Cap rygbi Cymru i fyfyriwr Prifysgol Aberystwyth

Owen Daniel Howells

Mae Owen Daniel Howells, myfyriwr sydd yn ei drydedd flwyddyn ym Mhrifysgol Aberystwyth, wedi ennill ei gap cyntaf yn chwarae dros Gymru.

Chwaraeodd Owen - sydd yn ei drydedd flwyddyn o astudio Daearyddiaeth Ffisegol, ac sydd yn gapten ar dîm cyntaf Rygbi Undeb y Brifysgol - i Fyfyrwyr Cymru yn eu gêm yn erbyn Myfyrwyr Ffrainc ddydd Mercher 4 Mai. Cynhaliwyd y gêm yng Nghanolfan Rhagoriaeth Chwaraeon Caerffili yn Ystrad Mynach, a'r Cymry oedd yn fuddugol, gan ennill 24-17.

Dywedodd Owen am y gêm, lle y chwaraeodd yn safle prop pen tynn, “Roedd hi'n brofiad gwych i chwarae fy ngêm ryngwladol gyntaf i Fyfyrwyr Cymru. Rwy'n ddiolchgar am y gefnogaeth ges i gan fy adran a'r Brifysgol, ac fe hoffwn i feddwl bod fy mhrofiad i yn dangos bod modd astudio a chymryd rhan mewn chwaraeon ar safon uchaf hefyd, os ydych yn fodlon ymroi'n llwyr. Byddaf yn dal i hyfforddi gyda'r garfan y flwyddyn nesaf, ac rwy'n gobeithio cael mwy o gapiau.”

Mae tîm Myfyrwyr Cymru yn rhan allweddol o lwybr Undeb Rygbi Cymru ar gyfer darganfod chwaraewyr addawol a'u datblygu. Mae sawl chwaraewr wedi symud ymlaen drwy Fyfyrwyr Cymru i gynrychioli Cymru yn rhyngwladol.

Bydd Owen yn graddio yn seremonïau graddio'r Brifysgol ym mis Gorffennaf, ac mae'n bwriadu aros ymlaen ym Mhrifysgol Aberystwyth i wneud gradd Meistr.

Rhannu