Windrush Cymru: Arddangosfa a ffilmiau yng Nghanolfan Gelfyddydau Aberystwyth
![](/cy/news/archive/2022/04/Windrush-Banner-2.jpg)
07 Ebrill 2022
Agorodd arddangosfa newydd yng Nghanolfan Gelfyddydau Aberystwyth yr wythnos hon, yn dangos sut yr ymgartrefodd Cenhedlaeth Windrush Cymru yng Nghymru.
Mae’r arddangosfa yn cyflwyno hanesion a adroddir gan fwy na 40 o bobl, yn disgrifio eu taith i Gymru, a’r heriau a’u hwynebai wrth greu bywyd newydd ar dir pell o’u mamwlad, dod o hyd i waith, ac agweddau pobl tuag atynt.
Mae Cenhedlaeth Windrush yn cynnwys amrywiaeth o bobl o wahanol rannau o’r Gymanwlad a gyrhaeddodd Brydain rhwng 1948 a 1988, aoedd ynymateb i wahoddiad Llywodraeth Prydain yncynnig iddynt waith a chyfle am fywyd gwell.
Mae’r arddangosfa’n deillio o’r prosiect ‘Windrush Cymru – Ein Lleisiau, Ein Straeon, Ein Hanes’ sy’n casglu, cofnodi, dogfennu, rhannu, archifo a dathlu cyfraniadau Cenhedlaeth Windrush.
Dan arweiniad Race Council Cymru ac wedi’i ariannu gan Gronfa Dreftadaeth y Loteri Genedlaethol, cyflwynir y prosiect mewn partneriaeth ag Amgueddfa Cymru, Canolfan y Mileniwm, Casgliad y Werin Cymru, Hynafiaid Windrush Cymru, a Hanes Pobl Dduon Cymru 365. Gyda chefnogaeth gan Gyngor Celfyddydau Cymru, Coleg Brenhinol Cerdd a Drama Cymru, a Choleg Gŵyr Abertawe.
Cynhelir yr arddangosfa yng Nghyntedd y Neuadd Fawr tan 3 Mai 2022, yn rhan o daith yr arddangosfa ledled Cymru. Mynediad am ddim.
I gyd-fynd â’r arddangosfa, dangosir dwy ffilm yn Sinema Canolfan y Celfyddydau:
The Stuart Hall Project (2013), a ddangosir am 5yp ddydd Sadwrn, 9 Ebrill. Portread sensitif, emosiynol o’r damcaniaethwr diwylliannol Stuart Hall, un o leisiau mwyaf ysbrydoledig y Chwith ar ôl y rhyfel, a gafodd ddylanwad ysgubol ar fywyd deallusol Prydain yn fuan ar ôl symud yma i fyw o Jamaica ym 1951.
Pressure (1976), a ddangosir am 7.45yp ddydd Mawrth, 3 Mai. Yn enwog fel y ffilm nodwedd gyntaf gan rywun du ym Mhrydain. Mae’n gofnod cignoeth, onest o sefyllfa dynion ifanc duon sydd wedi eu geni, a’u siomi, ym Mhrydain. Wedi’i gosod yn Llundain y 1970au, mae’n adrodd hanes Tony, dyn ifanc disglair ar fin gadael yr ysgol, yn fab i fewnfudwyr Caribïaidd, sy’n ei gael ei hunan wedi’i ddal rhwng cydymffurfiaeth eglwys ei rieni ac ysbryd milwriaethus Pŵer Du ei frawd.
I archebu tocynnau i’r sinema, gweler gwefan Canolfan y Celfyddydau www.aberystwythartscentre.co.uk neu ffoniwch y Swyddfa Docynnau ar 01970 62 32 32 neu ebostio artstaff@aber.ac.uk