Penodi Athro Economeg Iechyd Gwledig yn adeiladu ar ddarpariaeth gofal iechyd y Brifysgol

Yr Athro mewn Economeg Iechyd Gwledig Murray Smith, Prifysgol Aberystwyth

Mae ysgolhaig fu’n chwarae rhan allweddol yn y broses o benderfynu ar ba feddyginiaethau ddylai GIG Cymru a GIG Lloegr eu mabwysiadu, wedi’i benodi yn Athro mewn Economeg Iechyd Gwledig ym Mhrifysgol Aberystwyth.

Mae’r Athro Murray Smith, sy’n arbenigo ar ddefnyddio economeg ac ystadegau i ragfynegi canlyniadau mewn ymddygiadau iechyd ac ymddygiadau sy’n gysylltiedig ag iechyd, yn ymuno ag Ysgol Fusnes Aberystwyth.

Mae ei ymchwil diweddar wedi canolbwyntio ar ansawdd y defnydd o feddyginiaeth fferyllol, gydag un prosiect yn archwilio’r defnydd o boenladdwr sy’n cael eu hanadlu ar gyfer trin poen trawma acíwt cyn bod claf yn mynd i’r ysbyty, a phrosiectau eraill yn ymdrin â’r defnydd o feddyginiaeth ar draws nifer o feysydd clefyd cronig.

Wedi iddo ddechrau ar ei yrfa yn Awstralia, symudodd yr Athro Smith i’r Deyrnas Gyfunol yn 2007 a bu’n gweithio ym mhrifysgolion Aberdeen, Nottingham a Lincoln.

Dywedodd yr Athro Smith: “Rwyf wrth fy modd yn ymuno ag Ysgol Fusnes Aberystwyth. Mae economeg iechyd yn bwnc hynod bwysig am ei fod yn darparu dulliau ac offer i helpu'r rhai sy'n gwneud penderfyniadau yn y dewisiadau y maent yn eu hwynebu wrth geisio darparu gofal iechyd o ansawdd uchel mewn economi fodern sy'n brin o adnoddau.

“I mi mae hwn yn gyfle cyffrous i ychwanegu at bortffolio arbenigedd Ysgol Fusnes Aberystwyth o ran ymchwil cyfredol ac at gael y cyfle i barhau i ddefnyddio fy sgiliau i helpu’r GIG i nodi a darparu gofal iechyd a gwasanaethau cost-effeithiol i bobl canolbarth Cymru.”

Dywedodd yr Athro Elizabeth Treasure, Is-Ganghellor Prifysgol Aberystwyth: “Mae’n hanfodol ein bod fel cymdeithas yn parhau i arloesi yn ein hagweddau at ofal iechyd ac mae Prifysgol Aberystwyth wedi ymateb i’r her drwy lansio’n graddau nyrsio cyntaf erioed ym mis Medi 2022 a thrwy ymchwil ryngddisgyblaethol i frwydro yn erbyn clefydau, defnyddio deallusrwydd artiffisial i wella iechyd cleifion, ac archwilio technegau newydd i wella iechyd pobl drwy ddiet.

“Mae penodiad yr Athro Smith yn dangos ein hymrwymiad parhaus i ddatblygu a darparu addysg ac ymchwil gofal iechyd o ansawdd uchel yn Aberystwyth. Bydd ei arbenigedd yn canolbwyntio ar agweddau economaidd gofal iechyd, a bydd ei addysgu a’i ymchwil o fudd i’n myfyrwyr a thu hwnt.”

Mae penodiad yr Athro Smith yn cyd-daro â dyfarnu Cadair er Anrhydedd i dri aelod o fwrdd gweithredol Bwrdd Iechyd Prifysgol Hywel Dda, gan gryfhau ymhellach arbenigedd Prifysgol Aberystwyth mewn gofal iechyd yn ogystal ag adeiladu ar y bartneriaeth â’r bwrdd iechyd lleol.

Mae gan Dr Helen Munro, Ymgynghorydd Gofal Iechyd Rhywiol ac Atgenhedlol Cymunedol y Bwrdd Iechyd; Dr Leighton Phillips, Cyfarwyddwr Ymchwil, Arloesi a Phartneriaethau Prifysgol y Bwrdd, a Huw Thomas, Cyfarwyddwr Cyllid Hywel Dda at ei gilydd â degawdau o arbenigedd yn y sector iechyd yn y Deyrnas Unedig.

Ychwanegodd Steve Moore, Prif Weithredwr Bwrdd Iechyd Prifysgol Hywel Dda: “Ar ran y Bwrdd hoffwn i longyfarch Helen, Leighton a Huw ar eu penodiad yn Athrawon Er Anrhydedd ym Mhrifysgol Aberystwyth. Mae ein partneriaeth gyda Phrifysgol Aberystwyth yn parhau i fynd o nerth i nerth ac edrychwn ni ymlaen at barhau â’n gwaith hanfodol gyda’n gilydd yn y dyfodol.”

Ychwanegodd yr Athro Elizabeth Treasure: “Mae’n bleser mawr gennyf groesawu ein Hathrawon er Anrhydedd newydd, a fydd gyda’i gilydd yn dod â degawdau o brofiad i’n hymchwil a’n haddysgu. Bydd eu harbenigedd yn cyfrannu ymhellach at y rôl sydd gennym fel Prifysgol i helpu i wella darpariaeth gofal iechyd i bawb.”

Rhannu