Bodlonrwydd myfyrwyr parhau'n uchel

Campws Penglais

Bodlonrwydd myfyrwyr ym Mhrifysgol Aberystwyth yn parhau yn uchel,yn ôl yr Arolwg Myfyrwyr Cenedlaethol (NSS) diweddaraf.

Mae’r Arolwg Cenedlaethol Myfyrwyr yn arolwg blynyddol sy’n ceisio cynnig gwybodaeth i ddarpar fyfyrwyr am ble a beth i’w astudio. Ymatebodd 83% o fyfyrwyr eu bod yn fodlon ar eu profiad myfyrwyr yn Aberystwyth.

Gofynnwyd iddynt gwestiynau mewn saith maes: 'dysgu ar fy nghwrs', 'asesu ac adborth', 'cymorth academaidd', 'trefn a rheolaeth', 'adnoddau dysgu', 'datblygiad personol' a 'boddhad cyffredinol'.

Mae’r Adrannau sydd ar y brig o ran boddhad cyffredinol yn cynnwys Gwleidyddiaeth Rhyngwladol a Hanes a Hanes Cymru gyda ffigwr o 91% a 94% yn y drefn honno. Mae Mathemateg ac Adran y Gymraeg hefyd yn sgorio'n uchel.

Yn y cyfamser, mae Adran y Gyfraith a Throseddeg, Ysgol Rheolaeth a Busnes a'r Adran Daearyddiaeth a Gwyddorau Daear ymhlith nifer o adrannau a welodd welliannau sylweddol eleni.

Bydd y canfyddiadau yn cael eu hystyried yn fanwl gan y Brifysgol, a fydd yn defnyddio'r canlyniadau i lywio ei chynllunio yn y dyfodol a sicrhau bod boddhad myfyrwyr yn Aberystwyth yn parhau i fod o safon uchel. Mae camau eisoes ar droed i ddatblygu mannau addysgu, buddsoddi yn Undeb y Myfyrwyr, a gwella ystâd y Brifysgol.

Mae'r Brifysgol eisoes wedi datgan ei bwriad i fuddsoddi mwy na £ 100 miliwn dros y 3 blynedd nesaf er mwyn gwella ac ymestyn y cyfleusterau preswyl a dysgu sydd eisoes yn rhagorol. Mae'r Brifysgol yn hyderus y bydd y cynlluniau cyffrous  hyn yn ychwanegu'n sylweddol at brofiad cyffredinol y myfyrwyr.

Mae'r rhestr o fuddsoddiad yn un o'r rhai mwyaf arwyddocaol yn hanes y Brifysgol. Mae'r cynlluniau yn cynnwys:

• prosiect preswyl mawr newydd gwerth - £ 45m.

• campws arloesedd gwyddoniaeth yng Ngogerddan - £ 35m.

• ailddatblygu adeilad eiconig a mawreddog yr Hen Goleg - £ 20m

• ailddatblygu Canolfan Llanbadarn ar gyfer yr Athrofa Rheolaeth, y Gyfraith a Gwyddor Gwybodaeth - £ 3.5m.

• cyfleusterau TG ac ystafelloedd dysgu gwell

Meddai Rebecca Davies, Dirprwy Is-Ganghellor ar gyfer Gwasanaethau Myfyrwyr a Staff:

 "Rwy'n falch bod boddhad myfyrwyr yn parhau yn uchel yn y Brifysgol. Rydym yn gweithio gydag Undeb y Myfyrwyr i wrando'n ofalus ar anghenion myfyrwyr ac yn buddsoddi yn briodol yn ein campws, ei chyfleusterau ac adnoddau dysgu ychwanegol.

 "Hyd yma, adnewyddwyd ac ailaddurnwyd 13 o ystafelloedd addysgu yn adeilad Hugh Owen ac mae cyfrifiaduron personol mewn ystafelloedd myfyrwyr yn cael eu diweddaru ar hyn o bryd. Rydym hefyd yn ymestyn Wi-Fi ledled y campws a gwasanaeth e-bost newydd i fyfyrwyr.

 "Rwy'n hyderus y bydd y buddsoddiad hwn ym mhrofiad y myfyrwyr yn sylweddol a gweladwy i'n carfan newydd o fyfyrwyr sy’n ymuno ym mis Medi. Mae Aberystwyth yn lle gwych i astudio a byw, ac rwy'n edrych ymlaen at groesawu myfyrwyr hen a newydd i'r Brifysgol yn y flwyddyn academaidd newydd. "

Ychwanegodd John Glasby, Prif Weithredwr Undeb y Myfyrwyr:

“Mae'r Undeb yn falch iawn o weld bod y Brifysgol yn cymryd camau i wella profiad y myfyrwyr, ar bob lefel. Bydd yr ymrwymiad ariannol ychwanegol a wnaed gan y Brifysgol yn help aruthrol fel y bydd cynlluniau cyffrous ar gyfer y gwaith o adnewyddu adeilad  yr Undeb.

“Mae mentrau pellach gan yr Undeb yn cynnwys bwyd a chynigion newydd cyffrous i helpu adeilad yr Undeb i fod yn ganolbwynt y campws i fyfyrwyr. Rydym yn buddsoddi'n drwm mewn adnoddau ychwanegol ar gyfer cefnogaeth a chynrychiolaeth myfyrwyr a byddwn yn defnyddio'r system cynrychiolwyr cyrsiau i sicrhau bod cyrsiau unigol yn cael eu hystyried drwy bwyllgorau pwnc.”

Rhannu