Dadansoddi Delweddau Meddygol: Gwella Deilliannau Cleifion

Mae data MRI/PET wedi’i ddefnyddio’n bennaf ar gyfer ymchwil y fron/prostad. Fe wnaeth grŵp ymchwil GGD ehangu i faes segmentu’r ymennydd, gyda phwyslais ar segmentu briwiau Sglerosis Ymledol (MS). Ar yr un pryd, bu’r grŵp yn cydweithio gyda Phrifysgol Girona, fel y prif gyfrannwr at ddau brosiect MS arwyddocaol gyda phwyslais ar friwiau. Arweiniodd y prosiectau hyn at dechnegau cyn-brosesu newydd, a sefydlwyd gan grŵp ymchwil GGD, gan gyfrannu’n uniongyrchol at greu Tensormedical, cwmni meddygol sy’n darparu dadansoddiad o friwiau mewn amgylcheddau clinigol. Mae hyn nid yn unig yn helpu arbenigwyr clinigol ond hefyd yn cyfrannu’n uniongyrchol at les cleifion. I gydnabod y gwaith ymchwil hwn, mae grŵp ymchwil GGD wedi cael grantiau sylweddol i’w ymestyn i ymdrin â phroblemau adsefydlu cleifion strôc gan GIG Cymru ac Ymchwil Iechyd a Gofal Cymru.

Datganiad grŵp Dadansoddi Endometriosis Dwfn Rhynwgadol (IDEA) yw’r consensws rhyngwladol cyntaf ar gyfundrefn enwi a mesuriadau ym maes delweddu endometriosis. Mae methodolegau a ddatblygwyd gan grŵp ymchwil GGD wedi’u cynnwys fel camau sonograffig ar gyfer diagnosis endometriosis. Fe’u cyhoeddwyd fel barn gonsensws gan y Grŵp Consensws Dadansoddi Endometriosis Dwfn Rhyngwladol, gan effeithio’n sylweddol ar ymarfer clinigol y cyflwr. Mae methodolegau’n cynnwys System Camau Endometriosis Seiliedig ar Uwchsain (UBESS) cyn llawdriniaeth i ragfynegi lefel cymhlethdod llawdriniaeth laparosgopig ar gyfer endometriosis, a datblygu a gwerthuso technegau Sonograffeg Trawsewiniol (TVS) ar gyfer adnabod a rheoli endometriosis. Mae’r ymchwil hefyd wedi darparu tystiolaeth sylfaenol ar gyfer canllaw y Sefydliad Cenedlaethol dros Ragoriaeth mewn Iechyd a Gofal (NICE) ar safon defnyddio delweddu uwchsain fel offer cost-effeithiol ar gyfer endometriosis.

Mae ymchwil ar dechnegau segmentu wrth ddadansoddi delweddau meddygol wedi’i ddefnyddio’n helaeth wrth ddatblygu technegau diagnosis â chymorth cyfrifiadur (CAD). Dros y blynyddoedd, mae hyn wedi rhoi pwyslais cryf ar gymwysiadau mamograffeg a phrostad, lle’r oedd y technegau segmentu yn ffurfio’r cam cyn-brosesu hanfodol cyn bod gwaith dadansoddi/dosbarthu pellach ac argymhelliad clinigol yn bosibl. Mae camau rhag-brosesu o’r fath yn caniatáu sefydlu mecanweithiau newydd sy’n gallu manteisio ar natur topoleg gwead a dwyster data delwedd. Mae’r gwaith ymchwil hwn wedi arwain at gydweithio academaidd helaeth â grwpiau ymchwil rhyngwladol gan gynnwys Prifysgol Girona, Prifysgol Pennsylvania a Phrifysgol Fetropolitan Manceinion, ac wedi elwa o ganlyniad iddo. Yr effaith bennaf yn y maes hwn fu trosi technegau dadansoddi delweddau mamograffeg i ddefnydd amrywiol yn y sector masnachol. Enghreifftiau nodweddiadol o hyn yw’r offer segmentu orthopedig a ddatblygwyd yn Synopsys, cwmni meddalwedd mawr, a’r meddalwedd dadansoddi tomograffeg cyfrifiadurol yr iau a ddatblygwyd yn Toshiba Medical Systems, sy’n cael eu defnyddio’n helaeth yn y maes clinigol. Mae’r offer masnachol hyn yn cyfrannu’n sylweddol at adrodd clinigol a gwella deilliannau cleifion.

Mae’r gwaith retinâu gwreiddiol yn seiliedig ar ymchwil Retinex a ddatblygwyd o fewn grŵp ymchwil GGD. Drwy ddefnyddio hidlwyr cymesur 2-D/3-D newydd, mae’r broses o ganfod strwythurau fasgwlaidd a strwythurau eraill yn cael ei awtomeiddio, gan wella’r ddealltwriaeth o fecanwaith, diagnosis a thriniaeth llawer o batholegau fasgwlaidd.

Mae’r gwaith ymchwil hwn wedi’i gynnal mewn cydweithrediad agos â grŵp o ddefnyddwyr terfynol clinigol sy’n mynd i’r afael ag ystod o heriau clinigol penodol i’r retina, sy’n cynnwys briwiau a segmentu/dosbarthiad fasgwlaidd.

Mae’r gwaith ar ddelweddau o’r retina wedi’i seilio’n uniongyrchol ar ein hymchwiliad cynharach i strwythurau llinol mewn delweddau meddygol. Mae ymgorffori segmentiad awtomataidd ar gyfer natur drofaus ffibrau nerfau’r cornbilen wedi darparu dull cyson o asesu clefyd llygaid sych a niwropatheg ddiabetig. Ar yr un pryd, mae wedi cyflymu amser prosesu cleifion yn ôl cyfnod yn sylweddol, gan gynyddu nifer y cleifion sy’n cael eu trin o 10%. O ran un ysbyty (Peking University Third Hospital), mae wedi golygu bod modd asesu a thrin 200 yn fwy o gleifion bob blwyddyn, gydag effeithiau tebyg yn Ysbyty Athrofaol Brenhinol Lerpwl. Arweiniodd hyn hefyd at ddatblygiad diweddar gyda Bwrdd Iechyd Prifysgol Hywel Dda, lle mae modd cysylltu sganiau o’r retina â chlefydau niwrolegol ac iechyd meddwl