Cymorth Dysgu ac Anabledd

Os ydych chi'n meddwl bod gennych chi wahaniaeth dysgu, cysylltwch â hygyrchedd@aber.ac.uk a bydd y Tîm Hygyrchedd yn anfon manylion atoch am sut i gael eich sgrinio.

Os yw'r sgrinio'n dangos eich bod yn debygol o fod â gwahaniaeth dysgu, gallwn roi manylion i chi am sut i gael Adroddiad Asesiad Diagnostig (DAR) neu asesiad Seicolegydd Addysg (EPA). Fodd bynnag, gallwch hefyd wirio Cymdeithas Seicolegol Prydain neu PATOSS am seicolegwyr/athrawon arbenigol yn eich ardal.

Fel myfyriwr cofrestredig ym Mhrifysgol Aberystwyth, os oes angen i chi dalu am Asesiad Seicolegydd Addysg (EPA) a bod hyn yn eich rhoi mewn caledi ariannol, e-bostiwch student-adviser@aber.ac.uk am gyngor pellach. Efallai y bydd modd i chi gael cymorth ariannol ychwanegol i helpu gyda'r gost hon.

Os ydych wedi cael cymorth o'r blaen ar gyfer eich Gwahaniaeth Dysgu Penodol/dyslecsia megis cymorth dysgu neu ddarpariaeth mewn arholiad, byddwch yn ymwybodol nad yw hyn yn parhau o’r ysgol/coleg i’r brifysgol.

Bydd angen diagnosis o unrhyw anabledd a allai fod angen cymorth arnoch ac mae Asesiad Seicolegydd Addysg (EPA) yn gweithredu fel diagnosis ar gyfer Gwahaniaeth Dysgu Penodol/dyslecsia yng nghyd-destun Cyllid Myfyrwyr. Gwiriwch a oes gan aelod o staff o'ch ysgol/coleg gymwysterau addas i gynnal asesiad diagnostig  llawn .

Ar ôl i chi gael Asesiad Seicolegydd Addysg, neu ddiagnosis o anabledd gwahanol, e-bostiwch gopi at y Tîm Hygyrchedd yn anabledd@aber.ac.uk. Bydd modd iddynt eich helpu i wneud cais am y Lwfans i Fyfyrwyr Anabl ac i drefnu darpariaethau dysgu i'ch helpu. 

Mae gan Brifysgol Aberystwyth ystafelloedd cwbl hygyrch gyda defnydd o geginau cymunedol wedi’u haddasu yn ogystal â fflatiau wedi'u haddasu. Gallwn hefyd ddarparu addasiadau megis larymau tân sy'n fflachio, clustogau sy’n dirgrynu ac oergelloedd meddygol.

Gallwn addasu ystafelloedd yn ôl anghenion unigol, er enghraifft darparu rheiliau llaw, gostwng silffoedd ac ati a gallwn gymeradwyo ceisiadau am en suite, ystafelloedd ar y lloriau uchaf/isaf, ystafelloedd ar y campws/ar lan y môr ac ati. Mae mwy o wybodaeth am ddewisiadau llety ar gael yn y Llawlyfr Llety.

Os oes angen gofalwr personol preswyl, efallai y bydd y Brifysgol yn gallu darparu ystafell ar y campws. Bydd angen i chi sicrhau y gellir talu cost ystafell y gofalwr. Efallai y bydd myfyrwyr sy'n talu ffioedd cartref yn gallu adennill cost llety'r gofalwr gan eu Hadran Gwasanaethau Cymdeithasol gartref.

Bydd angen i fyfyrwyr sy'n dymuno gofyn am gymorth ariannol gan eu Hadran Gwasanaethau Cymdeithasol sicrhau, yn dilyn asesiad cymunedol, fod y 'Cynllun Gofal' yn argymell darparu cynorthwyydd personol/gofalwr.

Nodwch ar eich cais am lety ar-lein os oes gennych anabledd neu gyflwr meddygol y mae angen ei ystyried, neu y dylai'r Brifysgol fod yn ymwybodol ohono.

Dylech nodi'r gofynion hyn ar eich cais, ni waeth pa breswylfa rydych chi'n gwneud cais amdani, neu hyd yn oed os ydych chi eisoes wedi bod mewn cysylltiad â'r Ymgynghorydd Hygyrchedd o ran gofynion arbennig. Gwnewch gais am lety cyn gynted â phosibl i sicrhau y gellir bodloni gofynion eich ystafell cyn i chi gyrraedd.

Gyda'ch caniatâd, bydd yr wybodaeth feddygol a ddarperir ar eich Ffurflen Cais am Lety yn cael ei throsglwyddo i ni, y Tîm Hygyrchedd o fewn y Gwasanaethau Cymorth i Fyfyrwyr, er mwyn asesu eich anghenion. Bydd angen i gadarnhad ysgrifenedig gan ymarferydd meddygol gael ei gyflwyno i gefnogi eich cais ac unwaith y bydd hyn wedi dod i law gallwn drafod gyda chi pa fath o lety fydd fwyaf priodol. Dylid anfon tystiolaeth feddygol at: hygyrchedd@aber.ac.uk.

Mae'r holl wybodaeth am anabledd neu gyflwr meddygol ar eich ffurflen gais am lety yn cael ei thrin yn gyfrinachol, ac fe'i defnyddir at y dibenion a nodir yn unig.

Gwnewch yn siŵr eich bod yn sôn am unrhyw beth a allai effeithio ar eich Iechyd a'ch Diogelwch neu Iechyd a Diogelwch y rhai sy'n byw o'ch cwmpas.

Cynllun Personol Gadael mewn Argyfwng

Er mwyn sicrhau eich diogelwch, bydd angen Cynllun Personol Gadael mewn Argyfwng arnoch i nodi dull priodol o ddianc os bydd argyfwng (gan gynnwys driliau gwagio adeilad) yn llety'r Brifysgol ac mewn adeiladau academaidd. Bydd hyn yn berthnasol ni waeth beth yw achos eich anhawster a ph’un ai yw’n anhawster tymor byr neu hirdymor.

Cysylltwch â hygyrchedd@aber.ac.uk, neu bydd aelod o'r tîm hygyrchedd yn cysylltu â chi a fydd yn cwblhau Cynllun Personol Gadael mewn Argyfwng gyda chi cyn i chi symud ar y campws.