Cymeradwyo Cynllun Ffioedd

Myfyrwyr Prifysgol Aberystwyth

Mae Prifysgol Aberystwyth wedi croesawu cyhoeddiad Cyngor Cyllido Addysg Uwch Cymru heddiw bod ei chynllun ffioedd ar gyfer 2012/2013 wedi cael ei gymeradwyo.

Meddai yr Athro Noel Lloyd, Is-Ganghellor Prifysgol Aberystwyth:
“Rwy’n croesawu’r ffaith bod y Cyngor Cyllido wedi derbyn cynllun ffioedd Prifysgol Aberystwyth. Mae’r cynllun yn cwmpasu nifer o fentrau pwysig a fydd yn sicrhau bod profiad y myfyriwr ym Mhrifysgol Aberystwyth yn cael ei gyfoethogi ymhellach a bod pawb a allai fod yn elwa o Addysg Uwch yn cael eu galluogi i wneud hynny.”

“Mae Prifysgol Aberystwyth yn ymrwymedig i ehangu cyfleoedd i’w holl fyfyrwyr, i gyfrannu at gyfiawnder cymdeithasol ac i fod yn gallu cynnig pecyn cymorth cadarn sy’n sicrhau bod ein myfyrwyr yn derbyn cefnogaeth ar bob cam o’u hastudiaethau hyd at raddio.”

“Nod y Brifysgol yw cynhyrchu myfyrwyr sydd â’r amrediad sgiliau sydd eu hangen ar gyfer y byd gwaith, cynnig iddynt gyfleusterau dysgu ac addysgu ardderchog, ac i’w hastudiaethau fod yn cael eu harwain gan staff sy’n rhan o ymchwil o safon byd.”

Yn unol â’r Cynllun Ffioedd, bydd Prifysgol Aberystwyth yn:

• Buddsoddi £1m mewn cynllun bwrsariaeth prawf modd er mwyn darparu cefnogaeth ariannol i fyfyrwyr o gefndir incwm isel.  Bydd oddeutu 1,250 o fyfyrwyr fydd yn cyrraedd Aberystwyth ym Medi 2012 yn elwa o hyn.

• Darparu llefydd ym Mhrifysgol Haf Aberystwyth i oddeutu 80 o bobl ifanc o ardaloedd ble, yn draddodiadol, mae’r nifer sy’n mynychu prifysgolion yn isel.

• Gwella’r gefnogaeth ar gyfer myfyrwyr ag anableddau.

• Buddsoddi yng nghynllun mentora cymheiriaid ar gyfer myfyrwyr y Brifysgol ac yn yr adnoddau technegol er mwyn cefnogi dysgu’n hyblyg.

• Parhau’r buddsoddiadau mewn cyfalaf er mwyn sicrhau bod myfyrwyr yn ennill o’r amgylchedd dysgu ardderchog.

• Datblygu gweithgareddau a fydd yn gwella cyflogadwyedd myfyrwyr gan ddatblygu cynllun gwobrwyo a fydd yn cydnabod gweithgareddau allgyrsiol a darparu mwy o gyfleoedd hyfforddiant gyda busnes a diwydiant.

• Datblygu 'Grŵp myfyrwyr sy'n dysgu â chymorth technoleg' a fydd yn fforwm ar gyfer adborth gan fyfyrwyr ar wasanaethau’r Brifysgol a chynorthwyo ein hadran Gwasanaethau Gwybodaeth wrth brofi technoleg dysgu newydd.

Bydd Cynllun Ffioedd llawn Prifysgol Aberystwyth ar gael ar-lein ar http://www.aber.ac.uk/cy/university/student-fees/ yn fuan.

Rhannu