Gyrwyr bysiau yn cael hyfforddiant diogelwch menywod gyda chymorth ymchwilydd

Stagecoach De Cymru gyda rhai o'r partneriaid

Mae gyrwyr bysiau yn ne Cymru wedi cael eu hyfforddi am ddiogelwch menywod, diolch i bartneriaeth rhwng ymchwilydd o Brifysgol Aberystwyth, Stagecoach a Chymorth i Ferched Cymru.

Yng Nghymru, mae 12% o fenywod yn dweud eu bod yn teimlo’n ‘anniogel iawn’ wrth ddefnyddio trafnidiaeth gyhoeddus, ac mae dwywaith cymaint o fenywod na dynion yn dweud nad ydyn nhw’n defnyddio trafnidiaeth gyhoeddus oherwydd eu diogelwch - ystadegyn a ysgogodd Stagecoach De Cymru i gyflwyno hyfforddiant diogelwch menywod wedi’i deilwra i’w holl yrwyr.

Mae'r rhaglen hyfforddi yn rhan o brosiect ymchwil sy’n cael ei ariannu gan The Waterloo Foundation ac Ymchwil Iechyd a Gofal Cymru sy'n edrych ar sut mae menywod yn diffinio diogelwch wrth ddefnyddio trafnidiaeth gyhoeddus.

Cynhaliodd Dr Lucy Baker o Brifysgol Aberystwyth weithdai a chyfweliadau â menywod yng Nghymru i gofnodi eu profiadau bywyd. Roedd yr hyfforddiant yn ymdrin â phynciau fel arwyddion o gam-drin domestig, beio dioddefwyr a sut i roi gwybod am faterion diogelu.

Dywedodd Dr Lucy Baker, Prifysgol Aberystwyth:

“Mae’n galonogol iawn gweld cydweithio rhwng ymchwilwyr, elusen a chwmni trafnidiaeth i wneud trafnidiaeth yn fwy diogel i fenywod a merched.

“Mae’n dda gweld Stagecoach yn darparu hyfforddiant penodol ar ddiogelwch menywod i yrwyr; mae’n un o’r cwmnïau bysiau cyntaf i wneud hynny. Mae’r math hwn o waith yn bwysig iawn ac yn allweddol i sicrhau bod teithwyr a staff yn cael gofal.”

Dywedodd Mark Tunstall, Cyfarwyddwr Gweithrediadau Stagecoach De Cymru:

“Rydyn ni wrth ein bodd yn gweithio gyda Chymorth i Ferched Cymru a Phrifysgol Aberystwyth i ddarparu hyfforddiant mor bwysig.

“Rydyn ni am sicrhau bod pawb sy’n teithio ar fws Stagecoach yn teimlo’n ddiogel ac yn cael eu croesawu. Cyflwyno’r hyfforddiant hwn yw’r cam nesaf wrth ddatblygu ein harlwy hyfforddi i sicrhau bod gan ein gyrwyr y sgiliau sydd eu hangen arnyn nhw i wasanaethu ein holl gwsmeriaid yn y ffordd orau.”

Dywedodd Sara Kirkpatrick, Prif Swyddog Gweithredol Cymorth i Ferched Cymru:

“Mae Cymorth i Fenywod Cymru yn falch iawn o fod yn cydweithio â chwmni blaengar fel Stagecoach. Trwy ddarparu’r hyfforddiant hwn i’w gyrwyr, maen nhw’n eu dewis i fod yn rhan o’r ateb, gan gyfrannu at newid i bawb sy’n para.”

Mae Cymorth i Fenywod Cymru yn cynnig Byw Heb Ofn, llinell gymorth gyfrinachol, annibynnol sydd ar gael 24 awr y dydd, 7 diwrnod yr wythnos, ar gyfer cyngor a chymorth. Gall unrhyw un ffonio 0808 80 10 800, anfon neges destun at 07860077333 neu anfon e-bost at info@livefearfreehelpline.wales.

Rhannu