Ysgolhaig o’r Brifysgol Haf yn cael ei benodi i bwyllgor Iechyd

Jarrod Thomas yn derbyn ei dystysgrif gradd Prifysgol Haf Aberystwyth gan Kirsty Williams AC, Ysgrifennydd Cabinet Llywodraeth Cymru dros Addysg, Awst 2017

Mae myfyriwr chweched dosbarth a gwblhaodd Brifysgol Haf Prifysgol Aberystwyth yn 2017 wedi cael ei benodi’n aelod o’i Gyngor Iechyd Cymunedol lleol.

Mae Jarrod Thomas bellach yn aelod llawn o Gyngor Iechyd Cymunedol Abertawe Bro Morgannwg a bydd yn gwasanaethu ar bwyllgor Castell Nedd Port Talbot.

Ar hyn o bryd mae’n sefyll ei arholiadau lefel A yng Ngrŵp Colegau NPTC yng Nghastell Nedd cyn cymryd ei le i astudio BSc mewn Biocemeg ym Mhrifysgol Aberystwyth ym mis Medi 2018.

Roedd Jarrod yn un o 85 o fyfyrwyr a ddilynodd gwrs chwe wythnos y Brifysgol Haf yn Aberystwyth yn 2017.

“Bu’r Brifysgol Haf yn allweddol i ddangos y ffin rhwng agweddau cymdeithasol a hwyliog y Brifysgol, a phwrpas bod yn y Brifysgol – sef i gael addysg,” meddai Jarrod.

“Caniataodd y cyfle i mi gwrdd â llawer o wahanol bobl a meithrin sawl cyfeillgarwch, a allai bara am oes, a chreu nifer o rwydweithiau. Rwy’n teimlo bod y rhaglen wedi fy mharatoi ar gyfer dysgu gydol oes gan roi profiad (cipolwg) cynnar bron o Addysg Uwch ym Mhrifysgol Aberystwyth.”

Dywedodd Dr Debra Croft, Rheolwr y Ganolfan Ehangu Cyfranogiad a Chynhwysiant Cymdeithasol yn Aberystwyth: “Roedd yn amlwg bod Jarrod yn fyfyriwr disglair pan dreuliodd yr haf gyda ni yn 2017 ar ein rhaglen breswyl chwe wythnos. Mae myfyrwyr yn dod i Brifysgol Haf Aberystwyth am amrywiaeth eang o resymau, ac fe welsom Jarrod yn magu hyder a hunangred dros y chwe wythnos. Ym mis Ionawr 2018, safodd arholiadau Ysgoloriaeth y Brifysgol yn llwyddiannus ac ar ben hynny ennillodd Fwrsariaeth Rashid Domingo i fyfyriwr Cymraeg ym maes y gwyddorau naturiol. Rydym yn edrych ymlaen at ei groesawu yn ôl i Aberystwyth yn yr hydref.”

Beth yw’r Brifysgol Haf?

Bellach yn ei 18^fed flwyddyn, mae Prifysgol Haf Aberystwyth yn rhoi cyfle i fyfyrwyr o ardaloedd mwy difreintiedig yng Nghymru i brofi bywyd ar y campws.  

Yn ystod eu harhosiad preswyl chwe wythnos, gall myfyrwyr ddewis o blith ystod o fodiwlau academaidd dewisol yn ogystal â dilyn rhaglen lawn o weithgareddau cymdeithasol a chwaraeon. 

Mae’r holl leoedd ar gyfer y Brifysgol Haf yn Aberystwyth wedi’u llenwi am eleni, ond gallwch gael rhagor o wybodaeth am y rhaglen ar ein gwefan. Am wybodaeth am sut i wneud cais yn y dyfodol, gweler:
https://www.aber.ac.uk/cy/widening-participation/schoolscolleges/summer-uni/

Ynglŷn â Chynghorau Iechyd Cymunedol

Penodir aelodau’r saith Cyngor Iechyd Cymunedol yng Nghymru gan Lywodraeth Cymru.

Maent yn gyfrifol am gynrychioli buddiannau cleifion a’r cyhoedd yn annibynnol a diduedd er mwyn dylanwadu ar y ffordd y caiff Gwasanaethau Iechyd Cenedlaethol eu cynllunio a’u darparu yng Nghymru, a gwella hyn.

Gwirfoddolwyr lleol yw aelodau’r Cynghorau, sy’n gweithredu fel llygaid a chlustiau cleifion a’r cyhoedd, gan ymweld ag ysbytai, gwrando ar bryderon cleifion a gweithio gyda’r gwasanaeth iechyd i wella ansawdd gofal cleifion.

AU25718

Rhannu