Darganfod Problemau Defnyddioldeb Mawr yn Awtomatig ar Safleoedd e-Fasnach Drwy Ddysgu Peirianyddol

Daeth y dull gweithredu ar draws llawer o broblemau defnyddioldeb a fyddai wedi gallu colli refeniw sylweddol i safleoedd e-Fasnach. Mewn un achos, canfuwyd anghysondeb ar wefan cwsmer lle’r oedd y botwm prynu yn cael ei bwyso nifer o weithiau, gan effeithio ar hyd at 40% o drafodion posibl. Nid oedd profion system blaenorol na dadansoddwyr dynol wedi llwyddo i ddarganfod y byg cyn hynny, a byddai wedi costio miliynau pe bai’n dal yn weithredol yn ystod tymor masnachu Dydd Gwener Du. Enghraifft arall oedd stoc yn cael ei adrodd yn anghywir ar y wefan, gan atal cwsmeriaid rhag cwblhau eu pryniannau, a hynny’n gyfystyr â chyfle refeniw blynyddol, wedi’i amcangyfrif, o bron i $1.5m. Dro arall, nid oedd cwsmeriaid yn gallu talu pan oedd un o’r eitemau yn eu basgedi wedi gwerthu allan, gan arwain at droi cefn ar y pryniant cyfan. Amcangyfrifwyd bod trwsio’r broblem hon wedi arbed bron i £1m y flwyddyn.

Amcangyfrifwyd hefyd fod cyfanswm refeniw blynyddol dichonol yr achosion hyn yn unig yn $86.2m. Mae’r dechnoleg dysgu peirianyddol yn cael ei defnyddio i gofnodi, dadansoddi a rhannu dros 2.5 biliwn o sesiynau defnyddwyr y mis, tasg a fyddai’n amhosibl â llaw. Mae’r problemau a amlygwyd gan y gwaith dadansoddi yn cynnwys problemau defnyddioldeb, problemau technegol a gweithgarwch twyllodrus, sy’n brawf o natur amrywiol a chymhleth y materion y mae modd eu canfod.

Mae dysgu peirianyddol yn ganolog i gynnyrch diweddaraf UserReplay, sy’n gwneud gwaith dadansoddi ac ailchwarae sesiynau ar gyfer apiau siopa symudol. Mae hyn yn defnyddio’r datblygiadau cloddio data sy’n cael eu disgrifio uchod, a’r adnoddau ychwanegol ynghlwm wrthyn nhw. Mae’r dechnoleg heddiw yn cael ei defnyddio gan o leiaf 22 o gwmnïau ledled y byd, gan gynnwys rhai o gwmnïau’r Fortune 500 yn yr Unol Daleithiau. Yn ogystal â’r buddiannau masnachol sylweddol y mae’r ymchwil wedi’u rhoi i gleientiaid UserReplay, mae’r cwsmeriaid cyffredinol hefyd yn cael profiad gwell wrth ddefnyddio’r gwefannau e-Fasnach.

Cafodd patent ei ffeilio gan UserReplay yn manylu ar y dull uchod, ynghyd ag estyniad a oedd yn defnyddio rhwydweithiau niwral i gynorthwyo rhagfynegiad. Yn sgil y gwaith ymchwil a datblygu llwyddiannus a gynhaliwyd gyda Phrifysgol Aberystwyth, mae’r cwmni wedi canolbwyntio mwy ar gloddio data a dysgu peirianyddol, gan recriwtio arbenigwyr dysgu peirianyddol amser llawn.