Y Brif Gampfa

Y Gromen Chwaraeon

Mae cyfleuster hyfforddi newydd pwysig wedi agor ym Mhrifysgol Aberystwyth yn dilyn sefydlu cromen chwaraeon newydd ar Gampws Penglais. Yn cynrychioli buddsoddiad o dros £400,000, mae’r cyfleusterau newydd yn cynnig y cyfarpar cardio diweddaraf, ac offer cryfhau a chyflyru a gyflenwir gan Matrix Fitness. Mae cyfarpar arbenigol pellach gan Wattbike, SciFit, Concept, Rogue a Primal Strength yn darparu’r adnoddau gorau sydd ar y farchnad i’n defnyddwyr. Gall rhedwyr a beicwyr ddilyn llwybrau unrhyw le yn y byd drwy ddefnyddio technoleg rhithwir, a dringo rhai o adeiladau mwyaf eiconig y byd, gan gynnwys Tŵr Eiffel ac adeilad talaf y byd – Burj Khalifa.

Mae’r cyfleusterau newydd yn cynnig rhywbeth i bawb, o ddechreuwyr i athletwyr elît a selogion sydd wrth eu bodd yn cadw’n heini, i’r rhai sydd angen gwneud ymarfer corff i wella eu hiechyd.

Mae'r gwaith yn rhan o raglen uwchraddio a fydd yn y pen draw yn gweld yr holl offer yn cael ei bweru gan y defnyddwyr yn hytrach na’r prif gyflenwad trydan. Mae'r holl brofiad o ddefnyddio'r gampfa yn fwy cyfeillgar a chroesawgar, ac mae'r dechnoleg wedi’i chynllunio i wneud ymarfer corff yn fwy pleserus drwy ennyn diddordeb ein cwsmeriaid yn ogystal â’u hysbrydoli a’u herio. Mae'r cyfleusterau’n caniatáu i'n holl aelodau ymarfer mewn awyrgylch gwych, gyda’r cyfle i wneud ffrindiau, ymlacio a chyflawni eu holl amcanion iechyd a ffitrwydd.

Darperir sesiynau ymgyfarwyddo i’r rhai sydd am ddefnyddio'r Ganolfan Ffitrwydd (sydd yn para oddeutu 20/30 munud) ond nid yw'r rhain yn orfodol i bobl 16 oed a throsodd.

Mynediad ar gyfer Campfa Ieuenctid (14-16 oed) NODWCH Y NEWIDIADAU ISOD.

Bydd mynediad yn aros rhwng 3-5pm ar ddydd Mawrth a Dydd Gwener a rhwng 10am-12pm ar Ddydd Sadwrn a Dydd Sul. Bydd sesiynau cynefino yn cael eu cynnig ar ddydd Mawrth a dydd Gwener yn ystod yr amseroedd uchod, yn amodol ar nifer y mynychwyr. 

Mae'n rhaid i bob defnyddiwr o dan 16 oed gael prawf oedran wrth gofrestru ar gyfer aelodaeth. Ar ôl ei gymeradwyo, rhaid iddynt gadw copi o'u pasbort neu dystysgrif geni ar eu ffôn clyfar fel prawf oedran. Bydd angen iddynt hefyd gwblhau sesiwn ymgyfarwyddo ar gyfer y gampfa cyn y caniateir mynediad. 

Archebwch eich lle ar-lein neu ffoniwch ni ar 01970 62280.