Dathlu dwy flynedd o addysg nyrsio yn y Sioe Fawr
![Myfyrwyr nyrsio cyntaf erioed Prifysgol Aberystwyth yn dechrau ar eu hastudiaethau ym mis Medi 2022](/cy/hec/news/news-article/Myfyrwyr-Nyrsio-Cyntaf-2022-fach.jpg)
Myfyrwyr nyrsio cyntaf erioed Prifysgol Aberystwyth yn dechrau ar eu hastudiaethau ym mis Medi 2022
22 Gorffennaf 2024
Caiff dathliad o ddwy flynedd gyntaf addysg nyrsio ym Mhrifysgol Aberystwyth ei gynnal ar faes y Sioe Fawr heddiw (11:30yb, dydd Mawrth, 23 Gorffennaf).
Dechreuodd y garfan gyntaf o fyfyrwyr nyrsio ar eu hastudiaethau ym Mhrifysgol Aberystwyth ym mis Medi 2022.
Fel rhan o’r datblygiad, sefydlodd y Brifysgol ystafelloedd ymarfer clinigol o ansawdd uchel yn ei Chanolfan Addysg Gofal Iechyd newydd sydd gyferbyn ag Ysbyty Bronglais yn Aberystwyth. Cafodd y datblygiad gwerth £1.7 miliwn ei gefnogi gyda grant o £500,000 gan Lywodraeth Cymru.
Datblygwyd addysg nyrsio ym Mhrifysgol Aberystwyth gyda chefnogaeth nifer o bartneriaid, gan gynnwys byrddau iechyd Hywel Dda, Betsi Cadwaladr a Phowys yn ogystal â defnyddwyr gwasanaethau a gofalwyr.
Fe ddyfarnodd Addysg a Gwella Iechyd Cymru gytundeb i Brifysgol Aberystwyth hyfforddi nyrsys ar gyfer oedolion ac iechyd meddwl sydd wedi ei ariannu gan Lywodraeth Cymru.
Caiff y myfyrwyr sy’n astudio ar gyfer y graddau’r cyfle i ddilyn hyd at hanner eu cwrs drwy gyfrwng y Gymraeg.
Ymysg y siaradwyr yn y digwyddiad dathlu ar faes y Sioe fydd yr Ysgrifennydd Iechyd Eluned Morgan AS a Dr Chris Jones, Cadeirydd Addysg a Gwella Iechyd Cymru.
Dywedodd Ysgrifennydd y Cabinet dros Iechyd, Gofal Cymdeithasol a’r Gymraeg, Eluned Morgan:
“Mae’n bleser i glywed am lwyddiannau’r ddwy flynedd o addysg nyrsio yn Aberystwyth, ac mae’n arwydd o’n hymrwymiad i sicrhau bod addysg gofal iechyd o ansawdd uchel ar gael mewn cymunedau ar draws Cymru.
“Rwy’n gobeithio gweld yr holl raddedigion yn ymuno â’n gweithlu GIG dawnus fel nyrsys cofrestredig.
“Byddwn ni’n parhau i weithio gyda phrifysgolion Cymru, GIG Cymru a chyda gofal sylfaenol a chymunedol i sicrhau bod gennym ni’r gweithlu sy’n diwallu anghenion gofal iechyd Cymru nawr ac yn y dyfodol.”
Ychwanegodd Is-Ganghellor Prifysgol Aberystwyth yr Athro Jon Timmis:
“Hoffwn i longyfarch yr holl staff a myfyrwyr sydd wedi gweithio mor galed i wneud y ddwy flynedd gyntaf yn gymaint o lwyddiant. Mae’n ddarpariaeth newydd sy’n ehangu mynediad i lawer ac wedi’i theilwra at anghenion y Canolbarth a’r Gorllewin. Mae eisoes yn profi ei gwerth ac mae’n mynd i fod yn hwb o ran recriwtio a chadw staff yn y gwasanaeth iechyd yn lleol ac yn rhanbarthol. A, thrwy gynnig llawer iawn o’r hyfforddiant drwy gyfrwng y Gymraeg, bydd yn fuddiol i’r ddarpariaeth iaith yn ein gwasanaeth iechyd yn ogystal.
“Dros y blynyddoedd i ddod, ac wrth weithio gyda phartneriaid, rydym yn awyddus i gyfrannu mwy a mwy at gwrdd ag anghenion hyfforddi ein gwasanaeth iechyd. Mae’r Ganolfan Addysg Gofal Iechyd yn adnodd pwysig yn hyn o beth. Rydyn ni wrthi’n gosod sylfeini ar gyfer twf darpariaeth addysg gofal iechyd yma yn Aberystwyth ar gyfer y dyfodol.”
Bydd y fyfyrwraig Annie Evans yn ei blwyddyn gyntaf ar y cwrs yn siarad yn y digwyddiad. Dywedodd:
“Yn dod o gymuned glos cefn gwlad, mae’r cyfle i mi allu astudio yn fy nhref enedigol yn bwysig i mi. Mae’r cwrs yma wedi galluogi i mi aros yn agos at deulu a ffrindiau wrth i mi astudio. Mae astudio mewn ardal lle rwy'n gobeithio dilyn fy ngyrfa yn y dyfodol yn bwysig i mi am ei fod yn rhoi’r cyfle i mi gael lleoliadau dysgu lleol a fydd o fudd i mi yn y dyfodol.”
Ychwanegodd Beth Elliot, sydd yn ei hail flwyddyn ar y cwrs:
“Mae’r ffaith bod gradd nyrsio i’w chael yn Aberystwyth wedi caniatáu i mi ddod yn nyrs. Cyn nawr, byddai’n rhaid i mi fod wedi teithio cryn dipyn ac y byddai hynny wedi’i wneud yn anodd iawn i mi gan fod gen i deulu i ofalu amdano.”