Ail-Gyflwyno Arferion Gwneud Printiau Angof o’r 20fed Ganrif

Mae prosiectau Dr Heuser a’r Athro Meyrick ar gyfer Academi Frenhinol y Celfyddydau wedi cynorthwyo sefydliad mawr i gyflawni ei genhadaeth i gyflwyno cynulleidfaoedd newydd i gelf ac artistiaid. Yn ei thro, mae’r Academi Frenhinol a lleoliadau teithiau rhanbarthol wedi buddsoddi adnoddau sylweddol i gefnogi canfyddiadau Dr Heuser a’r Athro Meyrick. Mae eu harddangosfeydd yn yr Academi Frenhinol wedi denu bron i £100,000 o nawdd corfforaethol.

Mae ffigurau mynychu ar gyfer yr arddangosfeydd ymhlith yr uchaf sydd wedi eu cofnodi ar gyfer arddangosfeydd Ystafell Tennant yr Academi Frenhinol, ac mae cofnodion ymwelwyr yn tystio i’w hapêl a’u hatyniad. Soniwyd am An Abiding Standard: The Prints of Stanley Anderson fel digwyddiad dychrynllyd o amserol ac fel darganfyddiad bendigedig o waith artist y mae ei fyd-olwg yn dal yn berthnasol heddiw. Yn yr un modd, croesawyd yr arddangosfa ar brintiau Charles Tunnicliffe fel agoriad llygad a oedd yn cynnig llawer i’w ddysgu yn ogystal â’i weld. Roedd y sgyrsiau gan guraduron a’r darlithoedd amser cinio a oedd yn cyd-fynd â’r arddangosfeydd yn gynyddol boblogaidd hefyd. Llwyddodd eu cyflwyniadau fideo ar wefan yr Academi Frenhinol, Vimeo a Twitter i gyrraedd mwy o’r cyhoedd a hybu’r diddordeb.

Roedd yr arddangosfeydd ymhlith y tair sioe ‘rhaid eu gweld’ yn y DU (The Telegraph), ymhlith y pethau gorau i’w gweld, eu gwneud neu eu harchebu (Country Life) ac yn un o bigion celfyddydol yr wythnos (London Evening Standard). Denwyd cynulleidfaoedd â diddordeb mewn bywyd gwyllt ym Mhrydain (Tunnicliffe), hanes pensaernïol a hanes cymdeithasol (Anderson) yn ogystal â dulliau ffermio a chrefftau traddodiadol, gydag adolygiadau’n ymddangos mewn cyfnodolion amrywiol fel The Mayfair Times a’r Regional Furniture Society.

Mae catalogau cyflawn Dr Heuser a’r Athro Meyrick bellach yn brif ffynhonnell gyfeirio ar gyfer curaduron a chasglwyr preifat, gwerthwyr ac arwerthwyr, addysgwyr a’r cyhoedd. Maen nhw’n cael eu cadw gan yr Amgueddfa Brydeinig, Oriel Gelf Christchurch, Llyfrgell Gyhoeddus Efrog Newydd, Llyfrgell Gyhoeddus Chicago, Princeton, Rijksmuseum, Smithsonian a Chanolfan Celf Brydeinig Yale. Mae’n arfer bellach i guraduron, ystafelloedd arwerthu a gwerthwyr gyfeirio at rifau catalog ‘Heuser-Meyrick’.

Mae ymholiadau gan gasglwyr, gwerthwyr cenedlaethol a rhyngwladol, arwerthwyr, y cyfryngau a’r cyhoedd yn dangos ffydd yn arbenigedd Dr Heuser a’r Athro Meyrick. Arweiniodd ymchwil Dr Heuser ar George Powell at gyfranogiad rhanbarthol ym mhrosiect ArtUK, Sculpture Near You, sgyrsiau â grwpiau cymunedol a pherfformiad gwadd LHDTC+. Diolch i waith ymchwil yr Athro Meyrick ar Hugh Blaker, llwyddodd curaduron y Louvre i sicrhau dogfennau tarddiad ar gyfer paentiad sydd bellach wedi’i nodi fel gwaith gan Georges de la Tour.