Prifysgol Aberystwyth yn trafod buddugoliaeth Trump
![](/cy/news/archive/2016/11/trump_cym-400x210.jpg)
21 Tachwedd 2016
Bydd buddugoliaeth Donald Trump yn etholiad arlywyddol yr Unol Daleithiau yn cael ei dadansoddi mewn trafodaeth ford gron arbennig ym Mhrifysgol Aberystwyth nos Fawrth 29 Tachwedd.
Trefnir y noson gan yr Adran Gwleidyddiaeth Ryngwladol a Sefydliad Coffa David Davies, a bydd panel o arbenigwyr yn trafod canlyniadau'r etholiad, yn codi cwestiynau ac yn taflu ychydig oleuni ar drefn newydd y byd.
Pennaeth yr Adran a deiliad Cadair E H Carr, yr Athro Richard Beardsworth, fydd yn cadeirio, ac aelodau’r panel fydd:
• Yr Athro Ken Booth, Uwch Ymchwilydd Cyswllt, Adran Gwleidyddiaeth Ryngwladol, Prifysgol Aberystwyth
• Dr Warren Dockter, Darlithydd mewn Gwleidyddiaeth Ryngwladol, Adran Gwleidyddiaeth Ryngwladol, Prifysgol Aberystwyth
• Yr Athro Patrick Thaddeus Jackson, Deon Cyswllt, American University, Washington D.C ac Athro Gwadd yn Adran Gwleidyddiaeth Ryngwladol, Prifysgol Aberystwyth
• Dr Jenny Mathers, Darllenydd mewn Gwleidyddiaeth Ryngwladol, Adran Gwleidyddiaeth Ryngwladol, Prifysgol Aberystwyth
• Dr Jan Ruzicka, Darlithydd mewn Gwleidyddiaeth Ryngwladol, Adran Gwleidyddiaeth Ryngwladol, Prifysgol Aberystwyth
Mae’r ddadl yn dilyn noson arbennig a drefnwyd gan yr Adran nos Fawrth 8 Tachwedd pan ddaeth mwy na 200 o staff a myfyrwyr at ei gilydd tan oriau mân fore Mercher i wylio’r canlyniadau wrth iddynt gael eu cyhoeddi yn yr Unol Daleithiau.
Dywedodd yr Athro Richard Beardsworth: "Yn yr un modd â gweddill y byd, bu ein myfyrwyr a’n staff yn dilyn y canlyniadau rhyfeddol ar noson yr etholiad yn ogystal â’r ymgyrch ryfeddol, llawn troadau annisgwyl, arweiniodd at 8 Tachwedd.
"Mae’r canlyniad yn codi cwestiynau arwyddocaol pellach ynghylch gwleidyddiaeth ddomestig a thramor America a fydd yn cael eu trafod yn y digwyddiad bord gron diweddaraf hwn. Ein nod yw ceisio esbonio a deall yr heriau a ddaeth ar ein gwarthaf yn sgil y newid aruthrol hwn, ac i roi persbectif hanesyddol ar y canlyniad."
Cynhelir y drafodaeth rhwng 6.30 a 9 yr hwyr, Nos Fawrth 29 Tachwedd 2016 ym Mhrif Neuadd adeilad Adran Gwleidyddiaeth Ryngwladol, Campws Penglais. Mynediad yn rhad ac am ddim, ac mae croeso i bawb ond mae nifer cyfyngedig o lefydd ar gael ac mae cadw lle arlein felly yn hanfodol.