Canolfan Wybodaeth newydd ar gyfer Gwleidyddiaeth Ryngwladol

Adran Gwleidyddiaeth Ryngwladol Prifysgol Aberystwyth

Mae Adran Gwleidyddiaeth Ryngwladol Prifysgol Aberystwyth wedi lansio Canolfan Wybodaeth newydd i wneud gwaith ymchwil ym maes Gwleidyddiaeth Ryngwladol.

Bydd y Ganolfan Wybodaeth yn canolbwyntio ar ymchwil mewn dau faes sy’n wahanol iawn i’w gilydd ond sydd eto’n cydberthyn ar sawl lefel. Ar y naill law bydd Cynhyrchu Gwybodaeth, Arbenigedd a Thystiolaeth mewn Gwleidyddiaeth Ryngwladol; ar y llall bydd Hanes, Athroniaeth a Chymdeithaseg Gwybodaeth, Gwyddoniaeth a Thechnoleg.

Dr Berit Bliesemann de Guevara yw Cyd-Gyfarwyddwr y Ganolfan Wybodaeth Gwleidyddiaeth Ryngwladol ac mae'n credu bod gan y ganolfan newydd rôl bwysig i'w chwarae.

"Er mwyn deall y byd gwleidyddol lle rydyn ni’n byw, mae’n hanfodol ein bod yn dadansoddi’r hyn sy’n cael ei weld fel problem polisi ym maes Gwleidyddiaeth Ryngwladol yn y lle cyntaf a pham fod problemau ac atebion yn cael eu dehongli mewn ffyrdd penodol.

"Yma ym Mhrifysgol Aberystwyth, `rydyn ni bob amser yn ceisio sicrhau bod gan bobl ddealltwriaeth ehangach o’r materion sy’n effeithio arnom yn ddyddiol. Ond er mwyn gwneud hynny mae angen i ni ddeall hefyd sut mae gwneuthurwyr polisi cenedlaethol a mudiadau rhyngwladol yn defnyddio arbenigedd a gwybodaeth wyddonol, a sut mae gwyddoniaeth a thechnoleg yn dylanwadu ar ein dealltwriaeth wleidyddol o’r byd.

“Bydd y Ganolfan newydd yma yn gwneud gwaith ymchwil i ddeall beth sy’n digwydd pan fo’r byd academaidd a’r byd gwleidyddol yn cyd-gyfeirio, pan fo gwybodaeth yn cael ei chyfnewid, a bydd yn rhoi cliwiau am y posibliadau a’r cyfyngiadau sydd yna o ran bwydo i mewn i ddatblygiad polisi yn y dyfodol.”

Cafodd y Ganolfan ei lansio Ddydd Mercher 5 Hydref 2016 yn adeilad Gwleidyddiaeth Ryngwaldol Prifysgol Aberystwyth. Hon oedd yr Adran gyntaf o’i bath yn y byd a bydd yn dathlu ei chanmlwyddiant yn 2019. Mae'r garfan o fyfyrwyr sydd newydd ddechrau ar eu hastudiaethau yn graddio yn ystod blwyddyn dathlu’r canmlwyddiant.

Rhannu