Ymgorffori sgiliau yn eich cwricwlwm

Wrth ystyried ymgorffori hyfforddiant sgiliau o fewn modiwl academaidd, mae sawl ffactor pwysig i'w hystyried.

Amcanion dygu

Yn gyntaf, mae'n hollbwysig nodi'r sgiliau penodol sy'n cyd-fynd ag amcanion dysgu'r modiwl ac sy'n berthnasol i'r pwnc dan sylw. Gallai'r sgiliau hyn gynnwys chwilio am wybodaeth, meddwl yn feirniadol, datrys problemau, cyfathrebu, gwaith tîm, ymchwil, neu gymhwyso gwybodaeth yn ymarferol.

Dull cyflwyno

Yn ail, dylid ystyried y dull cyflwyno. Gydag argaeledd sesiynau addysgu wyneb yn wyneb ac ar-lein, mae angen i hyfforddwyr benderfynu pa fformat sydd fwyaf addas ar gyfer natur y sgiliau a addysgir. Er enghraifft, efallai y bydd angen ymarfer ymarferol a rhyngweithio uniongyrchol ar rai sgiliau, gan wneud sesiynau wyneb yn wyneb yn fwy priodol. Ar y llaw arall, gellir dysgu ac ymarfer rhai sgiliau, megis cydweithio ar-lein neu lythrennedd digidol, yn effeithiol mewn amgylcheddau ar-lein.

Ni waeth pa ddull cyflwyno a ddewisir, mae'n bwysig sicrhau bod cymorth digonol ar gael ar gyfer datblygu sgiliau. Hyd yn oed os oes modiwl eisoes yn rhedeg, gellir gwneud trefniadau i hwyluso gweithgareddau meithrin sgiliau. Gellir cyflawni hyn trwy gefnogaeth 1:1 atodol neu integreiddio ymarferion ac asesiadau ymarferol o fewn y cwricwlwm presennol.

Ymgysylltu a myfyrio gweithredol

Yn olaf, mae'n hanfodol meithrin amgylchedd dysgu cefnogol sy'n annog ymgysylltu a myfyrio gweithredol. Gall creu cyfleoedd i fyfyrwyr ymarfer a myfyrio ar eu sgiliau, cynnig adborth rheolaidd, a hyrwyddo hunanasesu wella effeithiolrwydd hyfforddiant sgiliau o fewn y modiwl yn sylweddol.

Drwy ystyried y ffactorau hyn, gallwch wreiddio hyfforddiant sgiliau yn effeithiol o fewn eich modiwlau academaidd, boed hynny drwy sesiynau addysgu wyneb yn wyneb neu ar-lein, gan sicrhau bod myfyrwyr yn cael y cymorth a’r cyfleoedd angenrheidiol i ddatblygu sgiliau.

Ymgorffori sgiliau cyflogadwyedd (proffesiynol).

Mae ymgorffori cyflogadwyedd yn eich cwricwlwm yn rhoi cyfle i fyfyrwyr ddatblygu eu sgiliau, eu profiad a'u gwybodaeth i'w helpu i drosglwyddo'n llwyddiannus i gyflogaeth raddedig a/neu astudiaethau pellach. Mae'n berthnasol i bob myfyriwr ar bob lefel astudio ac mae'n gynyddol bwysig o ystyried y farchnad swyddi gystadleuol.

Mae creu asesiadau a dysgu dilys ar gyfer eich myfyrwyr sy'n amlygu sgiliau proffesiynol ac yn defnyddio cysylltiadau diwydiannol ochr yn ochr â sgiliau pwnc-benodol a datblygu gwybodaeth yn ffyrdd gwych o ddechrau gwreiddio cyflogadwyedd yn eich rhaglenni.

Mae Gwasanaeth Gyrfaoedd y Brifysgol yn darparu cefnogaeth ragorol i staff academaidd sydd am ymgorffori datblygiad sgiliau proffesiynol yn y cwricwlwm. Cysylltwch â Joanne Hiatt, jeb@aber.ac.uk i drefnu trafodaeth am y cymorth sydd ar gael gan y Gwasanaeth Gyrfaoedd i ymgorffori cyflogadwyedd o fewn y cwricwlwm ac ennyn diddordeb myfyrwyr i ddatblygu eu sgiliau proffesiynol.

Gweithio mewn partneriaeth rhwng y Llyfrgellwyr Pwnc o’r Tîm Ymgysylltu Academaidd a chydweithwyr academaidd i ddarparu cymorth ar gyfer addysg gyda llythreneddau llyfrgell, gwybodaeth a digidol.

Bydd y Llyfrgellwyr Pwnc yn:

• Darparu cyngor i nodi anghenion gwybodaeth a sgiliau academaidd myfyrwyr ac awgrymu atebion cynaliadwy, hygyrch.
• Creu darlithoedd wedi'u teilwra, gweithdai, deunyddiau dysgu, a gweithgareddau addysgol i ddiwallu anghenion penodol myfyrwyr.
• Cydweithio â chi i gyd-ddatblygu a chyd-ddysgu sesiynau.

Darlithoedd

Mae darlithoedd rhyngweithiol yn cynnig arweiniad a thechnegau hanfodol i fyfyrwyr i wella eu galluoedd astudio, gan gyfuno arddangosiadau ymarferol a gweithgareddau i atgyfnerthu dealltwriaeth. Gellir cynnal y darlithoedd hyn naill ai'n bersonol neu ar-lein trwy Teams, ynghyd â sleidiau PowerPoint, deunyddiau addysgu a recordiadau er gwybodaeth.

Seminarau/Gweithdai

Mae'r rhain yn cynnig ymarfer ymarferol ac adnoddau ar-lein ychwanegol i helpu myfyrwyr i wella eu sgiliau llyfrgell a'u cymhwyso'n effeithiol yn eu gwaith cwrs. Argymhellir sesiynau wyneb-yn-wyneb gyda mynediad i gyfrifiadur ar gyfer yr effeithiolrwydd gorau posibl.

Beth mae addysgu sgiliau llyfrgell yn ei gynnwys?

Gallwn roi cyngor ar yr hyn sy'n briodol ac yn berthnasol i'ch myfyrwyr, yn dibynnu ar eu rhaglen astudio. Gall ein haddysgu gynnwys:

• Dechrau arni yn y llyfrgell - cyflwyniad i ddefnyddio llyfrgelloedd Prifysgol Aberystwyth a chael mynediad i  adnoddau llyfrgell
• Chwilio am wybodaeth gan ddefnyddio adnoddau ar-lein gan gynnwys catalogau llyfrgelloedd, cronfeydd data llenyddiaeth a ffynonellau data
• Darganfod, rheoli a gwerthuso gwybodaeth
• Defnyddio technegau chwilio yn effeithiol
• Dysgu am offer rheoli cyfeirnodi a chyfeirnodi, megis Endnote a Mendeley
• Llenyddiaeth ac adolygiadau systematig
• Sgiliau ymchwil traethawd hir
• Sgiliau sy'n ymwneud â'r ymchwil a chael eich cyhoeddi, gan gynnwys deall mynediad agored, rheoli data ymchwil a llyfryddiaeth

I gydweithio â ni neu i ddarganfod mwy am sut y gallwn eich cefnogi chi a'ch myfyrwyr, cysylltwch â'ch Llyfrgellydd Pwnc.

Mae'r Tîm Sgiliau Digidol yn cefnogi:

• myfyrwyr a staff i asesu a datblygu eu sgiliau digidol eu hunain
• cydweithwyr academaidd sydd am ymgorffori datblygu sgiliau digidol yn eu haddysgu
• cydweithwyr academaidd sy'n dymuno defnyddio adnoddau allweddol ar gyfer datblygu sgiliau digidol, megis Offeryn Darganfod Digidol Jisc a LinkedIn Learning

Mae'r tîm yn cyflwyno nifer o sesiynau hyfforddi, y gellir eu harchebu drwy'r brif dudalen archebu. Mae croeso hefyd i gydweithwyr academaidd gysylltu â'r tîm i gael cymorth (e-bost digi@aber.ac.uk; bwcio cyfarfod).

Mae Hanfodion Digidol ar gyfer addysgu GG, yn safle Blackboard Learn Ultra sydd wedi’i gynllunio i gefnogi staff addysgu newydd ym Mhrifysgol Aberystwyth. 

Mae’r safle hwn yn dwyn ynghyd yr holl gyngor a gwybodaeth ddefnyddiol o Wasanaethau Gwybodaeth y bydd ei hangen ar staff addysgu newydd, gan sicrhau eu bod yn cael eu paratoi’n ‘ddigidol’ ar gyfer addysgu. P’un ai yw hynny’n arweiniad ar ddefnyddio OneDrive i storio gwaith; sut i osod modiwl newydd yn Blackboard Learn Ultra; neu ddod o hyd i ganllawiau ar gipio darlithoedd.

Gyda rhestr wirio ddefnyddiol a mynediad awtomatig i bawb drwy Blackboard Learn Ultra, gobeithiwn y bydd y safle’n arbed amser gwerthfawr i staff, yn ogystal â bod yn adnodd defnyddiol i holl staff adrannol. Edrychwch ar y cyflwyniad i’r safle Blackboard i ddysgu sut mae cychwyn arni.

Os oes gennych unrhyw gwestiynau, neu os hoffech roi adborth am y safle, cysylltwch â’r Tîm Sgiliau Digidol (digi@aber.ac.uk).