Canolfan Materion Cyfreithiol Cymreig
![Carwyn Jones AC yn anerch cynfyfyrwyr Aberystwyth ar faes yr Eisteddfod Genedlaethol eleni yng Nghaerdydd.](/cy/news/archive/2008/october/au17308.jpg)
Carwyn Jones AC yn anerch cynfyfyrwyr Aberystwyth ar faes yr Eisteddfod Genedlaethol eleni yng Nghaerdydd.
20 Hydref 2008
Darlith Gyhoeddus Canolfan Materion Cyfreithiol Cymreig
“Getting the Devolution Dividend: Challenges for Wales in the Next Ten Years”
Bydd Carwyn Jones AC, Cwnsler Cyffredinol ac Arweinydd Cynulliad Cenedlaethol Cymru, yn traddodi Darlith Gyhoeddus yn y Ganolfan Materion Cyfreithiol Cymreig, nos Fercher 29 Hydref.
“Getting the Devolution Dividend: Challenges for Wales in the Next Ten Years” fydd pwnc ei ddarlith. Caiff ei chynnal yn theatr ddarlithio A12 Adeilad Hugh Owen, ar gampws Penglais Prifysgol Aberystwyth am 7 yr hwyr.
Derbyniodd Carwyn Jones radd yn y Gyfraith o Brifysgol Aberystwyth a chafodd ei ethol yn Aelod Cynulliad dros Ben y Bont ar Ogwr yn 1999. Wedi iddo raddio bu'n astudio yn Ysgol y Gyfraith yn Ysbytai'r Frawdlys yn Llundain ac yna bu’n gweithio fel bargyfreithiwr, yn bennaf mewn llysoedd troseddol a theulu, mewn practis preifat tan iddo gael ei ethol.
Mae’n aelod o Gabinet y Cynulliad Cenedlaethol ers 7 mlynedd, yn gyntaf fel Gweinidog Materion Gwledig, ac yna fel Gweinidog dros yr Amgylchedd, Cynllunio a Chefn Gwlad. Cafodd ei benodi i’w swydd bresennol yn dilyn etholiadau’r Cynulliad Cenedlaethol yn 2007.
Trefnir y ddarlith gan y Ganolfan Materion Cyfreithiol Cymreig sydd yn rhan o Adran y Gyfraith a Throseddeg ym Mhrifysgol Aberystwyth.
Lansiwyd y Ganolfan Materion Cyfreithiol Cymreig ym mis Ionawr 1999 er mwyn atgyfnerthu arbenigedd a gwaith Adran y Gyfraith ar y gyfraith a’r modd y mae’n cael ei chymhwyso o fewn Cymru, ac ar ddatblygiadau cyfreithiol cyffredinol sydd yn berthnasol i Gymru, ac i greu canolbwynt i’r gwaith hwn.
Un o brif amcanion y Ganolfan yw ystyried a oes persbectif penodol Cymreig i gwestiynau cyfreithiol cyffredinol o fewn cyfundrefn cyfraith gyffredin Lloegr a Chymru, a sicrhau fod datblygiadau cyfreithiol Cymreig yn cael eu gosod o fewn cyd-destun ehangach ar lefelau y Deyrnas Gyfunol, Ewrop ac yn rhyngwladol.
Nid cwestiwn sydd yn ymwneud â Chymru yn unig yw datganoli: mae’n bwnc byw yn yr Alban, Gogledd Iwerddon, Llundain, a rhanbarthau Lloegr ac mewn llawer rhan arall yn Ewrop. Mae’r Ganolfan yn cydweithio gyda sefydliadau eraill ar draws y Deyrnas Gyfunol a thu hwnt er mwyn ystyried datblygiadau cyfreithiol o fewn tiriogaethau datganoledig eraill drwy gynnal astudiaethau cymharol .
Ceir gwybodaeth bellach am waith y Ganolfan Materion Cyfreithiol Cymreig ar y wefan http://www.aber.ac.uk/cwla/index.htm.