim, Geraint Løvgreen a’r Enw Da, Linda Griffiths, Pwdin Reis, Los Blancos, Catrin Herbert, Mei Emrys a Bwca.

I gyd-fynd â’r Gig Mawr, roedd hefyd arddangosfa arbennig i’w gweld yng Nghanolfan y Celfyddydau yn dathlu’r cysylltiad rhwng Aber a’r sin gerddoriaeth.

Gyda’r Eisteddfod yn lleol yn Nhregaron eleni roedd yn cynnig man cychwyn cofiadwy i’r flwyddyn ddathlu 150. 

Fel arfer roedd gan Prifysgol Aberystwyth bresenoldeb amlwg ar y Maes a dathliadau y 150 yn ganolbwynt ar y stondin eleni gyda sawl cyfle ar hyd yr wythnos i fwynhau cyflwyniadau yn seiliedig ar straeon cyfoethog o’r Gyfrol Ddathlu 150. 

Bu’r Aduniad Blynyddol i gyn-fyfyrwyr ar brynhawn dydd Mercher yn ddigwyddiad poblogaidd dros ben. Cynhaliwyd Aduniad Haf UMCA ar y stondin ar brynhawn dydd Gwener i groesawu myfyrwyr presennol a diweddar. Roedd y Brifysgol yn amlwg yn y Pentref Gwyddoniaeth a oedd yn llwyfannu rhaglen brysur o weithgareddau difyr wedi’i seilio ar yr ymchwil ddiweddaraf ym myd y Gwyddorau ac roedd tîm Dysgu Cymraeg y Brifysgol wrth galon prysurdeb y Pentref Dysgu’r Gymraeg fel y prif ddarparwr lleol. Roedd academyddion blaenllaw yn darlithio ac yn trin a thrafod materion cyfoes fel rhan o raglen Pabell y Cymdeithasau a'r Babell Lên.

Ymunodd dros 70 o bobl â thîm Zumba Canolfan Chwaraeon Prifysgol Aberystwyth i nodi ein pen-blwydd yn 150 drwy gymryd rhan mewn 150 munud o Zumba. Codwyd cyfanswm o dros £1,000 gyda’r arian yn cael ei rannu rhwng Ambiwlans Awyr Cymru (Elusen y Flwyddyn Prifysgol Aberystwyth a bleidleisiwyd gan staff a myfyrwyr ar gyfer 2021-22) ac Apêl Wcráin.

Fel rhan o Ddathliad Diwrnod y Sylfaenwyr yn Aberystwyth cyflwynodd yr Is-Ganghellor, yr Athro Elizabeth Treasure, siec o £5,200.37, sef y cyfanswm a godwyd gan staff a myfyrwyr y brifysgol, i Dougie Bancroft, swyddog codi arian cymunedol Ambiwlans Awyr Cymru.

Pleidleisiodd myfyrwyr a staff i gefnogi’r uned ddydd cemotherapi yn Ysbyty Bronglais trwy ei gwneud yn Elusen y Flwyddyn Prifysgol Aberystwyth am 2022-23.

Lluniau o'r Zumbathon