Saesneg ac Ysgrifennu Creadigol yn ennill Adran y Flwyddyn

Aelodau o’r adran fuddugol, Saesneg ac Ysgrifennu Creadigol, yn dathlu llwyddiant yr Adran yng Ngwobrau Dysgu dan Arweiniad Myfyrwyr Prifysgol Aberystwyth 2015.

Saesneg ac Ysgrifennu Creadigol yw Adran y Flwyddyn Gwobrau Dysgu dan Arweiniad Myfyrwyr Prifysgol Aberystwyth a gynhaliwyd ar Ddydd Gwener 24 o Ebrill.

Roedd Adran y Flwyddyn yn un o un ar ddeg o wobrau gafodd eu cyflwyno yn ystod y Gwobrau, sydd bellach yn eu pedwaredd flwyddyn.

Anrhydeddwyd darlithwyr, staff cymorth a chynrychiolwyr myfyrwyr yn ystod y noson a gynhaliwyd ym Medrus.

Dywedodd Dirprwy Is-Ganghellor, Profiad Myfyrwyr a Rhyngwladol, John Grattan: “Hoffwn longyfarch yr enillwyr a phawb a enwebwyd yn y Gwobrau Dysgu dan Arweiniad Myfyrwyr eleni. Mae Aberystwyth yn buddsoddi’n helaeth er mwyn datblygu ymhellach y profiad dysgu ac addysgu, o ran technoleg ac adnoddau, ac wrth gydnabod a gwobrwyo rhagoriaeth. Adlewyrchwyd y brwdfrydedd a’r gwerthfawrogiad a ddangoswyd gan fyfyrwyr o waith ysbrydoledig ac ymroddiad cydweithwyr ar draws y Brifysgol eleni, yn y nifer mwyaf erioed o enwebiadau. Mae'n bleser mawr gweld ein myfyrwyr yn pleidleisio dros bwy maen nhw’n teimlo yw'r sêr pan ddaw i ddysgu ac ysbrydoli. Dyma’r hyn sy'n gwneud Prifysgol Aberystwyth mor arbennig.”

Yr enillwyr yw:

Cynrychiolydd Myfyriwr y Flwyddyn
Enillydd: Julie Ashton, Athrofa’r Gwyddorau Biolegol, Amgylcheddol a Gwledig
Meddai Philippa Oakden, myfyriwr y mae Julie yn ei chynrychioli: “Julie yw'r cynrychiolydd myfyrwyr gorau a gefais i drwy gydol fy addysg. Mae hi'n rhoi llais i bobl sy'n rhy swil i siarad drostynt eu hunain, ac ni allem ofyn am well cynrychiolydd myfyrwyr.”

Aelod Staff Newydd y Flwyddyn
Enillydd: Catherine Cottrell, Adran Daearyddiaeth a Gwyddorau Daear
Dywedodd Ryan Davies, a gafodd ei ddysgu gan Catherine: “Mae cael fy nysgu eleni gan Catherine wedi bod yn bleser llwyr. Mae hi wedi bod yn gyson broffesiynol, brwdfrydig a  hyderus mewn darlithoedd. Yn gyflym daeth Dr Cottrell yn hoff ddarlithydd i lawer, ac mae’n haeddu cydnabyddiaeth am ei gallu dysgu!”

Gwobr Athro Ôl-raddedig
Enillydd: Devon Simons, Adran Gwleidyddiaeth Ryngwladol
Wrth enwebu Devon am y wobr, dywedodd Peter Serafin: “Mae Devon yn un o'r addysgwyr hyblyg rheiny nad yw wedi ei chyfyngu i’w maes hi o arbenigedd. Mae hi'n barod i drafod ac i gynorthwyo myfyrwyr.”

Staff Cymorth y Flwyddyn
Enillydd: Meinir Davies, Adran Cyfrifiadureg
Dywedodd Connor Goddard, myfyriwr yn yr Adran Gyfrifiadureg lle mae Meinir yn gweithio: “Mae’r cymorth y mae hi'n ei roi i bob myfyriwr heb ei ail, ac mewn llawer ffordd, hi yw “mam” yr adran.”

Cyfrwng Cymraeg Addysg
Enillydd: Hywel Griffiths, Adran Daearyddiaeth a Gwyddorau Daear
Wrth enwebu Hywel ar gyfer y wobr, dywedodd Laura Truelove: " “Mae Hywel yn athro arbennig ym maes afonydd, ac yn enwedig yn y Gymraeg. Nid yn unig y mae ei addysgu am y pwnc yn ardderchog, ond hefyd ei gymorth gyda defnyddio’r Gymraeg i gyfathrebu, yn enwedig wrth ystyried termau yn y maes sydd heb eu cyfieithu.”

Goruchwyliwr y Flwyddyn (Israddedig)
Enillydd: Glyn Jenkins, Athrofa’r Gwyddorau Biolegol, Amgylcheddol a Gwledig
Lauren Marks sydd wedi enwebu Glyn am y wobr. Dywedodd: "Mae fy nhiwtor traethawd hir wedi mynd tu hwnt i’r hyn y mae disgwyl iddo’i wneud yn y rôl. Er ei fod yn eithriadol brysur fel cydlynydd cynllun gradd, mae ei fyfyrwyr traethawd hir yn cael blaenoriaeth pan maen nhw angen ei weld. Mae'n angerddol a gofalgar ac rwy'n ffodus taw fe sydd wedi bod yn goruchwylio fy ngwaith eleni.”

Goruchwyliwr y Flwyddyn (Ôl-raddedig)
Enillydd: Pippa Moore, Athrofa’r Gwyddorau Biolegol, Amgylcheddol a Gwledig
Enwebwyd Pippa gan y fyfyrwraig doethuriaeth Ally Evans. “Rwyf wedi ei enwebu Pip am wobr bob blwyddyn ers i mi ddechrau gweithio ar fy noethuriaeth yma yn Aber. Rwyf bellach wedi cyrraedd camau ola’r broses, ac yn gwerthfawrogi’n fwy nag erioed y gefnogaeth yr wyf yn parhau i’w derbyn oddi wrthi fel fy ngoruchwyliwr a’m ffrind.”

Tiwtor Personol y Flwyddyn
Enillydd: Helen Marshall, Athrofa’r Gwyddorau Biolegol, Amgylcheddol a Gwledig
Dywedodd y fyfyrwraig o IBERS, Sophie Boyle: “Ni allaf fynegi ddigon faint o gefnogaeth a dderbyniais gan Helen dros y tair blynedd ddiwethaf yn y Brifysgol, yn ystod y tymor a thu hwnt. Nid yn unig y mae hi wedi fy nysgu am Fioleg Môr, fe ddysgodd i fi sut i dyfu fel person a chredu yn fy hunan. Os oes unrhyw athro neu diwtor yn haeddu'r wobr hon, heb amheuaeth Helen Marshall yw’r person hwnnw.”

Cyfraniad eithriadol i Fywyd y Brifysgol
Enillydd: James Vaughan, Adran Gwleidyddiaeth Ryngwladol
Mae hon yn wobr newydd eleni. Enwebwyd James am y wobr gan Cameron Smyth ar ôl iddo gymryd rhan yn y Gemau Argyfwng. Dywedodd: “Fe gynorthwyodd Jim fi gael llawer o fod yn rhan o’r Gemau Argyfwng; fe olygodd ym mod yn rhan ohonynt ac fe’m galluogodd i ddefnyddio fy holl sgiliau hyd eithaf fy ngallu.”

Gwobr Addysgu Rhagorol
Enillydd: Ayla Gôl, Adran Gwleidyddiaeth Ryngwladol
Enwebwyd Ayla am y wobr gan Sarah Dorman. Dywedodd: "Yn ogystal â bod yn ddarlithydd gwych, mae Ayla hefyd yn cynnig i fyfyrwyr ffordd newydd o edrych ar y byd a herio stereoteipiau.”

Adran y Flwyddyn
Enillydd: Adran Saesneg ac Ysgrifennu Creadigol
Dywedodd Alice Vernon, myfyriwr yn yr adran: “Mae'r Adran yn debyg i fy ail deulu ecsentrig. Mae pob myfyriwr yn awyddus i deimlo'n arbennig, ac mae rhai i mi ddiolch i’r Adran Saesneg ac Ysgrifennu Creadigol am yr awyrgylch gynnes, groesawgar a dymunol maen ei gynnig.”

AU13815

Rhannu