Cyn-fyfyriwr yn ennill Gwobr Myfyriwr JIBS
![John Taylor enillydd Gwobr Myfyriwr JIBS am ei brosiect rhagorol yn seiliedig ar ymchwil. Llun gan John Martin](/cy/news/archive/2015/04/garden-2-small-web.jpg)
John Taylor enillydd Gwobr Myfyriwr JIBS am ei brosiect rhagorol yn seiliedig ar ymchwil. Llun gan John Martin
02 Ebrill 2015
Yn ddiweddar, dyfarnwyd Gwobr Myfyriwr JIBS i’r cyn-fyfyriwr o Aberystwyth, John Taylor am ei brosiect rhagorol yn seiliedig ar ymchwil.
Yn gyn-fyfyriwr MSc Econ yn yr Adran Astudiaethau Gwybodaeth ym Mhrifysgol Aberystwyth, enwebwyd traethawd hir John, sy’n dwyn y teitl, "Arolwg o offer a thechnegau bibliometrig a'u defnydd o ragweld technoleg" ar gyfer y wobr flynyddol gan yr Adran.Disgrifiodd y panel beirniadu y gwaith fel traethawd "wedi'i ysgrifennu'n dda iawn, gydag amcanion clir a chyda adolygiad llenyddiaeth ardderchog. Roedd yn ffordd arloesol a diddorol o ddefnyddio bibliometreg mewn cyd-destun ymarferol."
Wrth sôn am ei lwyddiant, dywedodd yr Athro Andy Henley, Cyfarwyddwr yr Athrofa Rheolaeth y Gyfraith a Gwyddor Gwybodaeth ym Mhrifysgol Aberystwyth,
"Rydym wrth ein bodd fod y wobr JIBS wedi mynd i John. Mae hi’n dipyn o gamp i ennill y wobr am y traethawd hir baglor neu meistr gorau ledled y Deyrnas Gyfunol ar gyfer gweithwyr gwybodaeth proffesiynol yn y sector addysg uwch. Mae'r wobr yn un haeddiannol am gwaith caled a’r ymroddiad y dangosodd yn ystod ei astudiaethau a dymunwn y gorau iddo yn y dyfodol."
Mae JIBS yn cynrychioli defnyddwyr o gronfeydd data llyfryddiaethol a chynhyrchion cysylltiedig sydd ar gael i gymunedau’r Deyrnas Gyfunol, Addysg Uwch, Addysg Bellach a’r Cyngor Ymchwil drwy drwy drefniadau safle-drwydded genedlaethol.
Mae'r Adran Astudiaethau Gwybodaeth (DIS) ym Mhrifysgol Aberystwyth yn darparu ymchwil o'r radd flaenaf, addysg a hyfforddiant mewn astudiaethau gwybodaeth, archifau, llyfrgelloedd a threftadaeth - gan gynnwys dros 25 mlynedd yn cyflwyno rhaglenni dysgu o bell. Yn 2014, dathlodd yr Adran ei hanner canfed penblwydd yn darparu cyrsiau llawn amser ac mae ganddi alumni o gwmpas y byd. Mae'n cynnig cymwysterau israddedig ac uwch-raddedig, yn ogystal ag ystod o Gyrsiau Byr ar gyfer datblygiad proffesiynol parhaus (DPP).
Gallwch ddarllen traethawd hir John yma, http://www.jibs.ac.uk/prize/taylorjohn2014.pdf