Dethol Prifysgol Aberystwyth Ar Gyfer Cynllun Ysgoloriaethau’r Gymanwlad

Adran Astudiaethau Gwybodaeth

Dethol Prifysgol Aberystwyth Ar Gyfer Cynllun Ysgoloriaethau’r Gymanwlad

Mae Adran Astudiaethau Gwybodaeth Prifysgol Aberystwyth wedi ennill yr hawl i ddyfarnu pump ysgoloriaeth o bwys ar ran Comisiwn Ysgoloriaethau’r Gymanwlad.

Caiff yr ysgoloriaethau eu cynnig i fyfyrwyr dysgu-o-bell sy’n hanu o wledydd y Gymanwlad sy’n datblygu, ac sydd wedi cael cynnig lle ar raglen Astudiaethau Gwybodaeth a Llyfrgellyddiaeth (MSc Econ) yn Aberystwyth.

Sefydlwyd cynllun Ysgoloriaethau’r Gymanwlad ym 1959 ac mae’n cynnig oddeutu 750 o wobrau ar draws y Deyrnas Gyfunol bob blwyddyn.

Mae Prifysgol Aberystwyth eisoes yn cynnig Ysgoloriaeth y Gymanwlad i un myfyriwr llawn-amser bob blwyddyn ond dyma’r tro cyntaf i’r sefydliad wneud cais am yr hawl i ddyfarnu gwobrau i fyfyrwyr dysgu-o-bell. 

“Mae yna dipyn o gystadleuaeth ar gyfer yr ysgoloriaethau yma gyda cheisiadau yn dod gan amryw o sefydliadau pwysig, megis Prifysgol Llundain, Prifysgol Caerfaddon a sawl prifysgol  arall sy’n uchel eu parch. Ry’n ni’n falch iawn felly bod cais Aberystwyth wedi bod yn llwyddiannus,” meddai Hugh Preston, sy’n Uwch Diwtor Derbyniadau yn yr Adran ac a fu’n gyfrifol am lunio’r ddogfen gais ar gyfer Comisiwn y Gymanwlad.

“Mae’n ofynnol bod myfyriwr sy’n gwneud cais am un o’r ysgoloriaethau yn hanu o un o wledydd y Gymanwlad sy’n datblygu. Os ydynt yn llwyddiannus, fe fyddan nhw’n derbyn gwobr a fydd nid yn unig yn talu ei ffioedd dysgu ond a fydd hefyd yn rhoi lwfans byw hael iddyn nhw a’u galluogi i deithio o gwmpas y Deyrnas Gyfnol er mwyn gwneud gwaith ymchwil.”

Croesawyd penderfyniad Comisiwn Ysgoloriaethau’r Gymanwlad gan yr Athro Martin Jones, Dirprwy Is-Ganghellor ym Mhrifysgol Aberystwyth.

“Un o’r prif feini prawf oedd gallu dangos bod ein cynllun Astudiaethau Gwybodaeth a Llyfrgellyddiaeth (MSc Econ) yn cwrdd â Nod Mileniwm y Cenhedloedd Unedig sef darparu addysg i bawb. Mae’r nod hwn hefyd yn cael ei gefnogi gan Adran Datblygu Rhyngwladol y DG,” meddai.

“Yn eu cais, roedd yr Adran Astudiaethau Gwybodaeth a Llyfrgell yn gallu dangos yn glir y byddai myfyrwyr o wledydd sy’n datblygu yn cyfrannu at y nod hwn. O gwblhau eu cwrs yn Aberystwyth, byddai ganddyn nhw’r cymwysterau angenrheidiol i ddarparu addysg ar gyfer plant cynradd ar ôl dychwelyd adre i’w gwledydd eu hunain. Mae hwn yn gyrhaeddiad unigryw sy’n dangos bod DIS ar flaen y gad yn ei maes.”

Ceir rhagor o fanylion am yr ysgoloriaethau ynghyd â chyfarwyddiadau ar gyflwyno cais ar wefan Swyddfa Derbyn Uwchraddedig Prifysgol Aberystwyth (gweler y ddolen ar frig y tudalen). http://www.aber.ac.uk/pga.

Rhannu