Module Information

Cyfuna’r modiwl gyfrifoldebau bugeiliol a datblygiad personol y tiwtor personol gyda sgiliau astudio sy’n allweddol ar gyfer llwyddiant mewn addysg uwch. Mae’r deg sesiwn (sy’n cynnwys sesiynau tiwtor personol) yn ystyried y themâu canlynol:
• Gwerthuso ac adolygu adnoddau llyfrgell a dysgu;
• Ysgrifennu ar gyfer cynulleidfaoedd academaidd;
• Ymateb i adborth;
• Technegau adolygu;
• Technegau cyflwyno.

Caniateir trafod agweddau eraill o ddatblygiad personol - megis nodi gwasanaethau prifysgol a lleol, disgwyliadau a heriau bywyd prifysgol, rheolaeth amser ac adnoddau; myfyrio ar berfformiad academaidd, a chyflogadwyedd a dyheadau gyrfa - yn y sesiynau tiwtor personol penodedig.

Y mae'r craidd mewn Daearyddiaeth yn cynnwys elfennau tiwtorial wedi’u hasesi, gyda thiwtoriaid personol academaidd yn arwain grwpiau bychain oddeutu pum myfyriwr. Datblygir sgiliau astudio a phersonol yn y modiwl hwn, gan archwilio dyheadau gyrfaol, a cheir trafodaethau academaidd yn seiliedig ar faes llafur a ddiffiniwyd. Asesir gwaith cwrs ar ddadleuon a themâu allweddol mewn daearyddiaeth, gan feithrin ystod o sgiliau academaidd. Mae'r rhain yn cynnwys:
• Cynllunio gwaith a gosod targedau academaidd a phersonol;
• Defnyddio'r llyfrgell a chreu rhaglen ddarllen effeithiol; dulliau cymryd nodiadau, cydnabod ffynonellau a pharatoi llyfryddiaeth;
• Cywain, dadansoddi a dehongli data;
• Techneg ysgrifennu traethawd Daearyddiaeth a thechneg arholiad (caiff myfyrwyr eu cyflwyno i sgiliau ysgrifennu da a'r meini prawf a ddefnyddir wrth asesu gwaith ysgrifenedig);
• Gwerth adborth, a sut i ymateb iddo.

Asesir y modiwl drwy dri aseiniad: mae’r aseiniad cyntaf (1,500 gair, 40%) yn cynnwys traethawd (1,200 gair, 80%) a sylwebaeth yn nodi sut mae myfyrwyr wedi ymateb i adborth ffurfiadol (300 gair, 20%). Cyflwyniad sy’n bum munud o hyd yw’r ail aseiniad (20%), a thraethawd arall yw’r drydydd aseiniad (1,500 gair, 40%)