Rhwydwaith WiFi

Dydd Iau 6 Rhagfyr 2007
Rhwydwaith WiFi ar gyfer canol tref Aberystwyth
Bydd staff a myfyrwyr Prifysgol Aberystwyth a staff Cyngor Sir Ceredigion sy'n byw yng nghanol tref Aberystwyth yn medru cysylltu â'r we am ddim drwy gyfrwng rhwydwaith di-wifr cyflym yn y dyfodol agos.

Bydd staff technegol Adran Gwasanaethau Gwybodaeth y Brifysgol yn dechrau ar y gwaith o osod y rhwydwaith WiFi yn ei le yn y flwyddyn newydd ac yn anelu i gwblhau’r gwaith erbyn canol mis Mawrth 2008.

Yn ôl Mr Roger Matthews, Dirprwy Cyfarwyddwr Gwasanaethau Gwybodaeth Prifysgol Aberystwyth, bydd y prosiect, sydd yn cael ei wneud mewn cydweithrediad gyda Cyngor Sir Ceredigion, o fudd i bawb sydd yn ymwneud ag ef.
“Bydd staff a myfyrwyr y Brifysgol yn medru cael mynediad i wasanaethau technoleg gwybodaeth y Brifysgol fel petai nhw’n byw mewn neuadd breswyl. Bydd y cynllun sylweddol hwn yn gwasanaethu defnyddwyr sydd yn byw mewn ardal fawr o amgylch yr Hen Goleg ac yn eu galluogi i ddefnyddio’r rhwydwaith yn ddiogel ac yn gyflym iawn os yw eu cyfrifiaduron yn addas i dderbyn WiFi.”

“Mi fydd yn bosibl i aelodau o staff Cyngor Sir Ceredigion ddefnyddio’r rhwydwaith a chael mynediad i’w gwefan nhw”, ychwanegodd.

Dywedodd y Cyng Keith Evans, Arweinydd Cyngor Sir Ceredigion “ Mae hon yn fenter gyffrous gan ei bod yn dod â nifer o sefydliadau at eu gilydd mewn partneriaeth er mwyn darparu rhwydwaith hollbresennol a chyswllt gyda’r We yn Aberystwyth. Bydd gweithwyr Ceredigion yn medru cysylltu gyda sustemau technoleg gwybodaeth y Cyngor a’u diweddaru tra’n gweithio yn Aberystwyth, yn ogystal â derbyn y wybodaeth ddiweddaraf drwy fod mewn cysylltiad gyda’r rhwydwaith di-wifr hwn, a thrwy hynny sicrhau gwasanaeth gwell.”

Mae’r Brifysgol yn bwriadu ymestyn cyffiniau’r rhwydwaith WiFi fel ei bod yn cynnwys Aberystwyth gyfan yn y dyfodol.

Dylai staff a myfyrwyr sydd yn am gofrestru ar gyfer y gwasanaeth newydd gysylltu gyda'r Ddesg Gymorth yn Hugh Owen.