Penodi Athro yn y Gyfraith yn Aberystwyth yn ymgynghorydd arbenigol ar fasnachu pobl
![Yr Athro Ryszard Piotrowicz](/cy/news/archive/2023/05/Professor-Ryszard-Piotrowicz---reduced.jpg)
Yr Athro Ryszard Piotrowicz
02 Mai 2023
Cafodd yr Athro Ryszard Piotrowicz, sy’n arbenigwr ym maes cyfraith ymfudo a masnachu pobl, ei benodi’n ymgynghorydd arbenigol i Bwyllgor Dethol Materion Cartref Tŷ'r Cyffredin, i gynorthwyo’r ymchwiliad i’r fasnach mewn pobl.
Pwyllgor trawsbleidiol o Aelodau Seneddol yw'r Pwyllgor Materion Cartref, ac mae’n gyfrifol am graffu ar waith y Swyddfa Gartref a'i chyrff cysylltiedig.
Ym mis Chwefror 2023, cyhoeddodd y Pwyllgor y cynhelir ymchwiliad newydd i’r fasnach mewn pobl, er mwyn asesu graddfa’r fasnach yn y Deyrnas Unedig a'r ffurfiau sydd i’r farchnad.
Bydd yr ymchwiliad hefyd yn ceisio gweld a ellir gwella polisi'r Llywodraeth, y ddeddfwriaeth a'r gyfundrefn gyfiawnder troseddol i atal y masnachu, erlyn drwgweithredwyr, a diogelu dioddefwyr yn well.
Fel ymgynghorydd arbenigol, bydd yr Athro Piotrowicz yn gwneud sylwadau ar y cyflwyniadau a wneir i'r Pwyllgor, yn rhoi sylwadau a chynghori ar ddrafftiau o ddogfennau neu ddatganiadau y gallai’r Pwyllgor eu cyhoeddi, a defnyddio’i arbenigedd ym maes masnachu pobl i gynghori'r Pwyllgor ar agweddau cyffredinol ei ymchwiliadau i’r fasnach mewn pobl yn y DU.
Wrth sôn am ei benodiad, meddai’r Athro Piotrowicz:
"Rwy'n falch iawn o gael fy mhenodi i'r gwaith hwn, oherwydd bydd yn fy rhoi mewn sefyllfa i ddefnyddio fy arbenigedd, ac, rwy'n gobeithio, i gael dylanwad cadarnhaol ar ddatblygiad polisi'r llywodraeth wrth gefnogi dioddefwyr caethwasiaeth fodern ac erlyn y masnachwyr.”
Yr Athro Ryszard Piotrowicz
Ac yntau'n hanu o'r Alban, astudiodd yr Athro Piotrowicz ym Mhrifysgolion Dundee, Glasgow, Thessaloniki, a Warsaw, yn ogystal ag astudio yn Sefydliad Materion Rhyngwladol Gwlad Pwyl yn Warsaw a Sefydliad Cyfraith Ryngwladol Max-Planck yn Heidelberg.
Ar ôl ennill ei Ddoethuriaeth yn 1987, aeth i fod yn ddarlithydd ym Mhrifysgol Tasmania. Arhosodd yno am ddeng mlynedd a chael ei benodi'n Ddeon ar Gyfadran y Gyfraith.
Cafodd Gadair yn y Gyfraith yn Aberystwyth ym 1999 ac mae hefyd wedi dysgu cyfraith ryngwladol ym Mhrifysgolion Glasgow a Durham. Mae'n un o Gymrodyr Alexander-von-Humboldt, yn Gymrawd Cymdeithas Ddysgedig Cymru a bu'n Athro Gwadd ym maes cyfraith ryngwladol mewn sawl gwlad.
Mae'n arbenigo ar gyfraith ymfudo a'r gyfraith ddyngarol ryngwladol, ac ar hyn o bryd mae wrthi'n gweithio'n bennaf ar y materion cyfreithiol sy'n deillio o’r fasnach mewn pobl.
Mae wedi cynghori cyrff rhyngwladol, llywodraethau cenedlaethol, a chyrff anllywodraethol ar y materion hyn. Mae'n aelod o Grŵp Arweiniad Atal Caethwasiaeth Cymru a bu'n aelod o Grŵp y Comisiwn Ewropeaidd o Arbenigwyr ar Fasnachu Pobl o 2008-15, ac yn aelod o GRETA, Grŵp Cyngor Ewrop o Arbenigwyr ar Weithredu yn erbyn Masnachu Pobl, o 2013 i 2020 (Is-lywydd 2017-20).
Mae'r Athro Piotrowicz wedi cydweithio'n eang â sefydliadau rhyngwladol, gan gynnwys y Sefydliad dros Ddiogelwch a Chydweithredu yn Ewrop (OSCE), Uchel Gomisiynydd y Cenhedloedd Unedig dros Ffoaduriaid (UNHCR), Sefydliad Rhyngwladol Ymfudo (IOM), Cyngor Ewrop, a'r Undeb Ewropeaidd.