Prifysgol Aberystwyth ar bum restr fer ar gyfer gwobrau What Uni

Mae Prifysgol Aberystwyth wedi ei chynnwys ar restr fer Prifysgol y Flwyddyn, Llety, Cyrsiau a Darlithwyr, Rhyngwladol ac Ôl-raddedi.yng ngwobrau dewis myfyrwyr What Uni Student Choice Awards 2017.

Yn dilyn perfformiad rhagorol yn Arolwg Cenedlaethol Myfyrwyr 2016, mae Prifysgol Aberystwyth wedi ei chynnwys ar restr fer Prifysgol y Flwyddyn yng ngwobrau dewis myfyrwyr What Uni Student Choice Awards 2017.

Cafodd y rhestrau byr eu cyhoeddi gan WhatUni.com heddiw ddydd Gwener 3 Mawrth ac mae Prifysgol Aberystwyth hefyd wedi ei chynnwys ar y rhestr fer yn y categorïau Llety, Cyrsiau a Darlithwyr, Rhyngwladol acÔl-raddedig.

Mae'r tablau cynghrair myfyrwyr Whatuni wedi eu seilio ar filoedd o adolygiadau a gyflwynwyd gan fyfyrwyr ac a gyhoeddwyd ar Whatuni.com.

Maent yn cwmpasu Llety, Bywyd y Ddinas, Clybiau a Chymdeithasau, Cyrsiau & Darlithwyr, Rhagolygon Swyddi, Adnoddau Prifysgol, Gwasanaethau Cymorth, sgôr cyffredinol 'Prifysgol y Flwyddyn', a Rhyngwladol.

Ac eleni am y tro cyntaf cyflwynwyd dau gategori newydd, Ôl-raddedig a Rhoi yn Ôl.

Mae cynnwys Aberystwyth yn y categorïau 'Rhyngwladol' ac 'Ôl-raddedig' yn adlewyrchu bodlonrwydd myfyrwyr rhyngwladol ac ôl-raddedig yn gyffredinol.

Mae'r rhestrau yn ystyried barn dros 27,000 o fyfyrwyr mewn 130 o brifysgolion.

Eleni cyrhaeddodd 127 o brifysgolion y trothwy gofynnol ar gyfer cael eu hystyried ar gyfer Gwobr Dewis Myfyrwyr.

Dywedodd Is-Ganghellor Dros Dro Prifysgol Aberystwyth, Yr Athro John Grattan: “Rydym yn falch iawn o fod wedi cael ein cynnwys ar y rhestr fer am bum gwobr Whatuni, mae hyn yn tanlinellu unwaith yn rhagor bod Aberystwyth yn lle eithriadol i ddysgu a byw. Mae myfyrwyr wrth wraidd popeth a wnawn yma ym Mhrifysgol Aberystwyth fel y dangoswyd gyda chanlyniadau rhagorol Arolwg Myfyrwyr Cenedlaethol 2016 â’n gosododd yn gyntaf yng Nghymru am foddhad cyffredinol myfyrwyr, a'r bedwaredd brifysgol eang ei darpariaeth yn y DU. Rydym yn parhau i fuddsoddi yn y profiad myfyriwr yma ac mae'n braf iawn gweld hyn yn cael ei gydnabod gan ein myfyrwyr.”

Yn ddiweddar, cwblhaodd Prifysgol Aberystwyth rhaglen foderneiddio gynhwysfawr gwerth £8.5m o fannau dysgu ac addysgu, ac agorodd Fferm Penglais, ei phreswylfeydd myfyrwyr newydd gwerth £45m y dyfarnwyd sgôr llety 5* iddi gan Croeso Cymru ym mis Tachwedd 2016.

Dywedodd Marcella Collins, Rheolwr Gyfarwyddwr y DU Grŵp Hotcourses, rhiant-gwmni Whatuni.com: “Un o'r beirniadaethau mwyaf cyffredin a glywn gan fyfyrwyr yw ei bod yn rhy anodd iddynt lywio’i ffordd drwy dirwedd Addysg Uwch, ac felly dyma sydd bellach yn ein gyrru.  Rydym yn cyflwyno data hanfodol i fyfyrwyr mewn ffordd sy'n hawdd iddynt ei ddeall ac yn eu cynorthwyo i wneud penderfyniadau addysgiadol sydd yn trawsnewid eu bywydau.”

Bydd tablau cynghrair Whatuni 2017 yn cael eu cyhoeddi ar y 6ed o Ebrill mewn seremoni yn Llundain. Gallwch ddilyn holl ddatblygiadau’r noson drwy’r hashnod #WUSCA.

Rhannu