Gwobrau Amlygu Prifysgol Aberystwyth

Uwch Ddarlithydd
Adran Cyfrifiadureg

Mae ymchwil Amanda ym maes biowybodeg a gwyddor data. Hi sy’n cydlynu grŵp ymchwil Biowybodeg a Gwybodeg Iechyd yr adran, ac mae hi wedi pontio sawl disgyblaeth trwy gyflwyno seminar ymchwil biowybodeg rheolaidd ar y cyd ag IBERS. Mae Amanda yn dod o hyd i gysylltiadau â gwahanol feysydd ymchwil yn hawdd, ar ôl cyhoeddi ym maes algorithmau llinynnol a gweithio ar ystadegau cadarn ar gyfer gwell reolaeth ar drin dŵr gyda Dŵr Cymru.

Yn aml, mae ymchwil Cyfrifiadureg yn cael yr effaith fwyaf pan fydd yn ymuno â disgyblaeth arall ac yn cyfrannu at ganlyniad sydd yn aml y tu allan i Gyfrifiadureg pur. Gall hyn ei gwneud hi'n anodd dathlu a gwerthfawrogi agweddau Cyfrifiadureg y gwaith. Mae hyn yn arbennig o wir am waith Amanda sy’n cynnwys cyfraniadau sylweddol iawn ym maes bioleg foleciwlaidd a genomeg. Hoffwn weld ei rôl a’r cyfraniadau y mae’n eu gwneud yn cael cydnabyddiaeth mwy cyhoeddus. 

Ymchwilydd: Bwyd, Diet ac Iechyd
Rheolwr Rhaglen: Grant Rhaglen SODIAT
Adran y Gwyddorau Bywyd

Mae ymchwil Mandy yn canolbwyntio ar ddatblygu technoleg metabolomeg i astudio cyfansoddiad manwl cynhyrchion bwyd ac olrhain metabolion sy'n deillio o ddeiet mewn biohylifau ar ôl i’r bwyd gael ei fwyta. Mae Mandy wedi fy helpu i a’m cydweithwyr i ddatblygu, trwy roi cyfleoedd ychwanegol, y tu hwnt i’r disgwyl, i ni er mwyn meithrin ymchwilwyr brwd sydd mewn safle is na hi’i hun. Mae hi'n hynod gefnogol ac mae ganddi’r agwedd mwyaf brwdfrydig a chadarnhaol tuag at ymchwil a'i staff.

Nid ydym erioed wedi clywed Mandy yn gwrthod cyfle. Os bydd aelod staff iau a llai cymwys yn cynnig syniad i Mandy, nid yw byth yn ei wrthod. Yn hytrach, mae’n gweithio gyda'r unigolyn i ddatblygu’r syniad hwnnw, gan fynd ymhell y tu hwnt i ymchwilwyr eraill. Mae Mandy bob amser yn awyddus i roi cyfleoedd a gweithio gyda phobl nad oes ganddynt o reidrwydd gefndir nodweddiadol yn y gwyddorau, yn ogystal â phobl sydd angen cymorth ychwanegol yn y gweithle.

Mae hi'n meithrin hyder y rhai o'i chwmpas, mae'n fentor ac yn esiampl wych i fenywod a phawb yn ein grŵp ymchwil, ond nid yw’n cael ei gwerthfawrogi ddigon. Byddem wrth ein bodd yn gweld Mandy yn cael cydnabyddiaeth, nid yn unig am ei hymchwil arloesol, ond am ei gwaith fel mentor yn cynorthwyo’r bobl o'i chwmpas, waeth pwy ydyn nhw.

Researcher: Food, Diet and Health
Programme Manager: SODIAT Programme Grant
Department of Life Sciences

Mae Mandy wedi gwneud ymdrech enfawr i ddatblygu cysylltiadau â chwmnïau o Gymru yn ei rôl gyda'r tîm Ymchwil Diet ac Iechyd ac mae wedi chwarae rhan allweddol wrth reoli prosiect £3.5 miliwn WEFO Future Foods. Dros y ddwy flynedd ddiwethaf, mae Mandy wedi ymsefydlu mewn 4 o'r 6 Canolfan Ymchwil Maeth BBSRC, gan ryngweithio'n rheolaidd â chwmnïau'r DU a'u cyflwyno i'r sgiliau ymchwil sy'n bresennol yn Adran y Gwyddorau Bywyd, IBERS ac ArloesiAber. Mae'r ymdrech hon wedi dod i benllanw wrth helpu cwmnïau i ddatblygu pedwar cais llwyddiannus am grant Innovate UK a datblygu llawer o gynhyrchion newydd. Mae Mandy yn dod ag egni, ysgogiad ac angerdd i'w rôl ac mae wedi bod yn gyfrifol am incwm ymchwil sylweddol a datblygu cynnyrch mewn sector hanfodol bwysig yn economi Cymru.

Mae'r math hwn o weithgarwch trosiadol yn aml yn cael llai o gyhoeddusrwydd nag ymchwil sylfaenol, ond mae'n hanfodol bwysig o ran ei chyfraniad at genhadaeth yr Adran a'r Brifysgol i gael effaith gadarnhaol ar economïau rhanbarthol a chenedlaethol. Trwy feithrin partneriaethau trosglwyddo gwybodaeth ystyrlon a chysylltiadau ymchwil gyda chwmnïau bwyd a diod masnachol yng Nghymru a thu hwnt, mae Mandy mewn sawl ffordd yn arwain ymgyrch yr Adran tuag at arallgyfeirio ffrydiau incwm cyllido a sicrhau trosi ein hymchwil i ganlyniadau diriaethol i’r gymdeithas.

Swyddog Prosiect ar gyfer Rhwydwaith Ymchwil Integredig Trafnidiaeth ac Iechyd – THINK

Adran Seicoleg

Mae Amy yn frwdfrydig iawn am ei gwaith. Mae ganddi awydd cryf a chyson am wybyddiaeth, ac mae bob amser yn chwilio am wybodaeth a phob math o gyfleoedd a fyddai'n ei gwella. Mae'n edrych ar y byd gyda'r wybodaeth a'r ddirnadaeth newydd y mae'n eu cael wrth wneud ei gwaith. Oherwydd hynny, mae'n gweld yr hyn sy'n digwydd yn dda iawn ac mae’n gofyn y cwestiwn "sut y gallai fod yn well?".

Gyda chyfuniad o waith caled a phersonoliaeth hynaws, mae hi'n gwneud popeth yn hawdd i'r tîm. Fe wnaeth Amy fy helpu gyda’i holl gyngor, cyfeillgarwch, a chymorth o bob math, gan gadw popeth ar y trywydd iawn bob amser, a chwilio’n gyson am gyfleoedd newydd i holl aelodau’r tîm. Credaf yn ddiffuant fod Amy wedi cyfrannu at yr hyn rwyf wedi'i gyflawni yn ystod fy arhosiad byr yn Aberystwyth.

Cydymaith Ymchwil Ôl-ddoethurol - WISERD

Adran Daearyddiaeth a Gwyddorau Daear

Mae Amy wedi bod yn gydweithwraig eithriadol yng Nghanolfan Ymchwil Haenu Dinesig ac Atgyweirio Sifil, WISERD. Bu’n amhrisiadwy dros y flwyddyn ddiwethaf wrth gynnal dau ddigwyddiad cyhoeddus undydd yn gysylltiedig ag ymchwil cyfathrebu ar gymdeithas sifil a pholareiddio. Amy oruchwyliodd y rhaglen, a chynlluniodd weithgareddau cynhwysol a sensitif a oedd yn caniatáu i bynciau anodd gael eu trafod yn fanwl. Hefyd, sicrhaodd Amy bod adnoddau addas i’r gweithgareddau (sy’n ganolog i ddigwyddiadau gwrth-bolareiddio) ar gael, a bod modd i amrywiaeth o sefydliadau cymdeithas sifil fod yn bresennol. Ar ben hyn, llywiodd y trafod a’r cyfranogi yn arbennig o ddeheuig. Y tu hwnt i'w gwaith i WISERD, mae Amy wedi bod yn aelod gwerthfawr o sawl rhwydwaith yn y Brifysgol a thu hwnt, gan gynnwys Rhwydwaith Menywod mewn Ymchwil PA, Rhwydwaith Astudio'r Sector Gwirfoddol (ymddiriedolwr), a rhwydwaith Cymdeithas Ddysgedig Cymru o ymchwilwyr ar ddechrau gyrfa. Mae Amy hefyd yn gydweithwraig frwd a chalonogol iawn.

Mae Cynorthwywyr Ymchwil, oherwydd yr ansicrwydd sydd ymhlyg yn y gwaith, yn aml yn cael eu hanwybyddu neu'n anghymwys i gael cydnabyddiaeth. Mae eu gwaith serch hynny, yn hanfodol i lwyddiant prosiectau ymchwil. Hefyd, o safbwynt ‘effaith’ diarhebol ymchwil, y gwaith cyswllt â’r cyhoedd yw cyfran enfawr gudd y mynydd iâ, yn gosod y sylfaen i bosibiliadau trawsffurfiol. Byddai cydnabod ymdrechion Amy yn rhoi amlygrwydd i’r gwaith medrus o drefnu a chynnal digwyddiadau o'r fath.

Prif Ymchwilydd

Athrofa'r Gwyddorau Biolegol, Amgylcheddol a Gwledig

Mae Ana bob amser yn barod i wrando neu helpu, waeth beth fo'r pwnc. Mae hi bob amser yn cynnig agwedd gadarnhaol, dealltwriaeth a phersbectif. Mae hi wedi arolygu degau o fyfyrwyr ac wedi ysgrifennu llu o geisiadau am grantiau, a goruchwylio nifer o brosiectau; ond er hynny mae hi bob amser yn gefnogol o bobl eraill.

Mae hi'n esiampl anhygoel, fel ymchwilydd sydd wedi llwyddo i gyfuno bod yn wyddonydd ac yn rhiant; ac fel enghraifft o wyddonydd llwyddiannus sydd â hanes sylweddol o gyhoeddi ymchwil ac ysgrifennu ceisiadau am grantiau sy'n aml yn gweithio heb dynnu sylw at ei hun i gynorthwyo cydweithwyr a myfyrwyr.

Gweinyddwr

Adran Daearyddiaeth a Gwyddorau Daear

Cara yw gweinyddwr Sefydliad Ymchwil Cymdeithasol ac Economaidd a Data Cymru (WISERD) yn ogystal â Chanolfan Gwleidyddiaeth a Chymdeithas Cymru (CWPS), ymhlith rolau eraill.

Cara oedd un o’r ysbrydoliaethau ar gyfer y gwobrau hyn. Mae'r gefnogaeth y mae'n ei darparu i brosiectau ymchwil yn anhygoel. O’r ffordd eithriadol y cydlynodd y gynhadledd ar bolareiddio, i’r gefnogaeth wych y mae’n ei darparu i sicrhau bod gweithgareddau effaith ymchwil yn cael eu hyrwyddo ac yn cyflawni eu nodau, mae’n cyflawni’r gwaith hwn gyda lefel wych o broffesiynoldeb a llygad craff am fanylion.

Yn rhy aml o lawer mae’r ffocws ar yr academydd sy’n gwneud yr ymchwil ac ni roddir digon o glod i fenywod fel Cara Rainbow sy’n galluogi ymchwil o ansawdd uchel. Mae hi wirioneddol yn gaffaeliad i’n tîm.

Darllenydd

Athrofa'r Gwyddorau Biolegol, Amgylcheddol a Gwledig

Mae Catherine wedi rhoi blynyddoedd lawer i'r sefydliad (IGER ac IBERS fel ei gilydd). Mae’n arwain yr ymchwil sy'n sail i'n gwaith bridio ceirch, pys a ffa yn fasnachol yn ogystal ag ymchwil gydweithredol helaeth, gan gynnwys trwy gyllid Horizon 2020, drwy'r blynyddoedd wedi Brecsit.

Mae Catherine yn gweithio ar y cyd â chydweithwyr rhyngwladol o’r byd academaidd a byd diwydiant. Mae ganddi hanes llwyddiannus o ennill grantiau a chyhoeddi ymchwil.

Darlithydd Cyfrwng Cymraeg Mewn Gwleidyddiaeth Ryngwladol

Adran Gwleidyddiaeth Ryngwladol

Rwy'n enwebu Catrin oherwydd ei hagwedd gefnogol, golegol, ac anogol tuag at ymchwil. Yn 2017 cydlynodd Catrin ddigwyddiad i ddod ag ymchwilwyr ym maes mudo yn Aberystwyth ynghyd, gan ganiatáu i gysylltiadau gael eu gwneud a chyfleoedd i gydweithio gael eu datblygu. Cynhaliwyd sawl seminar gan ymchwilwyr ar ddechrau gyrfa dros y ddwy flynedd nesaf, cyn i'r rhwydwaith anffurfiol hwn gael ei ddisodli gan y Ganolfan Symudedd Pobl. Yn 2021, roedd Catrin yn un o gyd-sefydlwyr Rhwydwaith Ymchwil Ymfudo Cymru WISERD, gyda’r nod o gysylltu ymchwilwyr, ymarferwyr a llunwyr polisi, a meithrin cymhwysedd ymhlith ymchwilwyr sy'n dod i'r amlwg. Ers ei lansio, mae'r rhwydwaith wedi cynnal sawl digwyddiad ac mae cyfrol, a gomisiynwyd gan Wasg Prifysgol Cymru, wedi deillio o un ohonynt, cyfrol sy’n rhoi sylw i ymchwil cyfoes ynglŷn â mudo yng Nghymru gan ymchwilwyr ar adeg gynnar yn eu gyrfa. Yn ystod pandemig Covid-19, bu Catrin hefyd yn cefnogi cydweithwyr trwy gynnal sesiwn ar-lein yn canolbwyntio ar ysgrifennu, ac agorodd hyn gyfle i gynnal sesiynau 'galw heibio' ar gyfer gweithio ar ymchwil. Trwy hyn, roedd cydweithwyr yn cael amser ymchwil gwerthfawr mewn amgylchedd cefnogol.

Mae'r natur 'golegol' dawel y mae Catrin yn ei gynnig yn mynd heb gael sylw yn aml. Dyma’r gefnogaeth, yr anogaeth, a'r cyfleoedd sy’n cael eu canfod a’u rhannu, sy'n arwain at ganlyniadau a llwyddiant, ond fel arfer nid yw'r llafur hwn yn cael ei gydnabod. Mae llafur llawn gofal yn rhywbeth nad yw’n cael ei gydnabod yn ddigonol mewn gwaith addysgu, na phrin yn cael ei grybwyll mewn ymchwil. Mae gwobrwyo ymdrechion Catrin i gynorthwyo cydweithwyr yn ystod Covid a hyrwyddo ymchwilwyr ar ddechrau gyrfa yn rhoi’r gydnabyddiaeth honno.

Uwch Ddarlithydd

Adran Cyfrifiadureg

Mae ymchwil Christine ym maes deallusrwydd artiffisial, gan ganolbwyntio ar optimeiddio hewristig. Mae hi wedi gwneud cyfraniadau sylweddol i ddamcaniaeth systemau imiwnedd artiffisial ac algorithmau esblygiadol, gan ddarparu sylfaen gadarn ar gyfer eu defnyddio'n llwyddiannus. Mae hi wedi cynyddu amlygrwydd ein prifysgol yn sylweddol yn ei maes ymchwil drwy gynrychioli'r DU mewn dwy Weithred COST a dod â chynhadledd Ewropeaidd flaenllaw i Aberystwyth ym mis Ebrill, sef EvoStar 2024.

Mae ei chyfraniadau at sylfeini deallusrwydd artiffisial yn darparu’r sylfeini anhepgor, cadarn y mae eraill yn adeiladu ymchwil cymhwysol mwy trawiadol arnynt.

Uwch Ddarlithydd

Adran y Gwyddorau Bywyd

Mae Debbie wedi gweithio'n galed iawn i greu cilfach ymchwil lwyddiannus sydd wedi dod â PA i gysylltiad cydweithredol â nifer o bartneriaid tramor sy’n rhannu’r un diddordebau o ran ceffylau a milfeddygaeth. Mae Debbie wedi arloesi techneg o astudio ffisioleg atgenhedlu mewn mamaliaid heb yr angen i gynaeafu meinweoedd o anifeiliaid byw ac wrth wneud hynny mae wedi cyfrannu at ddatblygu lles anifeiliaid ac ymchwil foesegol. Mae gan ei phartneriaethau y potensial hefyd i ymestyn i ddatblygu gweithgareddau addysgu dwyochrol. Mae Debbie wedi mentora menywod llwyddiannus eraill yn PA ac mae'n parhau i wthio ei hun yn y maes ymchwil, tra'n cyflawni llwyth addysgu sylweddol ac yn arwain ar gyfnewidfeydd rhyngwladol myfyrwyr ar gyfer yr Adran.

Mae Debbie yn esiampl i eraill gyda'i phenderfyniad tawel i lwyddo mewn disgyblaeth hynod gystadleuol – sef datblygu modelau diwylliant meinwe ex vivo ar gyfer ymchwil atgenhedlol – lle mae'n gweithredu mewn byd sy'n cael ei ddominyddu gan ddynion yn draddodiadol. Trwy ei phrosiectau ymchwil rhyngwladol – yn fwyaf nodedig yn yr Emiradau Arabaidd Unedig – mae Debbie yn cydweithio â chydweithwyr academaidd benywaidd eraill Adran y Gwyddorau Bywyd ac yn hyrwyddo rôl menywod mewn gwyddoniaeth a gwerthoedd y Brifysgol a'r Adran.

Porthor Cyfleusterau

Ystadau

Rwy’n siŵr ein bod ni i gyd wedi bod mewn sefyllfaoedd lle nad yw dwy law yn ddigon i gyflawni ein gwaith. Yn ffodus, mae Elain yno bob amser i roi help llaw ac mae wedi fy helpu i symud offer digwyddiadau sawl gwaith. Mae hi'n rhywun y gallaf ddibynnu arno i'm helpu i gyflawni'r gwaith, hyd yn oed pan mae hynny ar fyr rybudd.

Nid wyf yn credu y gallem gyflawni cymaint ag ydym ni yn ei wneud bob dydd heb gymorth Elain. Pan fyddwch chi'n trefnu digwyddiadau (neu unrhyw beth) ar gyfer y brifysgol, mae angen i bopeth redeg ar amser, felly mae'n bwysig gwybod bod gennych chi rywun fel Elain y gallwch chi ddibynnu arno, mae'n fonws bod ganddi agwedd “gallu gwneud”. Mae hi'n gwneud yn siŵr fy mod yn gallu gwneud fy ngwaith, sydd yn ei dro yn helpu'r ymchwilwyr a'r academyddion i wneud eu gwaith nhw.

Swyddog Cyfadran

Adran Daearyddiaeth a Gwyddorau Daear

Mae Elaine Lowe yn aelod o Dîm Gweithrediadau Cyfadran y Gwyddorau Daear a Bywyd. Fel rhan o'i dyletswyddau Cyfadrannol, mae'n gyfrifol am gefnogi ymchwil yn yr Adran Daearyddiaeth a Gwyddorau Daear.

Mae cyfraniad Elaine i ymchwil yn ymestyn i gynorthwyo Pwyllgor Ymchwil y Gyfadran a bu’n gweithio’n galed i gynorthwyo Grŵp Cynllunio Gweithredu Ymchwil y Brifysgol gyfan yn ystod pandemig COVID-19. Mae Elaine yn cynorthwyo gwaith ymchwil staff a myfyrwyr ymchwil yr Adran Daearyddiaeth a Gwyddorau Daear mewn amrywiaeth o ffyrdd. Mae hyn yn cynnwys cynorthwyo’r Prif Ymchwilwyr i recriwtio timau prosiect, sefydlu a chynghori staff prosiect, cynorthwyo i brynu offer, trefnu cynadleddau a gweithdai, a chynorthwyo staff i drefnu teithiau ar gyfer gwaith maes, cynadleddau neu gyfarfodydd.

Mae Elaine yn gwneud i ymchwil ddigwydd drwy ddarparu cymorth effeithlon i'n cymuned ymchwil a chysylltiad effeithiol â chydweithwyr yn y gwasanaethau proffesiynol. Mae'n gwybod popeth am systemau'r Brifysgol, i bwy i ofyn am help, a bydd bob amser yn mynd yr ail filltir i gynorthwyo cydweithwyr, a hynny’n aml pan fo’r amserlenni’n dynn. Mae Elaine yn gwneud cyfraniad hanfodol a hynod werthfawr i weithgareddau ymchwil ledled yr Adran Daearyddiaeth a Gwyddorau Daear.

Rydym yn ddiolchgar iawn am bopeth y mae'n ei wneud.

Darlithydd Cyswllt

Adran Saesneg ac Ysgrifennu Creadigol

Mae Elena Spagnuolo yn gweithio fel hyfforddwr iaith Eidaleg, Darlithydd Cyswllt yn yr Ysgol Ieithoedd a Llên, ac yn Gymrawd yn y Ganolfan Astudio Symudedd Pobl.

Er nad yw ar gontract ymchwil, dyfarnwyd Grant Bach yr Academi Brydeinig i Elena yn 2022 i gefnogi ei hymchwil i’r “Happiness Trains”, sef cynllun symud plant rhwng de a gogledd yr Eidal.

Yn ddiweddar, cyhoeddodd ei monograff cyntaf, Voices of Women Writers: Using Language to Negotiate Identity in Transmigratory Contexts, sy’n ymchwilio i arferion ysgrifennu a hunan-gyfieithu o fewn cyd-destun symudedd. Mae’r Athro Andrea Hammel wedi enwebu Elena oherwydd ei hymroddiad a’i huchelgais i ddatblygu ei phrosiectau ymchwil ei hun er gwaethaf ansicrwydd ei chontractau a’r angen i weithio’n rhan-amser i wahanol unedau yn y Brifysgol. Mae Andrea yn arbennig yn gwerthfawrogi gallu Elena i fod yn agored i arloesi a gweithio gydag eraill i yrru Agenda Ymchwil Prifysgol Aberystwyth yn ei blaen.

Canolfan Gwasanaethau'r Gymraeg

Mae Elin wedi cyfieithu llawer o bethau ar fy nghyfer i. Mae hi’n feddylgar yn ei defnydd o’r geiriau a’r termau cywir, a hefyd yn ei dealltwriaeth o’n gwaith ni, ac mae hi’n dychwelyd gwaith yn gyflym iawn pan mae hynny’n bosib. Dw i’n gwerthfawrogi ei phroffesiynoldeb a’i chyfathrebu cyfeillgar. Mae gwaith Elin wedi ei gwneud hi’n bosibl lansio’r gwobrau hyn.

Mewn amgylchedd ymchwil sy’n ffynnu yng Nghymru, mae’n bwysig iawn defnyddio’r Gymraeg ym mhob rhan o’n gwaith. Yn rhy aml mae gwaith cyfieithwyr yn mynd heb ei weld. Ond mae gwasanaethau cyfieithu wrth wraidd ymchwil yng Nghymru.

Cyfieithydd

Canolfan Gwasanaethau'r Gymraeg

Mae Elin wedi cyfieithu llawer o bethau ar fy nghyfer i. Mae hi’n feddylgar yn ei defnydd o’r geiriau a’r termau cywir, a hefyd yn ei dealltwriaeth o’n gwaith ni, ac mae hi’n dychwelyd gwaith yn gyflym iawn pan mae hynny’n bosib. Dw i’n gwerthfawrogi ei phroffesiynoldeb a’i chyfathrebu cyfeillgar. Mae gwaith Elin wedi ei gwneud hi’n bosibl lansio’r gwobrau hyn.

Mewn amgylchedd ymchwil sy’n ffynnu yng Nghymru, mae’n bwysig iawn defnyddio’r Gymraeg ym mhob rhan o’n gwaith. Yn rhy aml mae gwaith cyfieithwyr yn mynd heb ei weld. Ond mae gwasanaethau cyfieithu wrth wraidd ymchwil yng Nghymru.

Ymarferydd Lles ac Arweinydd Datblygu Gwasanaeth Dewis Choice

Adran Y Gyfraith a Throseddeg

Mae cyfraniadau Elize yn codi uwchlaw terfynau traddodiadol y byd academaidd, ac yn effeithio'n sylweddol ar strategaeth, polisi, a datblygiad gwasanaethau lleol a chenedlaethol yng Nghymru a Lloegr.

Mae ymroddiad Elize i sicrhau llais clir i ddioddefwyr hŷn, sy'n aml yn cael eu hanwybyddu mewn trafodaethau strategol, yn ganmoladwy. Mae Elize yn herio cysyniadau confensiynol am yr hyn sy’n amlwg mewn ymchwil, ac yn eirioli ar ran cynwysoldeb a thegwch. Mae ei hangerdd am rymuso lleisiau cudd nid yn unig yn ail-ffurfio'r drafodaeth ond mae hefyd yn annog cydweithrediadau ymhlith rhanddeiliaid amrywiol, yn gwahodd myfyrdod beirniadol, a sbarduno newidiadau ystyrlon.

Trwy anrhydeddu Elize, rydym yn dathlu nid yn unig ei chyflawniadau unigol ond hefyd ei hymroddiad diflino i greu amgylchedd ymchwil mwy cynhwysol ac effeithiol sy'n ymestyn y tu hwnt i'w chylch cyfrifoldebau hi ei hun ac yn codi proffil menywod hŷn.

Cydymaith Ymchwil Ôl-ddoethurol (Cymdeithas Sifil WISERD)

Adran Daearyddiaeth a Gwyddorau Daear

Rwy'n enwebu Flossie oherwydd ei hymdrechion eithriadol i adeiladu a hwyluso cymuned ymchwil ymhlith myfyrwyr PhD ac Ymchwilwyr ar Ddechrau eu Gyrfa sy'n astudio cymdeithas Cymru ar draws sawl disgyblaeth. Yn ei swyddogaethau amrywiol, mae hi wedi adeiladu rhwydwaith effeithiol ymhlith aelodau mwy newydd y gymuned ymchwil. Bu hyn yn amhrisiadwy yn ystod cyfnod pandemig CV-19, adeg lle’r oedd heriau amrywiol yn wynebu ymchwilwyr wrth gyfeirio’u hunain mewn swyddogaethau newydd y tu allan i'r amgylchedd gwaith arferol, yn ogystal ag ymdopi â heriau cyffredinol y cyfnod clo. Oherwydd y gefnogaeth a roddwyd trwy CWPS ac o dan arweiniad Flossie llwyddodd yr ymchwilwyr ifanc hyn i ymdoddi’n well i'r gymuned ymchwil yn PA a dysgu am y broses ymchwil yn ehangach, yn ogystal â manteisio ar amrywiaeth o gyfleoedd rhwydweithio i'r rhai a oedd yn astudio cymdeithas a gwleidyddiaeth Cymru. Mae'r grŵp wedi parhau i ffynnu ar ôl y pandemig, ac mae cynadleddau a digwyddiadau eraill yn dal i gael eu cynnal.

Byddai gwobrwyo Flossie yn cydnabod y llafur llawn gofal a wneir i gefnogi cydweithwyr ar ddechrau eu gyrfa mewn rhwydweithiau o gymheiriaid. Pan gydnabyddir ymchwilwyr yn gynnar yn eu gyrfa, mae’n gysylltiedig yn aml â dangosyddion ag iddynt ddiffiniadau cyfyng o fewn i gyd-destun disgyblaethol penodol, yn hytrach na chynorthwyo’r amgylchfyd ymchwil ehangach. Mae'r llafur emosiynol a gweinyddol sy'n gynhenid mewn grwpiau o'r fath yn meithrin amgylchfyd ymchwil cynhwysol a chefnogol, ac yn hyn o beth mae Flossie wedi bod yn ddelfrydol.

Rheolwr Monitro Ymchwil a’r FfRhY

Ymchwil, Busnes ac Arloesi

Mae Hannah wedi bod yn cefnogi ymchwil ac ymchwilwyr ym Mhrifysgol Aberystwyth yn uniongyrchol ers 2011, drwy ei rôl fel Rheolwr Monitro Ymchwil a’r FfRhY. Un o gyfrifoldebau allweddol Hannah yw rheoli cyflwyniad y Brifysgol i'r Fframwaith Rhagoriaeth Ymchwil (FfRhY) – ymarfer sy'n pwyso a mesur ymchwil ym mhob prifysgol yn y DU dros gylch o 6 neu 7 mlynedd, ac sy'n llywio'r dyraniad dros y cylch 6-7 mlynedd nesaf o tua £2 biliwn y flwyddyn ar gyfer ymchwil ar draws prifysgolion y DU.

Profiad Hannah, ei sylw i fanylion, ei gwybodaeth wyddoniadurol am y cannoedd lawer o dudalennau o reolau a chanllawiau FfRhY, a'i hymroddiad a'i gwroldeb yn wyneb y miloedd (yn llythrennol) o ddogfennau a darnau o wybodaeth sy'n ffurfio'r gwahanol gydrannau o'r cyflwyniad FfRhY, yw rhai o’r rhesymau’n unig yr wyf i, a llawer iawn o unigolion eraill ar draws PA, mor werthfawrogol o Hannah a'i gwaith.

Mae union natur ei rôl yn golygu bod llawer o waith Hannah yn digwydd y tu ôl i'r llenni i lawer. Ond mae'n chwarae rhan hanfodol wrth alluogi, rheoli, adrodd a hyrwyddo gweithgarwch ymchwil ym Mhrifysgol Aberystwyth, a bydd unrhyw un sydd wedi cael y pleser o ryngweithio â Hannah yn dyst i'w hymrwymiad diwyro i ymchwil ac ymchwilwyr dros nifer o flynyddoedd.

Glanhawr

Ystadau

Mae Helen bob amser yn mynd allan o'i ffordd i'ch helpu ac mae hi wastad yn gyfeillgar ac yn groesawgar i bawb y mae'n cwrdd â nhw. Mae ei hagwedd gadarnhaol y peth cyntaf yn y bore yn ddechrau gwych i'r diwrnod ac mae ei charedigrwydd yn amhrisiadwy i les staff y brifysgol.

Mae Helen yn rhan bwysig o'r tîm, sy'n cadw popeth i fynd yn y brifysgol. Gyda'i chymorth hi, rydyn ni i gyd yn gweithio mewn amgylchedd glân a hyfryd, sy'n daclus ac yn dawel, y lle perffaith i gyflawni ein gwaith. Yn ogystal â helpu i greu gweithle hyfryd a glân, mae Helen hefyd yn helpu i greu man croesawgar sy'n dda o safbwynt lles a morâl y staff. Mae'r fenyw hon yn llonni diwrnodau pobl ac yn meithrin hyder eraill.

Uwch Ddarlithydd

Adran Cyfrifiadureg

Mae ymchwil Helen ym maes amgylcheddau rhithwir, delweddu data a graffeg gyfrifiadurol. Mae ei hymchwil mwyaf amlwg yn cyfrannu at ExoMarswork y Brifysgol, lle mae’n cyfrannu ei harbenigedd i’r gwaith ar PanCam, camera panoramig crwydryn y blaned Mawrth. Mae hefyd yn defnyddio ei harbenigedd i gasglu a delweddu data tri dimensiwn o asedau treftadaeth.

Er bod allbwn gweledol gwaith Helen ar gasglu a delweddu data treftadaeth yn uniongyrchol ac yn hawdd ei ddeall, mae'n llawer anoddach gwerthfawrogi'n ddigonol y gwaith graffeg cyfrifiadurol sy’n sail iddo. Mae'r cymhwysiad hynod ysbrydoledig hwn ym maes archwilio'r gofod yn ymddangos yn bennaf fel offeryn ffisegol, sy’n golygu nad yw’r feddalwedd sy’n sail iddo mor amlwg. Hoffwn weld cydnabyddiaeth llawer mwy cyhoeddus o’r rhan y mae’n ei chwarae yn y gwaith ymchwil cydweithredol hyn.

Technegydd (Sbectrometreg Màs)

Adran y Gwyddorau Bywyd

Mae prif rôl Helen fel technegydd Sbectrometreg Màs yn sail i un o feysydd ymchwil mwyaf gweithgar yr adran. Mae'r cyfarpar sy'n cael ei gynnal a’i gadw gan Helen yn cefnogi llawer o feysydd ymchwil Adran y Gwyddorau Bywyd. Wedi’i hyfforddi fel fferyllydd, ac yna dilyn gyrfa mewn diwydiant a'r byd academaidd, mae Helen bellach wedi meithrin sgiliau mewn dadansoddi metabolau a phroteinau / peptidau. A hithau’n unigolyn ymroddedig, mae'n sicrhau bod y cyfarpar yn cael eu cynnal a’u cadw’n effeithlon. Nid yw'r gwaith bob amser yn syml, ac mae'n defnyddio ei dyfeisgarwch a'i gallu naturiol i weithio trwy broblemau i sicrhau data cywir ac atgynyrchadwy. Mae Helen yn cyfrannu'n gadarnhaol at lawer o brosiectau ymchwil ac yn cefnogi gwaith ein Huwchraddedigion Ymchwil ar draws Adran y Gwyddorau Bywyd ac IBERS, ffaith a adlewyrchir yn nifer y papurau y mae hi wedi’i henwi fel awdur ar eu cyfer.

Dylem hefyd werthfawrogi bod gwaith dadansoddi sbectrol màs Helen wedi chwarae rhan yng ngwobr Pen-blwydd y Frenhines a ddyfarnwyd i Brifysgol Aberystwyth yn ddiweddar.

Fel gwaith llawer o dechnegwyr, gwaith Helen yw wyneb anweledig ymchwil ac anaml iawn y mae ganddo fawr o amlygrwydd y tu allan i'r maes gwaith uniongyrchol. Bydd cymryd camau cadarnhaol i arddangos y math o waith a wneir gan gydweithwyr anhysbys megis Helen, yn helpu i bwysleisio pwysigrwydd arbenigedd technegol mewn ymchwil a dangos y gyrfaoedd sydd ar gael.

Cynorthwyydd Labordy

Technegydd Labordy Addysgu

Adran Daearyddiaeth a Gwyddorau Daear

Mae Hollie yn chwarae rhan sylfaenol yng ngwaith ymchwil yr Adran Daearyddiaeth a Gwyddorau Daear fel technegydd sy’n gyfrifol am labordai ymchwil palaeoecoleg ac ymoleuedd. Mae'n cynorthwyo gwaith maes a gwaith labordy ar ystod o brosiectau a ariennir yn allanol, ac mae'n hynod fedrus wrth brosesu samplau o waddodion sy'n gofyn am ddefnyddio triniaethau cemegol cymhleth.

Dros y 15 mlynedd diwethaf, mae Hollie wedi rhoi hyfforddiant a chyngor gwerthfawr ar dechnegau dadansoddi yn y labordy i nifer o fyfyrwyr PhD, ymchwilwyr ôl-ddoethurol, staff academaidd ac ymwelwyr â Labordy Ymchwil Ymoleuedd a Labordy Palaeoecoleg Aberystwyth. Yn ehangach ledled ADGD, mae Hollie hefyd yn chwarae rhan bwysig fel Swyddog Diogelwch Maes, yn cynghori a chynorthwyo staff a myfyrwyr i gynllunio eu hymchwil maes ac i gynnal yr asesiadau risg cysylltiedig.

Mae Hollie yn gwneud cyfraniad allweddol i lwyddiant ymchwil yn y grŵp Ymchwil Newid Amgylcheddol Cwaternaidd. Mae ei rôl gynorthwyol yn aml yn anweledig, yn llythrennol, gan fod yn rhaid i samplau yn y labordy ymoleuedd gael eu prosesu dan amodau ystafell dywyll! Rydym yn gwerthfawrogi ei gallu i roi sylw i’r manylion, ei hymroddiad, ei gwaith tîm a’i brwdfrydedd. Mae hi'n gwneud cyfraniad gwych i ymchwil yn yr Adran Daearyddiaeth a Gwyddorau Daear.

Rheolwr Datblygu Ymchwil

Ymchwil, Busnes ac Arloesi

I ymchwilwyr sy'n ymbalfalu trwy’r broses gymhleth, a dryslyd yn aml, o ymgeisio am grantiau, mae gweithio gyda rhywun sydd â dealltwriaeth arbenigol o’r broses ymchwil a'r dirwedd ariannu yn amhrisiadwy. Bydd unrhyw un sy’n gweithio gyda Jenny ar geisiadau ymchwil yn y gwyddorau cymdeithasol wedi elwa o'i chraffter eithriadol a'i llygad am fanylion, ei gallu i ragweld y pethau yr ydym yn debygol o'u anghofio, ei gwybodaeth fanwl am systemau cyllido ac, yn anad dim, byddant wedi elwa o’i phroffesiynoldeb. Mae arbenigedd Jenny yn deillio o’i chefndir hithau ym maes ymchwil.

Mae ganddi ddoethuriaeth mewn daearyddiaeth wledig o Brifysgol Coventry, ac mae’n gweithio fel dadansoddwr iechyd cyhoeddus ac epidemiolegydd, felly daw â dealltwriaeth drylwyr o ymchwil i’r swydd. Mae'r cyfuniad hwn o arbenigedd a phrofiad, a diddordeb, cynhesrwydd ac ymroddiad Jenny i gefnogi agenda ymchwil ehangach y Brifysgol yn golygu ei bod hi’n llawn haeddu’r wobr hon.

Mae cymaint o'r ymchwil rhagorol sydd wedi cael ei wneud ym Mhrifysgol Aberystwyth wedi elwa o gefnogaeth Jenny, ac mae hwn yn gyfle perffaith i gydnabod ei chyfraniad aruthrol.

Prif Arweinydd y Ganolfan Ddeialog

Ymchwil, Busnes ac Arloesi

Rwy'n enwebu Jennifer Wolowic am Wobr Amlygu i gynyddu ymwybyddiaeth o'r cyfraniad anhygoel y mae'n ei wneud i'r diwylliant ymchwil yn Aberystwyth drwy ei gwaith fel Prif Arweinydd y Ganolfan Ddeialog.

Ar ôl cwrdd â Jennifer mewn nifer o ddigwyddiadau'r Ganolfan Ddeialog, cefais fy ysbrydoli'n fawr gan ei hagwedd hynod gadarnhaol, ei brwdfrydedd a'i hysgogiad i feithrin ymchwil rhyngddisgyblaethol. Fel Ymchwilydd Gyrfa Gynnar, mae'n bwysig iawn cael gofodau megis y Ganolfan Ddeialog sy'n helpu i greu cyfleoedd ar gyfer cyfnewid gwybodaeth gydweithredol gydag ymchwilwyr ar draws y Brifysgol a rhanddeiliaid y tu hwnt i'r Brifysgol.

Drwy gynyddu amlygrwydd cyfraniad Jennifer i'r diwylliant ymchwil yn Aberystwyth, rydym yn cydnabod ac yn taflu goleuni ar un o chwyddleiswyr allweddol diwylliant ymchwil ffyniannus Aberystwyth.

Porthor

Ystadau

Sawl gwaith sydd angen mynd i fyny ac i lawr y grisiau yn Llandinam i baratoi digwyddiad? Gormod o lawer! Trwy lwc mae Jessica wastad yno i helpu i symud offer y digwyddiadau i wahanol leoliadau, hyd yn oed yn ystod cyfnodau prysur. Mae dibynadwyedd ac agwedd gadarnhaol Jessica yn ei gwneud hi'n gaffaeliad amhrisiadwy i'r brifysgol.

Ble fydden ni heb gymorth Jessica? Ar ei hôl hi, mae’n siŵr, dan ychydig fwy o straen, ac yn cario cymaint o bethau byddai rhywun yn siŵr o’ch riportio i'r heddlu Iechyd a Diogelwch!

Rydym yn ffodus ein bod yn gallu dibynnu ar Jessica (hyd yn oed ar fyr rybudd) i helpu i gefnogi'r brifysgol. Mae hi'n gwneud yn siŵr bod modd i mi wneud fy ngwaith sydd, yn ei dro, yn helpu'r ymchwilwyr a'r academyddion i wneud eu gwaith hwythau.

Cydlynydd Prosiect, FUGI

Adran y Gwyddorau Bywyd

Mae Jess yn aelod amhrisiadwy o'r Grŵp Ymchwil Parasitoleg, Canolfan Barret ar gyfer Rheoli Llyngyr ac yn fwyaf diweddar mae wedi cyfrannu at gasglu data/gwybodaeth i gefnogi cyflwyniad llwyddiannus Gwobr Pen-blwydd y Frenhines y Brifysgol yn 2023. Yn rhan o rôl Jess wrth gynorthwyo i ddatblygu ceisiadau ymchwil sy'n gysylltiedig â pharasitoleg, mae hi hefyd wedi cyfrannu at lwyddiant ~ £20M mewn incwm i gefnogi ceisiadau sylfaenol (BBSRC, Ymddiriedolaeth Wellcome), ceisiadau cymhwysol (IUK, Ymddiriedolaeth Wellcome) a cheisiadau masnachol (MSD Animal Health, Health Services Laboratory). Mae parodrwydd Jess i rannu ei hamser hefyd wedi helpu eraill i nodi cyfleoedd ariannu yn ogystal â chyfrannu at fynd ar drywydd cydweithrediadau newydd, cyfnewid gwybodaeth a digwyddiadau ymgysylltu â'r cyhoedd. Mae ei hysgogiad, ei diwydrwydd a'i brwdfrydedd yn greiddiol i amgylchedd ymchwil adfywiol Adran y Gwyddorau Bywyd i gefnogi FfRhY 2029.

Yn hanfodol i lwyddiannau gwyddonwyr Adran y Gwyddorau Bywyd wrth yrru strategaeth ymchwil y Brifysgol y mae cyfraniadau hanfodol y staff cynorthwyol sydd â'r dasg o ddatblygu cynigion cydweithredol, cydosod costau, cyflwyno hawliadau, paratoi dogfennau teithio, trefnu ymweliadau ac ymgysylltu â chyllidwyr. Yn anffodus, nid yw'r gweithgareddau hanfodol hyn yn aml yn cael eu cydnabod yn rhan o amgylchedd 'ymchwil' y Brifysgol. Mae Jess yn crynhoi'r holl werthoedd hyn ac, felly, mae'n hynod haeddiannol o wobr mor fawreddog.

Ôl-raddedig

Adran Seicoleg

Mae nifer y cydweithwyr yn yr adran Seicoleg ac ar draws y Brifysgol sydd wedi elwa o haelioni ysbryd ac amser Kate, yn ddi-ben-draw.

Mae gwaith PhD Kate, a gyllidir gan ysgoloriaeth ymchwil Margaret Wooloff, yn ymwneud ag ymyriadau hyrwyddo iechyd ar gyfer gweithgarwch corfforol ymhlith pobl ifanc awtistig, ac yn estyn allan i'r gymuned awtistig ac i sefydliadau megis Mencap. Oherwydd y didwylledd a'r rhag-weithgarwch hwn penderfynodd Ysgol y Graddedigion roi cyllid iddi i ddatblygu Rhwydwaith Niwroamrywiaeth yn y Brifysgol, ac i gydlynu’r gynhadledd agoriadol y llynedd.

Roedd Kate wedi dysgu – gydag amser a llawer o brofiadau anodd - i reoli a harneisio ei chyflwr ADHD, daeth yn uchaf yn ei dosbarth pan oedd yn fyfyriwr israddedig, mae wedi datblygu’n ymchwilydd ôl-raddedig rhagorol, ac mae hi hyd yn oed wedi cyhoeddi dau bapur cyn gyflwyno ei thraethawd ymchwil. Mae hi'n arwres ac yn haeddu cael ei chanmol am fod yn esiampl i bawb.

Uwch Ddarlithydd mewn Troseddeg

Adran Y Gyfraith a Throseddeg

Hoffwn enwebu fy nghyd-weithiwr, Kathy, am y wobr hon, oherwydd ei bod yn haeddu cydnabyddiaeth am ei gwaith ymchwil rhagorol a'r gwaith di-glod y mae'n ei wneud yn ein Hadran yn cefnogi a chynorthwyo. Mae Kathy yn fentor ac yn esiampl berffaith i fyfyrwyr a chydweithwyr iau, ac mae’n gefn, yn arweiniad ac yn ysbrydoliaeth cyson i bawb arall. Mae'n dangos diddordeb gwirioneddol yng ngwaith ymchwil ei chydweithiwr, yn rhoi sylwadau craff ac adeiladol ar ddrafftiau, ceisiadau a chynigion, ac yn cerdded yr ail filltir bob amser i roi cymorth ac arweiniad i’r rhai o'i chwmpas. Mae Kathy yn ymwneud â gwaith ymchwil pwysig iawn ym maes cyfiawnder ieuenctid, a does gen i ddim amheuaeth ei bod wedi gwneud, ac y bydd yn parhau i wneud, gwahaniaeth sylweddol iawn ym mywydau pobl ifanc ledled Cymru. Mae ymroddiad Kathy i ymchwil ac i gynorthwyo eraill yn ddiflino. Rywsut, mae hi'n llwyddo i wneud hyn i gyd gyda gwên ddiffuant a synnwyr digrifwch, sy’n ei gwneud yn fenyw arbennig iawn ac yn deilwng o wobr.

Swyddog Moeseg ac Uniondeb Ymchwil

Ymchwil, Busnes ac Arloesi

Rwy'n enwebu Lisa am Wobr Amlygu i gydnabod ei chyfraniadau enfawr i'r broses ymchwil yn y Brifysgol. Yn ei gwaith, sef Swyddog Uniondeb a Moeseg Ymchwil, mae Lisa yn cynorthwyo ymchwilwyr trwy'r broses o gyflwyno ceisiadau am adolygiad moesegol a chefnogi aelodau'r panel moeseg yn eu gwaith adolygu. Mae'n hwyluso trefn gymhleth a heriol gyda gofal, amynedd a diwydrwydd. Mae'n waith anodd sydd hefyd yn hynod bwysig. Mae peth o ymchwil mwyaf heriol a sensitif y Brifysgol yn dibynnu ar gynnal gweithdrefnau moeseg yn ddidrafferth, ac mae Lisa yn gwneud y gwaith hwn gyda charedigrwydd a thrylwyredd.

Fel cynifer o fenywod yn y Brifysgol, mae ei gwaith yn cynorthwyo ac yn hwyluso ymchwil, ond yn aml ni sylwir arno. Rwyf wrth fy modd i gael ei henwebu am y wobr hon a chydnabod ei chyfraniad gwych!

Pennaeth Addysg

Ysgol Addysg

Mae Lucy Trotter yn aelod gweithgar o bwyllgor trefnu Rhwydwaith Menywod ym maes Ymchwil. Diolch iddi hi, mae aelodaeth y pwyllgor wedi cynyddu’n sylweddol, gan ei wneud yn gyfrwng effeithiol i hyrwyddo menywod yn ein hamgylchedd ymchwil. Ar ben hyn, chwaraeodd Lucy ran hollbwysig wrth gynorthwyo'r brifysgol i ennill ei gwobr Athena Swan yn ddiweddar. Mae hi wedi cael ei disgrifio fel "Archseren Athena Swan".

Mae ei hymchwil hynod ddiddorol ar Gymreictod a'i berthynas â cherddoriaeth ym Mhatagonia yn haeddu sylw, yn ogystal â'i chyhoeddiad diweddaraf ar rieni sengl yn astudio ym mhrifysgolion y DU yn ystod y pandemig.

Cyfieithydd

Canolfan Gwasanaethau'r Gymraeg

Rwyf fi a thîm Dewis Choice yn ddiolchgar am Mabli, y mae ei chymorth i sicrhau ein cydymffurfiaeth â Deddf Safonau'r Gymraeg bob dydd wedi bod yn anhepgor. Mae ei phroffesiynoldeb, ei hagosatrwydd a'i chefnogaeth ddiysgog yn ei gwneud hi’n bleser gweithio gyda hi’n rheolaidd.

Bob dydd, mae’r Tîm Cyfieithu yn sicrhau bod y Brifysgol yn cydymffurfio â Deddf Safonau'r Gymraeg. Nid yn unig y mae Mabli yn ddibynadwy, mae hi'n ddatryswr problemau creadigol, bob amser yn dod o hyd i atebion i heriau cyfieithu ac yn mynd y filltir ychwanegol i gwrdd â therfynau amser cyfieithu tynn. Mae Mabli a'r tîm yn ein helpu i hysbysebu digwyddiadau sydd ar y gweill a rhannu canfyddiadau ymchwil gyda siaradwyr Cymraeg yn gywir. Diolch i'w chefnogaeth, rydym yn gallu cysylltu â mwy o bobl, gan wneud ein gwasanaethau cam-drin domestig sy'n newid bywydau yn hygyrch i gynulleidfa ehangach. Hefyd, mae'n ein helpu i sicrhau bod ein hymchwil yn cyrraedd cynulleidfa hyd yn oed yn fwy.

Uwch Ddarlithydd mewn Theatr a Pherfformio

Adran Astudiaethau Theatr, Ffilm a Theledu

Bob nos Fercher wrth i mi adael fy swyddfa yn Adeilad Parry Williams, mae llu o gydweithwyr eraill yn cyrraedd. Rwy'n eu galw’n gydweithwyr oherwydd bod Cyrff Ystwyth, cwmni dawns sy'n cynnwys ensemble o berfformwyr ag anableddau dysgu a pherfformwyr nad oes ganddynt anabledd, wedi dod yn rhan o fy myd trwy ymchwil Dr Margaret Ames.

Mae gwaith ymchwil Margaret wedi cynnwys cydweithwyr o'r grŵp hwn ers 1988 ac mae ei hymarfer a'i hymchwil hirdymor wedi canolbwyntio ar y broses greadigol a arweinir gan berfformwyr a'r gallu sydd gan bobl ag anableddau dysgu i greu a rhannu eu profiadau eu hunain o fod-yn-y-byd trwy ymarfer artistig.

Mae ymchwil Margaret yn haeddu mwy o amlygrwydd yn y brifysgol am yr effaith gwirioneddol a hirdymor y mae'n ei chael ar fywydau a phrofiadau’r cyfranogwyr yn ogystal â'r rhai ohonom sydd wedi dod i adnabod a gwerthfawrogi perfformiadau'r grŵp a mwynhau ei gwaith ysgrifenedig sy’n procio’r meddwl.

Yn ogystal ag amlygu’r rhai sydd fwyaf agored i niwed yn y gymdeithas sydd ohoni, mae ymchwil Margaret yn mynd ati i greu gofod lle gallant brosesu a chyfleu eu profiadau o'r byd trwy gyfrwng symudiadau a dawns, gan eu gwneud yn artistiaid ar eu telerau eu hunain.

Uwch Ddarlithydd

Adran Daearyddiaeth a Gwyddorau Daear

Rwy'n gwerthfawrogi ymrwymiad Marie i gynhwysiant, amrywioldeb a thegwch mewn ymchwil ym maes y gwyddorau daear. Mae Marie yn gyd-sylfaenydd ‘Geowyddorau inni i Gyd Cymru’, ac mae wedi cynnal digwyddiadau cyhoeddus i annog cymuned ymchwil fwy cynhwysol yn y maes. Arweiniodd y fenter hon at gynnal nifer o ddigwyddiadau, ar-lein ac wyneb yn wyneb. Mae Marie hefyd wedi bod yn fentor cefnogol i gydweithwyr sy’n fwy newydd yn y maes, gan annog rhai i ymgymryd â graddau ymchwil, ac mae wedi cynnwys cydweithwyr ar ddechrau eu gyrfa mewn cyfleoedd ymchwil, megis gwaith maes. Mae hi wedi ceisio cyflawni a lledaenu’r arfer gorau wrth gynnig dewisiadau gwaith maes sy’n hygyrch a chynhwysol, yn unol â chanllawiau'r Gymdeithas Ddaearegol. Mae hi'n gweithio ar safleoedd maes mewn gwladwriaethau yr effeithiwyd arnynt gan drefedigaethedd wladychol, ac fe gymerodd ran mewn trafodaethau ynglŷn â dad-wladychu’r gwyddorau daear, sy’n canolbwyntio ar effeithiau arolygon daearegol, wrth iddynt echdynnu deunydd a cham-fanteisio ar y mannau hynny, gan hefyd ddiystyru gwerth gwybodaeth a phrofiadau’r bobl frodorol.

Byddai gwobrwyo Marie yn cydnabod yr ymdrechion diffuant a wnaed i ymgorffori cynwysoldeb ac agweddau dadwladychol wrth weithio ar ymchwil. Mae angen ymdrechion a myfyrdod sylweddol i ganfod ac ymgorffori’r arfer gorau mewn ymchwil sensitif, ac ar y cyfan nid yw’r baich gweinyddol sydd ymhlyg yn y gwaith o drefnu digwyddiadau cyhoeddus llwyddiannus yn cael ei gydnabod.

Swyddog Gwasanaethau'r Gymraeg

Canolfan Gwasanaethau'r Gymraeg

Mae cyfraniad amhrisiadwy Mel at gydymffurfio â Deddf Safonau'r Gymraeg yn cael ei werthfawrogi'n fawr gennyf i a thîm Dewis Choice. Mae ei phroffesiynoldeb, ei hagosatrwydd a'i chefnogaeth gyson yn ei gwneud hi’n bleser gweithio gyda hi’n rheolaidd.

Bob dydd, mae Mel a'r Tîm Cyfieithu yn chwarae rhan ganolog wrth gynnal cydymffurfiaeth y Brifysgol â Deddf Safonau'r Gymraeg. Y tu hwnt i'w dibynadwyedd, mae Mel yn sefyll allan fel datryswr problemau dyfeisgar, gan ddod o hyd i atebion arloesol yn gyson i rwystrau cyfieithu ac mae’n dangos parodrwydd i fynd y tu hwnt i ddisgwyliadau i gwrdd â therfynau amser dybryd. Gallwn ddibynnu ar Mel i drefnu cyfieithiad ar gyfer digwyddiadau sydd i ddod a chanfyddiadau ymchwil yn effeithiol. Mae ei chefnogaeth ddiwyro nid yn unig yn ein galluogi i ymestyn cyrhaeddiad ein gwasanaethau cam-drin domestig sy'n newid bywydau, ond mae hefyd yn ehangu ymgysylltiad â'n hymchwil ymhlith cynulleidfa amrywiol.

Darlithydd mewn Gwyddorau Daear ac Amgylcheddol

Adran Daearyddiaeth a Gwyddorau Daear

Mae ymchwil Morgan yn canolbwyntio ar ymateb rhewlifoedd sydd wedi'u gorchuddio â malurion i’r newid yn yr hinsawdd, yn ogystal â’r rhan y mae newid rhewlifol yn ei chwarae mewn newidiadau geomorffolegol afonol. Dyma rai o’r heriau byd-eang sy’n wynebu’r Ddaear ar hyn o bryd, sy'n parhau’n hynod berthnasol yn wyneb hinsawdd sy'n cynhesu. Mae ei gwaith yn canolbwyntio ar y rhyngwyneb rhwng rhewlifeg a daeareg (Gwyddor Daear).

Ymhlith gweithgareddau eraill, mae Morgan wedi ymwneud yn agos â Geowyddorau inni i Gyd Cymru, sy'n hyrwyddo sgiliau a gyrfaoedd yn y sector amgylcheddol i fenywod, gan ganolbwyntio’n benodol ar fynd i'r afael â materion Cydraddoldeb, Amrywioldeb a Chynhwysiant.

Mae ei ffocws ar ymchwil hefyd yn ymestyn i brosiectau ymchwil israddedig, ac yn benodol trwy gydlynu 'system diwtorial' yr Adran Daearyddiaeth a Gwyddorau Daear a chynorthwyo myfyrwyr sy'n cael anawsterau â 'phrosiect ymchwil y traethawd hir', ar sail un i un, i ganfod y cynghorydd mwyaf priodol o blith y staff.

Byddai cydnabyddiaeth yn briodol ac yn deilwng yma, gan i Morgan ddilyn llwybr gwahanol i’r arfer i ddod yn aelod o staff academaidd (dysgu ac ymchwil); mae ei llwybr yn cynnwys gweithio am gyfnod yn y sector masnachol, a nifer o swyddi dysgu ac ysgolheictod. Oherwydd hyn, mae ei hymdrechion penderfynol i adfywio ei phroffil ymchwil yn ganmoladwy iawn, ac mae'r ddirnadaeth y gall ei chynnig yn hynod werthfawr.

Uwch Ddarlithydd

Adran Cyfrifiadureg

Mae ymchwil Patricia ym maes roboteg. Hi yw cydlynydd grŵp ymchwil Roboteg Ddeallus yr adran ac mae’n chwarae rhan flaenllaw mewn nifer o weithgareddau estyn allan pwysig, gan gynnwys y Labordy Traeth blynyddol a'r clwb roboteg. Mae ganddi ddiddordeb ymchwil penodol mewn roboteg a thechnoleg ddatblygiadol ar gyfer byw â chymorth. Ei chyflawniad diweddaraf mwyaf amlwg yw'r tŷ sydd newydd ei adeiladu ar y campws sy'n gartref clyfar, a fydd yn galluogi amrywiaeth eang o ymchwil yng nghyd-destun y cartref clyfar a byw â chymorth. Mae ymchwil Patricia yn agwedd bwysig ar ymchwil roboteg yr adran ac mae'n chwarae rhan allweddol yn y cyd-destun hwn. Mae sicrhau’r cyllid i adeiladu cartref clyfar ar y campws yn golygu bod yna botensial am ddatblygiadau ymchwil pwysig, i’r brifysgol a'r adran, y tu hwnt i'w hymchwil bersonol ei hun.

Trwy greu’r cartref clyfar i fod yn ofod ymchwil, a thrwy hynny galluogi ymchwil sydd â photensial enfawr i gael effaith yn y dyfodol, mae yna risg, sydd bron yn baradocsaidd, mai’r effaith yn unig fydd yn weladwy yn y pen draw, heb dynnu sylw at rôl Patricia wrth wneud yr effaith honno yn bosibl yn y lle cyntaf. Hoffwn weld ei rôl ym maes ymchwil roboteg yn ein prifysgol yn cael cydnabyddiaeth llawer mwy cyhoeddus.

Rheolwr Technegol

Adran Astudiaethau Theatr, Ffilm a Theledu

Mae Rebecca yn un o'r bobl allweddol yn yr adran Astudiaethau Theatr Ffilm a Theledu. Mae hi'n rhoi pob un ohonom mewn sefyllfa i wneud ein gwaith, o amserlennu, i addysgu ac ymchwilio, iechyd a diogelwch a chyllidebu, trefnu mannau gwaith a chyngor a chefnogaeth i fyfyrwyr ar gyfer eu haseiniadau. Mae hi'n deall cymhlethdodau'r adran ac mae ganddi wybodaeth a phrofiad dwfn o’r ffordd mae pob swyddogaeth yn cydweithio i greu ecoleg fywiog o ymarfer a meddwl damcaniaethol, ymarfer creadigol, o wneud a dysgu. Lle gallai eraill fethu gweld yr hyn mae pob swyddogaeth yn ei gyfrannu i ecoleg yr adran, mae ganddi ymwybyddiaeth drylwyr o'r cydbwysedd manwl sydd rhwng pawb ar gyfer cynnal gwaith adran academaidd sydd â nifer o wahanol elfennau wrth galon ei gwaith, mewn addysgu ac ymchwil; ac oherwydd y ddealltwriaeth hon y mae hi’n amhrisiadwy.

Gweithiodd Rebecca ers blynyddoedd lawer mewn amgylchedd sydd wedi'i gor-lywodraethu gan ddynion i raddau helaeth. Mae hi'n gwybod yn iawn beth yw’r treialon a all godi, ac eto mae hi wedi cynnal ei hawdurdod a'i sgiliau a'i gwybodaeth broffesiynol ar bob adeg, weithiau yn wyneb gwahaniaethu amlwg. Mae llawer o ragdybiaethau amdani hi a'i thîm a allai ddigalonni pobl, ond mae hi wastad yn codi uwchlaw hyn a gofalu am ei thîm uniongyrchol o weithwyr proffesiynol cymorth technegol.

Heb Rebecca, ni fyddai fy ymchwil yn bosibl ar y ffurf sydd iddo, a'i chefnogaeth hi sy'n bennaf gyfrifol bod y gwaith hwn yn gyhoeddus. Mae hi'n cefnogi fy meddwl ac felly’r hyn a ysgrifennaf am y gwaith a bu ganddi gysylltiad dwfn â'r grŵp ers i mi ymuno â'r Brifysgol. Rwy'n eithriadol o ddiolchgar am ei chefnogaeth gyson, ei meddwl miniog, a'i chyfraniad creadigol hanfodol.

Darlithydd

Adran Ieithoedd Modern

Mae Roberta yn gwneud cymaint i hyrwyddo Eidaleg ac i gefnogi ei chydweithwyr ar draws yr Adran a'r Ysgol yn ehangach, gan eu galluogi i neilltuo amser i'w hymchwil. Er ei bod ar gontract Dysgu ac Ysgolheictod rhan-amser, mae hi wedi gweithio'n ddiflino i gynnal yr adran Eidaleg, yn aml ar ei phen ei hun, yn cymryd rhan mewn ymchwil sy'n gysylltiedig ag addysgu, maes nad yw'n aml yn cael ei gydnabod gan y gymuned academaidd ehangach, gan gyflwyno papurau cynhadledd a chyd-arwain ar brosiectau ymgysylltiad a lles myfyrwyr.

Pan gafodd y gwobrau hyn eu crybwyll am y tro cyntaf, daeth enw Roberta i'r meddwl fel rhywun y mae ei mewnbwn a'i gwaith i gefnogi ymchwil yn anweledig i raddau helaeth. Heb ei brwdfrydedd a'i hangerdd yn ogystal â'i hadborth craff, ystyriol a meddylgar, ni fyddai llawer o brosiectau wedi dwyn ffrwyth. Mae lles a chefnogaeth academaidd myfyrwyr hefyd wrth wraidd ei gwaith. Yn rhy aml o lawer rhoddir y ffocws ar yr ymchwilwyr amlwg, ond ni roddir digon o gefnogaeth na chlod i'r menywod hynny, fel Roberta, sy'n galluogi ac yn cefnogi eraill i ymgymryd ag ymchwil ac y mae eu mewnbwn mewn meysydd sy'n sylfaenol i'r brifysgol ond sy'n cael eu tanbrisio. Dylem wneud mwy i gydnabod pwysigrwydd a gwerth eu gwaith.

Ôl-raddedig

Adran y Gwyddorau Bywyd

Mae Ruby yn unigolyn ysbrydoledig sydd bob amser yn hapus i helpu ac sy'n aml yn ymwneud â gwaith ymchwil 'y tu ôl i'r llenni'. Mae Ruby bob amser yn barod i dreulio amser ychwanegol yn esbonio cysyniadau fel bod pawb yn deall y wyddoniaeth yr ydym yn cymryd rhan ynddi, ond nid yw'n gwneud hynny i gael clod - mae’n gwneud hynny oherwydd bod y tîm ymchwil, a chanlyniadau’r ymchwil, yn bwysig iddi. Heb Ruby, buaswn yn dal i fod yn cloddio trwy’r data ar gyfer y bennod rwy’n gweithio arni ar hyn o bryd, heb fawr o syniad sut i symud ymlaen tuag at ganlyniadau ystyrlon. Mae Ruby yn esiampl wych i'w chael yn y swyddfa, ac mae’n ddylanwad cadarnhaol ac ysgogol ar weddill y grŵp. Credaf ei bod yn haeddu cydnabyddiaeth am bopeth y mae'n ei wneud.

Ruby hefyd yw sylfaenydd grŵp Cryptogramau Ceredigion; grŵp o unigolion sy’n ymddiddori mewn adnabod Mwsogl, Cennau, a Llysiau’r Afu ac sy'n cyfarfod unwaith y mis i fwynhau teithiau natur trwy wahanol rannau o’r canolbarth. Mae Ruby wedi fy annog i gymryd rhan yn y grŵp hwn, ac mae wedi bod yn ffordd wych nid yn unig o fireinio fy sgiliau wrth adnabod bryoffyt, ond hefyd dod i adnabod pobl eraill o'r un anian yn y gymuned.

Ôl-raddedig

Adran y Gwyddorau Bywyd

Rwy'n gwerthfawrogi gwaith Ruby yn y Brifysgol oherwydd ei bod yn meddwl yn glir ac yn gryno, yn gydwybodol, yn garedig, yn gymwynasgar, yn amyneddgar ac yn frwdfrydig. Mae ei chyfraniadau tawel yn meithrin cynnydd academaidd yn ogystal â datblygiad personol a lles y rhai sy'n gweithio o'i chwmpas. Mae hi’n siriol ac yn cynnig cysur, ac mae ei hagwedd ddi-ofn tuag at ddatrys problemau a goresgyn rhwystrau yn ysbrydoledig.

Mae Ruby yn bodloni’r meini prawf o ran amlygrwydd ym maes ymchwil gan ei bod hi’n siaradwr Cymraeg ifanc o gymuned wledig fechan. Mae’r amgylchedd ôl-raddedig ar hyn o bryd yn hynod gystadleuol a straenus, ond eto mae dawn Ruby wedi disgleirio. Mae hi’n ddiymhongar, ac mae hi’n ddigon bodlon peidio â chael sylw; mae ei chymhelliant yn deillio o’i meddwl ymholgar a’i brwdfrydedd dros ei dewis feysydd ymchwil.

Darlithydd mewn Gwyddor Anifeiliaid a Cheffylau

Adran y Gwyddorau Bywyd

Mae Ruth yn cwrdd â her fyd-eang yn uniongyrchol yn ei hymchwil biotechnolegol; sef dod o hyd i ddewisiadau cig amgen cynaliadwy a hyfyw gyda’r hyn a elwir yn "Amaethyddiaeth Gellog" mewn ffordd amgylcheddol, economaidd a chynaliadwy yn gymdeithasol, ac wrth wneud hynny mae’n hyrwyddo ethos PA o greu'r "Byd a Garem". Y llynedd, sicrhaodd Ruth incwm grant gan UKRI gwerth cyfanswm o dros £750k, gan greu rhwydweithiau academaidd a diwydiannol helaeth iddi hi a'i chydweithwyr yn Adran y Gwyddorau Bywyd. Roedd gwaith Ruth yn cynnwys cysylltiadau cydweithredol â rhanddeiliaid allweddol, gan gynnwys nifer o bartneriaid diwydiannol ac asiantaethau polisi, megis y Sefydliad Safonau Prydeinig, tuag at ddatblygu rheolau diogelwch cig synthetig ar gyfer UDA, Singapore, y DU a'r UE. Felly, bydd gwaith Ruth yn cael effaith ac yn adlewyrchu'n ffafriol iawn ar PA. Mae Ruth yn cynnal ei hymchwil mewn maes hynod gystadleuol ac yn erbyn cefndir o rolau addysgu a gweinyddol heriol – gan gynnwys gwasanaethu fel cadeirydd bwrdd arholi'r Adran – lle mae'n perfformio'n ardderchog.

Mae Ruth yn un o nifer o fenywod rhagorol yn ein hadran sydd â’r ysgogiad, yr angerdd a'r weledigaeth i gyflwyno gwyddoniaeth ragorol gydag effeithiau yn y byd go iawn. Mae ei chyfraniad yn cyd-fynd yn ddi-dor â gweledigaeth ymchwil ac arloesi ehangach PA. Mae Ruth yn ffyrnig o ddisglair, colegol, a theg ac mae'n aelod o staff gwerthfawr iawn gan bob rhan o'r adran a chymuned ehangach y brifysgol.

Darlithydd Addysg

Ysgol Addysg

Dr Siân Lloyd-Williams yw Cyfarwyddwr Ymchwil yr Ysgol Addysg ond mae ei gwaith wedi cael effaith y tu hwnt i'r Ysgol a'r Brifysgol mewn dau brif faes. Yn gyntaf, cydlynodd gyfranogiad Aberystwyth yn y prosiectau ymchwil cydweithredol ar effaith Covid 19 ar ddysgwyr, ysgolion a theuluoedd (2020-23). Yn ogystal, ers 2019 mae Siân wedi arwain yr Ysgol Addysg ym mhrosiect Llywodraeth Cymru, gan gefnogi ymchwil ac ymholiad mewn ysgolion yng Ngheredigion (Prosiect Ymholiadau Proffesiynol Cenedlaethol).

Mae Dr Siân Lloyd-Williams yn haeddu cydnabyddiaeth oherwydd, nid yn unig y mae hi'n cefnogi cydweithwyr adrannol i ddatblygu eu hymchwil ond mae hi wedi rhannu ei harbenigedd yn ehangach o lawer ac wedi codi proffil Prifysgol Aberystwyth ar draws y sector ysgolion. Nid oedd llawer o athrawon mewn ysgolion yn ystyried eu hunain yn 'ymchwilwyr' i ddechrau ond maen nhw'n gwneud nawr, o ganlyniad i anogaeth a chefnogaeth Siân.

Uwch Ddarlithydd

Adran Daearyddiaeth a Gwyddorau Daear

Mae gan Sinéad ddealltwriaeth ragorol o faes cymdeithasol pwysig gofodau digidol a sut mae’r byd digidol yn gyfrwng yr ydym yn byw ein bywydau pob dydd drwyddo, sy’n dal i fod yn faes ymchwil newydd ym maes daearyddiaeth.

Mae Sinéad yn ymgeisydd gwych ar gyfer y gwobrau hyn oherwydd ei bod wedi datblygu corff helaeth o ymchwil ar groestoriad goruchafiaeth pobl wyn a ffeministiaeth gyfoes yn y diwydiant lles ar-lein newydd. Dros y tair blynedd diwethaf, mae Sinéad wedi sefydlu rhaglen sylfaen newydd sy’n greiddiol i weithgareddau ehangu mynediad Prifysgol Aberystwyth, ac mae wedi gwneud cyfraniad allweddol i’r astudiaeth fyd-eang ar ddeinamig hil ac (ôl)ffeministiaeth. Mae hyn yn ymchwilio i’r cysylltiadau rhwng goruchafiaeth pobl wyn a chymryd meddiant o ymgyrchoedd i feithrin agwedd gadarnhaol tuag at y corff a dileu’r stigma sy’n gysylltiedig â thewdra.

Mae gwaith Sinéad ar ddatblygu dadansoddeg ôl-ffeministaidd o fewn fframwaith ymgyrchydd ysgolheigaidd gwrth-hiliol, a'r gwyddorau cymdeithasol yn ehangach, yn haeddu cydnabyddiaeth am ei gyfraniad rhagorol i gyfiawnder cymdeithasol a chenhadaeth ddinesig y brifysgol hon.

Swyddog Effaith Ymchwil a Gwybodaeth

Ymchwil, Busnes ac Arloesi

Rwy’n enwebu Susan Ferguson ar gyfer Gwobr Amlygu i godi proffil y gwasanaethau cymorth a gynigir gan yr Adran Ymchwil, Busnes ac Arloesi, yn enwedig ym maes cyfnewid gwybodaeth ac effaith.

Yn ei gwaith yn Swyddog Effaith Ymchwil, mae Susan yn gweithio gyda staff ar draws adrannau i helpu i ddatblygu astudiaethau achos effaith ac yn trefnu sesiynau hyfforddi ar effaith ymchwil ar gyfer academyddion fel fi.

Mae cynhyrchu ymchwil y cydnabyddir ei fod yn cael effaith yn hanfodol yn yr amgylchedd ymchwil sydd ohoni. A minnau’n ysgolhaig ar ddechrau fy ngyrfa, rwyf wedi dysgu llawer iawn am effaith ganddi, ac edrychaf ymlaen at elwa mwy o’i harbenigedd a’i phrofiad ar fy nhaith broffesiynol yn Aberystwyth.

Drwy amlygu a chydnabod y cyfraniad amhrisiadwy mae Susan yn ei wneud trwy ei gwaith, rydym yn helpu i greu amgylchedd ymchwil sy’n codi proffil y rhai sydd, gydag ymroddiad gwych, yn cefnogi cyfnewid gwybodaeth ac effaith ar draws y Brifysgol.

Uwch Dechnegydd Labordy Addysgu

Adran y Gwyddorau Bywyd

Yn ôl natur rôl technegydd, mae llawer o waith Susan yn sail i allbynnau ymchwil niferus yr adran, trwy sicrhau bod yr offer y mae'n eu defnyddio yn rhoi canlyniadau dibynadwy. Nid yn unig hynny, mae Susan yn ymchwilio'n weithredol ac yn datblygu dulliau newydd i ehangu a gwella'r gwaith ymchwil yn yr adran. Mae Susan wedi cyfrannu'n gadarnhaol at nifer fawr o brosiectau ymchwil yn ystod y blynyddoedd diwethaf, ffaith sy'n cael ei hadlewyrchu yn nifer y papurau y mae hi wedi ei nodi’n awdur arnynt. Mae Susan hefyd yn rhedeg labordy ymchwil prysur, lle mae'n ymdrechu i ddilyn arfer da ac yn annog a chyfarwyddo nifer o Uwchraddedigion Ymchwil sy'n defnyddio'r labordy i wneud yr un peth.

Mae'r math o gymorth y mae Susan yn ei ddarparu ar gyfer ymchwil yn hanfodol i gyflawni lefel ac ansawdd y data sy'n angenrheidiol ar gyfer cyhoeddiadau o ansawdd uchel a chydnabyddiaeth ryngwladol. Mae hyn yn ei dro yn galluogi cipio incwm grant i hyrwyddo nodau ymchwil y Brifysgol. Mae'r technegydd yn aml yn un o wynebau anweledig yr ymchwil ac felly efallai na fydd yn llwybr gyrfa amlwg i lawer. Bydd amlygrwydd ar gyfer rôl o’r fath yn helpu i bwysleisio pwysigrwydd arbenigedd technegol mewn ymchwil ac yn tynnu sylw at y rhai sy'n ymgymryd â'r gwaith pwysig hwn. Bydd hefyd yn helpu i ddangos y gyrfaoedd sydd ar gael ac yn ysbrydoli eraill ar hyd llwybr tebyg.

Darlithydd mewn Ffiseg Sbectrwm Radio

Adran Ffiseg

Ymunodd Fizzah â Phrifysgol Aberystwyth yn 2020 fel darlithydd mewn Peirianneg Sbectrwm Radio a nawr mae'n gydlynydd cwrs ar gyfer yr MSc mewn Peirianneg Sbectrwm Radio. Roedd hi'n fyfyriwr israddedig ym Mhacistan, ei gwlad enedigol, yna astudiodd am radd PhD mewn Peirianneg Electronig yn Llundain, a PostDoc yn Maine, UDA, cyn dod i Aber yn 2020. Er gwaethaf y cyfnod clo, aeth Fizzah ati i weithio'n gyflym i sefydlu nifer o ragofynion allweddol ar gyfer y cynlluniau Peirianneg newydd sydd â rhai sgil-effeithiau cadarnhaol - yn fwyaf nodedig, mynediad at feddalwedd modelu o safon diwydiant megis MatLab. Mae ei chyfraniad yma wedi cael ei werthfawrogi'n fawr ac mae hi wedi llwyddo i gynnal ei chynnyrch ymchwil cryf iawn wrth ymuno â ni. Mae hi wedi agor cyfeiriadau ymchwil newydd yn Aber ac mae hyn yn amserol ac yn bwysig o ran ehangu ein meddylfryd.

Fy rheswm fy hun dros argymell Fizzah yw bod ganddi arddull sydd, er yn effeithiol, yn aml yn mynd o dan y radar. Ond roeddwn i eisiau cydnabod ei chyfraniad, ei brwdfrydedd, ac yn enwedig ei natur ‘golegol’. Byddai'n esgeulus peidio ag ychwanegu bod Fizzah wedi'i henwi'n ddiweddar yn un o'r 100 o fenywod gwych ac ysbrydoledig sy’n gweithio mewn 6G.