Datblygu Hyfforddiant Ymwybyddiaeth Ofalgar i Weision Cyhoeddus yng Nghymru

Mae’r MBBI wedi dod yn elfen graidd o Raglen Newid Mewnol y Gwasanaeth Sifil yng Nghymru. Drwy’r rhaglen hon, mae’r MBBI wedi’i chyflwyno i oddeutu 200 o weision sifil ac wedi ailgyfeirio mentrau datblygu staff eraill. Mae’r MBBI wedi’i defnyddio i gefnogi ymgyrch ‘Dewch i Drafod Parch’ Ysgrifennydd Parhaol Gwasanaeth Sifil Cymru. Yn ogystal, cyflwynwyd fersiynau wedi’u haddasu o’r rhaglen MBBI i staff Llywodraeth Cymru i’w cefnogi drwy argyfwng Covid-19.

Roedd y rhaglen yn gyfrifol am newid y ffordd roedd rhai uwch weision sifil yn ymwneud ag eraill ac yn eu gwneud yn fwy abl i fynd i’r afael â’r rhwystrau emosiynol i newid ymddygiad sy’n bodoli mewn sefydliadau mawr. Roedd hyn yn cefnogi’n uniongyrchol drefn weithredu’r arferion cydweithredol a thrawsnewidiol sy’n ofynnol yn Neddf Llesiant Cenedlaethau’r Dyfodol.

Cefnogodd y rhaglen ddatblygiad cydweithredol strategaeth genedlaethol Cymru Iachach yn uniongyrchol. Defnyddiodd Is-adran Dyfodol Tecach Llywodraeth Cymru wersi o’r rhaglen hefyd wrth ddatblygu a chyflwyno Deddf Llesiant Cenedlaethau’r Dyfodol.

Mae Deddf Llesiant Cenedlaethau’r Dyfodol (2015) yn gosod gofyniad deddfwriaethol ar gyrff cyhoeddus yng Nghymru i weithio mewn ffyrdd mwy cydweithredol i ganfod atebion i broblemau parhaus. Mae’r Ddeddf yn her sylweddol i arferion gwaith Gwasanaethau Cyhoeddus Cymru. Mae’r rhaglen MBBI wedi hwyluso gwell arferion gwaith o fewn Gwasanaeth Sifil Cymru, sydd wedi galluogi gwireddu’r Pum Ffordd o Weithio a ragwelwyd yn y Ddeddf