Hyrwyddo gwyddoniaeth a dychymyg y cyhoedd

Yr Athro Nigel Scollan (chwith) Athro Ymgysylltu â'r Cyhoedd gyda Gwyddoniaeth, a’r Athro Richard Marggraf Turley, Athro Ymgysylltu â Dychymyg y Cyhoedd

Yn dilyn proses benodi ar lefel uchel, mae'r Brifysgol wedi penodi'r Athro Nigel Scollan fel Athro Ymgysylltu â'r Cyhoedd gyda Gwyddoniaeth a'r Athro Richard Marggraf Turley fel Athro Ymgysylltu â Dychymyg y Cyhoedd.

Bydd y ddwy rôl yn canolbwyntio ar annog cyfranogiad y cyhoedd ym mhob agwedd o weithgareddau'r Brifysgol - o arwain ymchwil i ddatblygu polisi, o drafodaeth ar sut y mae'r Brifysgol yn gweithio a chymryd rhan weithgar mewn cyfnewid gwybodaeth.
Bydd yr Athrawon yn arwain ymgyrch y Brifysgol i annog mwy o gyfranogiad yn nigwyddiadau’r Brifysgol a chynorthwyo i ddatblygu Diwrnod Agored i bobl yng Ngheredigion.

Ymunodd yr Athro Nigel Scollan gyda Sefydliad Tir Glas ac Ymchwil Amgylcheddol, Aberystwyth yn 1993 ac wedi hynny Brifysgol Aberystwyth yn 2008. Mae’n dal Cadair Bwyd a Ffermio Waitrose yn Sefydliad Gwyddorau Biolegol, Amgylcheddol a Gwledig (IBERS) y Brifysgol.

Mae'r  Athro Scollan yn arwain grŵp ymchwil ar Systemau Anifeiliaid ac yn arwain rôl Prifysgol Aberystwyth wrth greu menter diwydiant a'r byd academaidd unigryw i helpu cefnogi ffermio yn y Deyrnas Gyfunol, sef "Canolfan Rhagoriaeth y DG ar gyfer Ffermio ".
Wrth sôn am ei benodiad, dywedodd yr Athro Nigel Scollan: "Mae hwn yn gyfle gwych i adeiladu ar y gwaith rhagorol y mae’r Brifysgol yn ei wneud mewn ymchwil ac addysgu ac ymchwilio i ffyrdd arloesol a chreadigol o weithio’n agosach gyda'r cyhoedd".

Mae’r Athro Richard Marggraf Turley o'r Adran Saesneg ac Ysgrifennu Creadigol yn Gyd-Gyfarwyddwr Canolfan ar gyfer Astudiaethau Rhamantaidd y Brifysgol, ac yn enillydd Gwobr Keats-Shelley am farddoniaeth yn 2007.

Mewn ymateb i’w benodiad fel yr Athro Ymgysylltu â'r Dychymyg Cyhoeddus cyntaf yn y Deyrnas Gyfunol, dywedodd Richard:
"Mae Aberystwyth wedi manteisio ar greu cysylltiad gwirioneddol gyhoeddus bywiog." Ychwanegodd bod ei deitl newydd "y mwyaf cŵl yn y byd academaidd, ac yn llwyfan gwych.

Dywedodd yr Is-Ganghellor yr Athro April McMahon; 
"Rwy'n falch iawn ein bod wedi gallu penodi Richard a Nigel i’r ddwy swydd bwysig yma. Mae ymgysylltu â'r cyhoedd yn hanfodol i'r Brifysgol. Rydym yn cydnabod y cyfraniad gwerthfawr mae ein cymunedau lleol a byd-eang yn eu gwneud i ddatblygu ein sefydliad, gan sicrhau bod ein hymchwil yn gwneud gwahaniaeth, bod ein polisïau yn addas at y diben a bod ein gwasanaethau yn diwallu eu hanghenion. Rydym yn ffodus fod enghreifftiau rhagorol o waith ymgysylltu arloesol iawn yn mynd rhagddo yma eisoes, ac rwy'n siŵr y bydd cyfoeth o brofiad Richard a Nigel mewn ymgysylltu â'r cyhoedd ac ymchwil yn ein cynorthwyo i adeiladu ar y mentrau hyn.”

Rhannu