Cymhellion ariannol ar gyfer ymarfer dysgu

Ystafell ddysgu ym Mhrifysgol Aberystwyth

Mae Cyfarwyddwr yr Ysgol Addysg ym Mhrifysgol Aberystwyth wedi croesawu cyhoeddiad Llywodraeth Cymru y bydd y cymhellion ariannol presennol ar gyfer hyfforddi athrawon yn cael eu hymestyn i'r flwyddyn academaidd 2019-20.

Wrth ymateb i benderfyniad y Gweinidog Addysg Kirsty Williams, dywedodd yr Athro Malcolm Thomas mai dyma’r amser delfrydol i ddechrau ar yrfa fel athro.

"Os ydych chi'n fyfyriwr sy'n graddio eleni neu eisoes yn gweithio ac yn ystyried newid gyrfa, ni fu erioed amser gwell i ystyried dysgu fel gyrfa, o gofio’r datblygiadau cyffrous sy'n digwydd yng Nghymru," meddai'r Athro Thomas.

"Nawr yw'r amser i hyfforddi ar gyfer cyflwyno'r cwricwlwm newydd arloesol yng Nghymru. Yma ym Mhrifysgol Aberystwyth, byddwn yn cynnig cyfle i fyfyrwyr addysgu y tu hwnt i ffiniau er mwyn cael profiad sy’n cwmpasu’r cynradd a’r uwchradd."

O Fedi 2019, bydd yr Ysgol Addysg ym Mhrifysgol Aberystwyth yn darparu Tystysgrif Addysg newydd i Raddedigion, gan gynnig dau lwybr tuag at Statws Addysgu Cymwysedig:

1. Tystysgrif Addysg i Raddedigion (TAR) Cynradd gydag Ategiad Uwchradd
   
   
2. TAR Uwchradd gydag Ategiad Cynradd

Bydd y cyrsiau, sydd ar gael yn Aberystwyth ar gyfer mynediad yn 2019, yn arloesol ac yn darparu'r sylfaen gywir o sgiliau i fyfyrwyr addysgu ar draws y sectorau cynradd ac uwchradd.

Bydd myfyrwyr sy'n dewis dilyn y cwrs TAR Cynradd yn cael profiad o addysgu mewn ysgol uwchradd, tra bydd y rhai sy'n dewis y TAR Uwchradd hefyd yn cael profiad o addysgu disgyblion mewn ysgolion cynradd.

Ychwanegodd yr Athro Thomas: "Mae cyhoeddiad Llywodraeth Cymru am gymhellion ariannol estynedig ar gyfer mynediad 2019-20 a'r eglurhad diweddar o ofynion mynediad TGAU yn rhoi gwell cyfleoedd a chefnogaeth i fyfyrwyr ystyried hyfforddi fel athrawon."

Mae'r newidiadau i'r gofynion mynediad TGAU ar gyfer ymgeiswyr TAR, er mwyn cefnogi fframwaith llythrennedd a rhifedd Llywodraeth Cymru, yn golygu bod yn rhaid i fyfyrwyr fod wedi cyrraedd safon cyfwerth â gradd B mewn o leiaf un o'r arholiadau TGAU canlynol:

• Saesneg Iaith
  
  
• Llenyddiaeth Saesneg
  
  
• Cymraeg Iaith (iaith gyntaf)
  
  
• Llenyddiaeth Cymraeg

Lle mae gan ymgeisydd gymhwyster cyfwerth â gradd B mewn naill ai Llenyddiaeth Saesneg neu Lenyddiaeth Gymraeg, rhaid ennill o leiaf gradd C yn yr arholiad TGAU cyfatebol yn  Saesneg neu Gymraeg Iaith (gyntaf). Rhaid hefyd cael gradd B yn yr arholiad TGAU ar gyfer Mathemateg neu Fathemateg-Rhifedd.

Mae'r cymhellion ariannol sydd ar gael i ôl-raddedigion sy'n dechrau Hyfforddiant Cychwynnol Athrawon yn 2019-20 yn anelu at ddenu'r graddedigion gorau i ddysgu pynciau sy’n flaenoriaeth fel mathemateg, cemeg, ffiseg, cyfrifiadureg ac ieithoedd tramor modern.

Bydd Iaith Athrawon Yfory, y cynllun cymhelliant sy'n cynnig hyd at £5,000 i hyfforddi i fod yn athro addysg uwchradd yn Gymraeg, hefyd yn parhau yn 2019-20. Gall Iaith Athrawon Yfory gael ei ddefnyddio ochr yn ochr â'r cymhellion ar gyfer pynciau â blaenoriaeth sy'n creu cymhelliant hyd at uchafswm o £25,000.

Mae'r arian ar gael ar gyfer myfyrwyr graddedig ar gyrsiau Addysg Gychwynnol Athrawon (AGA) yn y pynciau canlynol:

• Hyd at £20,000 ar gyfer mathemateg, ffiseg, cemeg, Cymraeg neu gyfrifiadureg
  
  
• Hyd at £15,000 ar gyfer ieithoedd tramor modern
  
  
• £3,000 i raddedigion sydd â gradd dosbarth cyntaf neu radd meistr neu ddoethuriaeth i addysgu pob un o'r prif bynciau eraill yn y sector uwchradd a’r sector cynradd
  
  
• £3,000 atodol i raddedigion sydd â gradd dosbarth cyntaf, Meistr neu PhD sy'n ymgymryd ag astudiaethau TAR cynradd sydd ag arbenigedd pwnc mewn Cymraeg, Saesneg, mathemateg neu wyddoniaeth.

Mae'r cymhellion uchaf eu gwerth ar gael i raddedigion sy'n astudio cwrs Addysg Gychwynnol Athrawon yn y meysydd â blaenoriaeth ac sydd â gradd dosbarth cyntaf neu radd meistr neu ddoethuriaeth. Mae cymhellion eraill ar gael i raddedigion â graddau 2:1 a 2:2.

I gael rhagor o wybodaeth am y cwrs TAR ym Mhrifysgol Aberystwyth, cysylltwch gyda’r Ysgol Addysg ar 01970 622103 neu www.aber.ac.uk/addysg.

Rhannu